ត្រាំ បានទៅដល់ទីក្រុងតូក្យូ ត្រៀមជួបព្រះចៅអធិរាជជប៉ុន

ប្រធានាធិបតីអាមេរិក ដូណាល់ ត្រាំ បានទៅដល់ទីក្រុងតូក្យូ ប្រទេសជប៉ុនហើយ ដែលជាកន្លែងឈប់ទីពីររបស់លោកក្នុងដំណើរទស្សនកិច្ចបីប្រទេសនៅអាស៊ី។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី២៧ខែតុលា។

ក្រោយចេញកិច្ចពីកិច្ចប្រជុំកំពូលអាស៊ាននៅប្រទេសម៉ាឡេស៊ី យន្តហោះ Air Force One របស់ ត្រាំ ទៅដល់អាកាសយានដ្ឋាន Haneda របស់ទីក្រុងតូក្យូ នៅម៉ោង ៥ ល្ងាច (ម៉ោងក្នុងស្រុក) នៅថ្ងៃចន្ទនេះ។

មុនពេលចុះចត លោក ត្រាំ បានបង្ហោះនៅក្នុង Truth Social ថា «លោកទន្ទឹងរង់ចាំជួបព្រះចៅអធិរាជ!»។ លោកត្រូវបានគេរំពឹងថានឹងជួបព្រះចៅអធិរាជ Naruhito ដែលជាព្រះមហាក្សត្ររបស់ប្រទេសជប៉ុនចាប់តាំងពីឆ្នាំ ២០១៩ ឆាប់ៗនេះ។ លោកក៏នឹងជួបជាមួយលោកស្រី Sanae Takaichi នាយករដ្ឋមន្រ្តីជប៉ុនថ្មី និងជាអ្នកគាំទ្រអតីតនាយករដ្ឋមន្ត្រី Shinzo Abe ដែលបានក្លាយជានាយករដ្ឋមន្ត្រីស្ត្រីដំបូងរបស់ប្រទេសជប៉ុនក្នុងខែនេះ។

បន្ទាប់ពីលោក ត្រាំ បានដើរចេញពីយន្តហោះ Air Force One ពេលមកដល់ទីក្រុងតូក្យូ លោកបានចាប់ដៃជាមួយមន្ត្រីអាមេរិក និងជប៉ុនមួយចំនួនដែលកំពុងរង់ចាំនៅលើដី រួមមានលេខាធិការគណៈរដ្ឋមន្ត្រីជប៉ុន ឯកអគ្គរដ្ឋទូតអាមេរិកប្រចាំប្រទេសជប៉ុន និងមេបញ្ជាការកងកម្លាំងអាមេរិកប្រចាំប្រទេសជប៉ុន។ បន្ទាប់មក លោក ត្រាំ បានឡើងលើឧទ្ធម្ភាគចក្រប្រធានាធិបតី Marine One ហើយបានចាកចេញពីអាកាសយានដ្ឋានទៅកាន់ព្រះបរមរាជវាំងទីក្រុងតូក្យូ ដែលត្រូវចំណាយពេលប្រហែល ១០ នាទីទៀត។

គួរបញ្ជាក់ថា លោក ត្រាំ ត្រូវបានគេរំពឹងថានឹងនិយាយអំពីផែនការរបស់ប្រទេសជប៉ុនក្នុងការវិនិយោគចំនួន ៥៥០ ពាន់លានដុល្លារនៅសហរដ្ឋអាមេរិក។ ក្នុងអំឡុងពេលនៃដំណើរទស្សនកិច្ចរបស់លោក លោកនឹងត្រូវជួបជាមួយព្រះចៅអធិរាជជប៉ុន ទស្សនាកងទ័ពអាមេរិកដែលឈរជើងនៅក្នុងប្រទេសជប៉ុន និងជួបជាមួយថ្នាក់ដឹកនាំធុរកិច្ចជប៉ុនផងដែរ៕

អត្ថបទ៖ ប៊ុន សុភាព