មេដឹកនាំស៊ីរី​ សន្យា​រក្សា​​មិត្តភាព​ជាមួយរុស្ស៊ី ខណៈ​​ស្នើ​​ពូទីន​ឲ្យ​ប្រគល់ខ្លួន​អតីត​មេដឹកនាំ​ផ្តាច់ការ​

ប្រធានាធិបតីស៊ីរី Ahmed al-Sharaa បានធានាចំពោះប្រធានាធិបតីរុស្ស៊ី លោក វ៉្លាឌីមៀរ ពូទីន កាលពីថ្ងៃពុធ​ទី​១៥​ខែ​តុលា​ថា រដ្ឋាភិបាលរបស់លោកនឹងរក្សាកិច្ចព្រមព្រៀងអតីតកាលទាំងអស់រវាងទីក្រុងដាម៉ាស និងទីក្រុងមូស្គូ ដែលជាការសន្យាមួយដែលត្រូវបានគេមើលឃើញថាធានាបាននូវមូលដ្ឋានយោធាសំខាន់ពីររបស់រុស្ស៊ី នៅក្នុងប្រទេសស៊ីរី ចំពេលមានការផ្លាស់ប្តូរអំណាចនៅក្នុងប្រទេសដែលហែកហួរដោយសង្រ្គាម។

នៅក្នុងកិច្ចប្រជុំរបស់ពួកគេនៅវិមានក្រឹមឡាំង លោក Sharaa បាននិយាយថា ប្រទេសស៊ីរីស្វែងរក«ឯករាជ្យ អធិបតេយ្យភាព និងបូរណភាពទឹកដី» ខណៈពេលដែលបញ្ជាក់ឡើងវិញនូវកិច្ចសហប្រតិបត្តិការជាមួយទីក្រុងមុស្គូ។ សេចក្តីថ្លែងការណ៍របស់គាត់ បង្ហាញពីការបន្តនៅក្នុងភាពជាដៃគូយុទ្ធសាស្ត្រ ដែលបានបោះយុថ្កាឥទ្ធិពលរបស់រុស្ស៊ីនៅមជ្ឈិមបូព៌ាអស់រយៈពេលជាងមួយទសវត្សរ៍។

យោងតាមមន្ត្រីស៊ីរី លោក Sharaa ក៏ត្រូវបានគេរំពឹងថានឹងស្នើសុំជាផ្លូវការនូវការធ្វើបត្យាប័នអតីតប្រធានាធិបតី Bashar al-Assad ដែលបានភៀសខ្លួនទៅកាន់ប្រទេសរុស្ស៊ី បន្ទាប់ពីត្រូវបានបណ្តេញចេញដោយកងកម្លាំងឧទ្ទាមក្នុងខែធ្នូ​ឆ្នាំ​២០២៤។ លោក Assad ដែលជាសម្ព័ន្ធមិត្តដ៏យូរលង់របស់វិមានក្រឹមឡាំង បានគ្រប់គ្រងប្រទេសស៊ីរី អស់រយៈពេលជាងពីរទសវត្សរ៍ ជាមួយនឹងការគាំទ្រផ្នែកយោធារបស់ទីក្រុងមូស្គូ ក្នុងអំឡុងពេលសង្រ្គាមស៊ីវិលរបស់ប្រទេស។

លោក Sharaa ក៏កំពុងស្វែងរក​ការគាំទ្ររបស់លោកពូទីនប្រឆាំងនឹងការទាមទាររបស់អ៊ីស្រាអែល សម្រាប់តំបន់គ្មានយោធាដែលបានពង្រីកនៅភាគខាងត្បូងប្រទេសស៊ីរី ហើយអាចនឹងស្នើសុំ​ឲ្យ​រុស្ស៊ីដាក់ពង្រាយប៉ូលិសយោធាឡើងវិញជាបណ្តោះអាសន្ន ដើម្បីទប់ស្កាត់ការលុកលុយរបស់អ៊ីស្រាអែលបន្ថែមទៀត។ នេះ​បើ​យោង​តាម​ការ​ចុះ​ផ្សាយរបស់​រ៉យទ័រ។

