គ្រោះរញ្ជួយដីកម្រិត ៥,៣រ៉ិចទ័រ អង្រួនភាគខាងកើតកោះតៃវ៉ាន់ ខណៈការខូចខាតមិនទាន់ដឹង

នៅព្រឹកថ្ងៃសៅរ៍ទី១៨ ខែតុលានេះ គ្រោះរញ្ជួយដីកម្រិត៥,៣រ៉ិចទ័រ បានវាយប្រហារឆ្នេរសមុទ្រភាគខាងកើតរបស់កោះតៃវ៉ាន់ បើយោងតាមមជ្ឃមណ្ឌលរដ្ឋបាលអាកាសធាតុកណ្តាល (CWA) ខណៈការខូចខាតមិនទាន់ដឹងនៅឡើយ។

បើយោងតាមការដកស្រង់របស់ CNA English ពី CWA បានរាយការណ៍ថា ចំណុចកណ្តាលនៃការរញ្ជួយដីស្ថិតនៅក្នុងសមុទ្រ ចម្ងាយប្រហែល៥៦,៩ គីឡូម៉ែត្រ ភាគខាងកើតទីក្រុង Hualien ក្នុងជម្រៅ ១៤,៣ គីឡូម៉ែត្រ។ រញ្ជួយ​ដី​ក៏នេះ​ត្រូវ​បាន​គេ​មានអារម្មណ៍រង្គើនៅ​ទូទាំង​ផ្នែក​មួយ​ចំនួន​នៃ​កោះតៃវ៉ាន់ ប៉ុន្តែ​មិន​មាន​របាយការណ៍​ភ្លាមៗ​អំពី​ការ​រង​របួស ស្លាប់​ឬ​ការ​ខូច​ខាត​ឡើយ។

ចំពោះការរញ្ជួយដីខ្លាំងបំផុតត្រូវបានកត់ត្រានៅក្នុងតំបន់ Yilan និង Hualien ដែលឈានដល់កម្រិត ៣ នៅលើមាត្រដ្ឋានអាំងតង់ស៊ីតេប្រាំពីរកម្រិតរបស់តៃវ៉ាន់ ដែលវាស់ស្ទង់ពីកម្រិតនៃការរញ្ជួយដីខ្លាំងនៅទីតាំងផ្សេងៗគ្នា។

អ្នកស្រុកនៅទីក្រុងTaipei, New Taipei, Taoyuan, Taichung, Hsinchu County និង Nantou County ក៏បានរាយការណ៍ពីការរងគ្រោះរញ្ជួយដីកម្រិត ២ ផងដែរ។

គួរបញ្ជាក់ថាកោះតៃវ៉ាន់ ដែលស្ថិតនៅតាមបណ្តោយមហាសមុទ្រប៉ាស៊ីហ្វិក «Ring of Fire» មានការរញ្ជួយដីជាញឹកញាប់។ អាជ្ញាធរតៃវ៉ាន់ នឹងបន្តតាមដានស្ថានការណ៍នេះ ប៉ុន្តែការវាយតម្លៃដំបូងមិនបានបង្ហាញពីការគំរាមកំហែងនៃរលកយក្សស៊ូណាមិ និងគ្មានការរំខានដល់សកម្មភាពប្រចាំថ្ងៃឡើយ៕

អត្ថបទ៖ ប៊ុន សុភាព