សោកនាដកម្ម​រញ្ជួយ​ដី នៅ​ហ្វីលីពីន!​ មនុស្ស​ស្លាប់ ​កើនដល់​ ​៣៥​នាក់ ​និង​របួស ១៣៤នាក់

ប្រទេសហ្វីលីពីន កំពុងសោកសៅ ព្រោះតែសោកនាដកម្មគ្រោះរញ្ជួយដីដ៏សាហាវ កម្រិត ៧.៨រ៉ិចទ័រ ខណៈគិតត្រឹមព្រឹកថ្ងៃអង្គារ ទី៩ ខែមិថុនា ឆ្នាំ២០២៦ តួលេខមនុស្សស្លាប់ បានកើនដល់ ៣៥នាក់, របួស ១៣៤នាក់ និងប្រមាណ ១ ០០០គ្រួសារ ត្រូវជម្លៀសខ្លួន។

តាមការផ្សាយរបស់ BBC, គ្រោះរញ្ជួយដីកម្រិតធ្ងន់នេះ វាយប្រហារឆ្នេរសមុទ្រនៃកោះ Mindanao ភាគខាងត្បូងប្រទេសហ្វីលីពីន នៅម៉ោង ៧:៣៧នាទីព្រឹក ថ្ងៃចន្ទ បណ្តាលឲ្យរង្គើ ឈានដល់ការបាក់រលំអគារ និងសាលារៀន ទៀតផង។

អ្វីដែលកាន់តែសង្វេគ គឺថា តាមរយៈវីដេអូ ដែលចែកចាយពាសពេញបណ្តាញសង្គម គេឃើញកុមារសិស្សសាលាជាច្រើននាក់ ស្រែកយំយ៉ាងទ្រហឹង នៅសាលារៀន ពេលរញ្ជួយដីវាយប្រហារ។

យោងតាមការិយាល័យការពារស៊ីវិលហ្វីលីពីន (OCD), មនុស្ស ៣៥នាក់ ត្រូវបាត់បង់ជីវិត ក្នុងនោះមាន ៣២នាក់ស្ថិតនៅតំបន់ Soccsksargen និង ៤នាក់ទៀតនៅ Davao។

ទោះបីជាយ៉ាងណាក៏ដោយ OCD ព្រមានថា តួលេខមនុស្សស្លាប់និងរបួស អាចកើនលើសនេះទៀត ព្រោះមានមនុស្សមួយចំនួនទៀត កំពុងបាត់ខ្លួននៅឡើយ។

សូមជម្រាបថា ហ្វីលីពីន ឧស្សាហ៍កើតរញ្ជួយដីណាស់ ព្រោះប្រទេសនេះ មានទីតាំងស្ថិតនៅលើ ខ្សែក្រវាត់ភ្នំភ្លើងប៉ាស៊ីហ្វិក (Pacific Ring of Fire) ដែលជាតំបន់មួយក្នុងចំណោមតំបន់ មានសកម្មភាពរញ្ជួយដីខ្លាំងបំផុតនៅលើផែនដី។ ផ្លាកតិចតូនិចសំខាន់ៗជាច្រើន បានជួបគ្នានៅទីនេះ រួមមាន ផ្លាកសមុទ្រហ្វីលីពីន ផ្លាកអឺរ៉ាស៊ី និងផ្លាកប៉ាស៊ីហ្វិក។

ម្យ៉ាងនៅហ្វីលីពីន មានតំបន់ស្នាមប្រេះ Philippine Fault Zone និងស្នាមប្រេះសកម្មតូចៗជាច្រើនទៀត លាតសន្ធឹងឆ្លងកាត់កោះនានា ហើយក៏មានតំបន់ Subduction ដែលជាកន្លែងផ្លាកមួយលិចចុះក្រោមផ្លាកមួយទៀត ព័ទ្ធជុំវិញប្រទេសផងដែរ បង្កើតឲ្យមានការរញ្ជួយដីខ្លាំងឥតឈប់ឈរ។

ដោយសារអន្តរកម្មនៃផ្លាកទាំងនេះហើយ ទើបការរញ្ជួយដីទាំងជម្រៅរាក់ និងជ្រៅ កើតឡើងជាញឹកញាប់។ ច្បាស់ណាស់ ការរញ្ជួយដីជម្រៅរាក់ នឹងការបំផ្លិចបំផ្លាញធំធេង ដោយសារតែវាបញ្ចេញថាមពលនៅជិតតំបន់ដែលមានមនុស្សរស់នៅ។

មិនត្រឹមប៉ុណ្ណឹង ហ្វីលីពីនក៏ប្រឈមនឹងហានិភ័យ នៃការរញ្ជួយដីដែលអាចបង្កឲ្យមាន រលកយក្សស៊ូណាមិ ផងដែរ ជាពិសេសនៅតាមតំបន់ Subduction ឆ្នេរសមុទ្រ៕

អត្ថបទ៖ សុខ សុវណ្ណ