លោកពូទីនបានស្វាគមន៍លោក Sharaa យ៉ាងកក់ក្តៅ ដោយបានសរសើរការបោះឆ្នោតសភា​នាពេលថ្មីៗនេះរបស់ប្រទេសស៊ីរី ថាជា«ជោគជ័យដ៏អស្ចារ្យ» ហើយសន្យាថានឹងពង្រឹងទំនាក់ទំនងក្នុងវិស័យការពារជាតិ ពាណិជ្ជកម្ម និងកិច្ចសហប្រតិបត្តិការមនុស្សធម៌។ លោកពូទីនបាននិយាយថា «យើងនឹងបន្តអភិវឌ្ឍទំនាក់ទំនងរបស់យើងនៅលើមូលដ្ឋាននៃគំនិតផ្តួចផ្តើមមានប្រយោជន៍ជាច្រើនដែលបានពិភាក្សារួចហើយ»។

កិច្ចពិភាក្សានេះ គឺជា​ដំណើរទស្សនកិច្ចលើកដំបូងរបស់​លោក Sharaa ទៅកាន់ប្រទេសរុស្ស៊ី ចាប់តាំងពីការឡើងកាន់អំណាច និងបង្ហាញពីកិច្ចខិតខំប្រឹងប្រែងរបស់ទីក្រុងមូស្គូ ក្នុងការកសាងទំនាក់ទំនងស្ថិរភាពជាមួយថ្នាក់ដឹកនាំថ្មីរបស់ប្រទេសស៊ីរី ខណៈពេលដែលរក្សាការឈរជើងយោធារបស់ខ្លួន​នៅ​មូលដ្ឋានទ័ពអាកាស Hmeimim ក្នុងទីក្រុង Latakia និងមូលដ្ឋានទ័ពជើងទឹកនៅ Tartous។ រុស្ស៊ី​ក៏​រក្សា​វត្តមាន​មួយ​ផ្នែក​តូច​​ផង​ដែរ​​​​នៅ​អាកាសយានដ្ឋាន Qamishli ក្បែរ​ព្រំដែន​តួកគី និង​អ៊ីរ៉ាក់។

រដ្ឋមន្ត្រីការបរទេស លោក Sergey Lavrov បានប្រាប់អ្នកយកព័ត៌មានកាលពីដើមសប្តាហ៍នេះថា ទីក្រុងមូស្គូជឿថាទីក្រុងដាម៉ាស ចង់​ឲ្យ​កងកម្លាំងរុស្ស៊ីស្នាក់នៅ ដោយបន្ថែមថា មូលដ្ឋានទាំងនេះអាចត្រូវបានគេប្រើជាមជ្ឈមណ្ឌលដឹកជញ្ជូនសម្រាប់ជំនួយមនុស្សធម៌ទៅកាន់ទ្វីបអាហ្វ្រិក។

ខណៈពេលដែលរុស្ស៊ីផ្តោតលើសង្គ្រាមរបស់ខ្លួននៅអ៊ុយក្រែន ខ្លួនបានរក្សាការប្រយុទ្ធយោធាដែលមានកម្រិតនៅក្នុងប្រទេសស៊ីរី ហើយបានបន្តបញ្ជូន​ការដឹកជញ្ជូនប្រេង និងជំនួយ ដើម្បីគាំទ្ររដ្ឋាភិបាលថ្មី។

លោក Sharaa បាន​បញ្ចេញ​សំឡេង​ប្រកបដោយ​សុទិដ្ឋិនិយម​ចំពោះ​ទីក្រុង​មូស្គូ ទោះបីជា​ធ្លាប់​ដឹកនាំ​ការវាយលុក​របស់​ក្រុម​ឧទ្ទាម​ដែល​បាន​ផ្តួលរំលំ​លោក Assad ដែល​ជា​សម្ព័ន្ធ​លោក​ពូទីន​ក៏ដោយ។ នៅក្នុងបទសម្ភាសន៍នាពេលថ្មីៗនេះ លោក Sharaa បានប្តេជ្ញាបន្តចាត់វិធានការផ្លូវច្បាប់ ដើម្បីនាំលោក Assad មកកាត់ទោស ខណៈដែលលោក Lavrov បាននិយាយថា ប្រទេសរុស្ស៊ីបានផ្តល់សិទ្ធិជ្រកកោនអតីតមេដឹកនាំរូបនេះ«ក្រោមហេតុផលមនុស្សធម៌»៕

ដោយ៖ ឈាង