បុណ្យភូមិមានជើង ​នៅខេត្តមណ្ឌលគិរី បើកជាផ្លូវការហើយ

បុណ្យភូមិមានជើង បានបើកសម្ពោធជាផ្លូវការហើយ នាព្រឹកថ្ងៃទី២២ ខែវិច្ឆិកានេះ នៅសាលាបឋមសិក្សាពូលូង ក្នុងសង្កាត់រមនា ក្រុងសែនមនោរម្យ ខេត្តមណ្ឌលគិរី។ នៅក្នុងពិធីបើកនេះ ក៏មានការរៀបចំអបអរទិវាកុមារពិភពលោកផងដែរ។

មហោស្រពសិល្ប:បុណ្យភូមិមានជើង ធ្វើឡើងពីថ្ងៃទី២២ ដល់ ថ្ងៃ២៤ ខែវិចិ្ឆកា ក្រោមប្រធានបទ “ការពង្រឹងសមត្ថភាពកុមារ និងយុវជន​ គឺជាការកសាងពិភពលោកឲ្យ មានភាពស្រស់បំព្រង”។

រយ:ពេលបីថ្ងៃនៃបុណ្យភូមិមានជើង នឹងបង្ហាញឲ្យឃើញពីសកម្មភាពជាច្រើន ទាក់ទងនឹងវប្បធម៌ ប្រពៃណី ការរស់នៅ ក៏ដូចជាម្ហូបអាហាររបស់បងប្អូនជនជាតិដើមភាគតិច។ ក្នុងនោះភ្ញៀវទេសចរជាតិ និងអន្តរជាតិ ក៏នឹងបានស្គាល់ពីភាពអស្ចារ្យនៃសម្រស់ព្រៃភ្នំ ទឹកជ្រោះ ពិសេសតំបន់រមណីយដ្ឋានធម្មជាតិនានា ដែលមាននៅក្នុងខេត្តមណ្ឌលគិរីផងដែរ។

កម្មវិធីកម្សាន្តនានា រួមមានដូចជាការលេងល្បែងកម្សាន្តខ្មែរ ការបង្ហាញពិធីសាសនា ការត្បាញក្រមាបែបជនជាតិដើមភាគតិច របាំប្រពៃណីជនជាតិដើមភាគតិច ការពិសារសម្លព្រោង ការសម្ដែងល្ខោនខោល និងទស្សនាការប្រគំតន្រ្តីនាពេលរាត្រី ដែលមានការចូលរួមសម្ដែងពីតារាល្បីៗជាច្រើន។

គួរបញ្ជាក់ផងដែរថា នេះជាឆ្នាំទីពីរហើយ នៃការរៀបចំមហោស្រពសិល្បៈបុណ្យភូមិមានជើងនេះឡើង បន្ទាប់ពីជោគជ័យកាលពីឆ្នាំមុននៅខេត្តក្រចេះ ដោយបានទាក់ទាញអ្នកចូលទស្សនាប្រមាណជាង ៤ម៉ឺននាក់៕

អត្ថបទ៖ រៀម សុខហេង