តារារ៉េបគូស្នេហ៍និងក្រុមការងារ ទៅដល់តំបន់មុំ៣ដោយផ្ទាល់ ដើម្បីបង្ហាញឆន្ទៈគាំទ្រ និងលើកទឹកចិត្តកងទ័ព

តារាចម្រៀងរ៉េបគូស្នេហ៍លោក ងួន ចាន់ដាវីត និងអ្នកនាង ទេព បូព្រឹក្ស បានទៅដល់តំបន់កងទ័ពជួរមុខកម្ពុជាឈរជើង នៅតំបន់មុំ៣ ដើម្បីបង្ហាញនូវឆន្ទៈគាំទ្រ និងលើកទឹកចិត្តដល់កងទ័ពដែលកំពុងបំពេញកាតព្វកិច្ចការពារអធិបតេយ្យភាព និងបូរណភាពទឹកដីជូនជាតិមាតុភូមិ។

តាមរយៈសំណេរលើទំព័រហ្វេសប៊ុកលោក G-Devith នៅថ្ងៃអាទិត្យទី២៩ មិថុនានេះ បានរៀបរាប់ថា “ថ្ងៃនេះខ្ញុំនិងភរិយាបានមកជួបបងកងទ័ពជួរមុខនៅតំបន់ មុំ៣ ដោយផ្ទាល់ដើម្បីលើកទឹកចិត្ត និង បង្ហាញពីឆន្ទៈនៃការគាំទ្រយ៉ាងខ្លាំងខ្លាជូនចំពោះវីរៈភាពដ៏អង់អាចនៃកងទ័ពចក្រភពខ្មែរ”។

ក្នុងឱកាសជួបជាមួយមេបញ្ជាការក៏ដូចជាក្រុមកងទ័ពប្រចាំតំបន់មុំ៣ លោក ងួន ចាន់ដាវីត និងអ្នកនាង ទេព បូព្រឹក្ស រួមនិងក្រុមការងារ ក៏បាននាំយកនូវសម្ភារៈក៏ដូចជាភេសជ្ជៈមួយចំនួន ជូនដល់កងទ័ពកំពុងបំពេញកាតព្វកិច្ចបម្រើជាតិ នៅតំបន់មុំ៣ផងដែរ។

វត្តមានរបស់តារារ៉េបគូស្នេហ៍ដ៏ល្បីឈ្មោះទាំងពីរដួង រួមនឹងក្រុមការងារ ត្រូវបានសាធារណជន ពិសេសអ្នកគាំទ្រ ចាត់ទុកជាសកម្មភាពរួមចំណែកមួយ ក្នុងស្មារតីសាមគ្គីជាតិ តាមរយៈការផ្តល់អំណោយ និងទៅសួរសុខទុក្ខដល់ទីតាំងឈរជើង។

គួរឱ្យដឹងដែរថា ក្នុងខែមិថុនានេះ ក្រុមសិល្បករសិល្បការិនីជាច្រើន បានបង្ហាញការគាំទ្រនិងលើកទឹកចិត្តដល់កងទ័ពកម្ពុជាតាមតំបន់ព្រំដែនខ្មែរ-ថៃ ក្នុងស្មារតីរួមគ្នាការពារបូរណភាពទឹកដី ដោយបាននាំយកការឧបត្ថម្ភពីសប្បុរសជននានា ជូនដល់កងទ័ព៕