ស៊ីរីច្រានចោលសំណើ​លោកត្រាំ ដែល​ឲ្យ​ផ្សះផ្សាទំនាក់ទំនង​ជាមួយ​អ៊ីស្រាអែល​

ប្រធានាធិបតីស៊ីរី​លោក Ahmed al-Sharaa បាន​បញ្ជាក់​ពី​ជំហរ​របស់​ខ្លួន​ថា ទីក្រុងដាម៉ាសនឹងមិនចូលរួមកិច្ចចរចាដោយផ្ទាល់ជាមួយអ៊ីស្រាអែលនៅពេលនេះទេ ដោយលើកឡើងពីការបន្ត​លុកលុយ​របស់អ៊ីស្រាអែលលើតំបន់ Golan Heights ទោះបីជាប្រធានាធិបតីអាមេរិកលោក ដូណាល់​ ត្រាំ ព្យាយាម​សម្របសម្រួល​គំនិតផ្តួចផ្តើម​កិច្ចព្រមព្រៀង​ «Abraham» របស់គាត់ក៏ដោយ។

នៅក្នុងបទសម្ភាសន៍ជាមួយ Fox News កាល​ពី​ថ្ងៃ​ចន្ទ​ទី​១០​ខែ​វិច្ឆិកា​ឆ្នាំ​២០២៥ លោក Shara បាន​​រៀបរាប់​​ថា «ស្ថានភាពនៅក្នុងប្រទេសស៊ីរីគឺខុសពីប្រទេសដែលបានចុះហត្ថលេខាលើកិច្ចព្រមព្រៀង Abraham។ ស៊ីរីមាន​ព្រំដែន​ជាប់​ជាមួយ​អ៊ីស្រាអែល ហើយ​អ៊ីស្រាអែលកាន់កាប់តំបន់ Golan Heights តាំងពីឆ្នាំ​១៩៦៧។ យើងនឹងមិនចូលទៅក្នុងការចរចាដោយផ្ទាល់នៅពេលនេះទេ។ ប្រហែលជារដ្ឋបាលសហរដ្ឋអាមេរិកជាមួយប្រធានាធិបតីត្រាំ​ នឹងជួយយើង​ឲ្យ​​ឈានដល់ការចរចាបែបនេះ»។

កិច្ចព្រមព្រៀង Abraham ដែលបានចាប់ផ្តើមក្នុងអំឡុងពេលអាណត្តិដំបូងរបស់លោក​ត្រាំ​ មាន​គោល​បំណង​​ផ្សះផ្សា​ទំនាក់ទំនង​រវាងអ៊ីស្រាអែល និងរដ្ឋអារ៉ាប់មួយចំនួន រួមទាំង បារ៉ែន ម៉ារ៉ុក ស៊ូដង់ និងអារ៉ាប់រួម។ កាហ្សាក់ស្ថានបានក្លាយជាប្រទេសចុងក្រោយគេ ដែលបានចូលរួមក្នុងកិច្ចព្រមព្រៀងកាលពីសប្តាហ៍មុន។

លោកត្រាំ​ បានបង្ហាញក្តីសង្ឃឹមថា នៅទីបំផុតស៊ីរី និងអារ៉ាប៊ីសាអូឌីត ក៏​អាចចូលរួមក្នុងកិច្ចព្រមព្រៀងនេះ​ផង​ដែរ។

នៅពេលសួរអំពីវត្តមានយោធាអាមេរិកនៅក្នុងប្រទេសស៊ីរី និងការប្រយុទ្ធប្រឆាំងនឹងក្រុម ISIS លោក Sharaa បាន​ប្រាប់​ថា កងកម្លាំងអាមេរិកគួរតែសម្របសម្រួលប្រតិបត្តិការរបស់ពួកគេជាមួយទីក្រុង​ដាម៉ាស។ លោក​បាន​និយាយ​ថា​ «​យើង​ត្រូវ​ពិភាក្សា​អំពី​បញ្ហា​ទាំងនេះ ហើយ​ឈាន​ដល់​កិច្ចព្រមព្រៀង​មួយ​អំពី​ក្រុម ISIS»។

សូម​ជម្រាប​ថា ក្រោយ​កិច្ចប្រជុំទល់មុខគ្នាជាមួយប្រធានាធិបតីស៊ីរីដែលជាដំណើរទស្សនកិច្ចលើកដំបូងរបស់ប្រទេស​នេះ​ទៅកាន់សេតវិមានក្នុងរយៈពេលជិត​៨០​ឆ្នាំ លោក​ត្រាំ​បាននិយាយ​ថា រដ្ឋាភិបាល​ក្រុង​វ៉ាស៊ីនតោន​នឹង«ធ្វើអ្វីៗគ្រប់យ៉ាង» ដើម្បីធ្វើ​ឲ្យ​ប្រទេសស៊ីរី«ទទួលបានជោគជ័យ»។ លោកត្រាំ​បានសរសើរ​លោក​ Sharaa ថាជា«មេដឹកនាំដ៏រឹងមាំ» ដែល«កំពុងព្យាយាមកសាងប្រទេសរបស់គាត់ឡើងវិញបន្ទាប់ពីអតីតកាលដ៏លំបាក»។ មេដឹកនាំទាំងពីរបានពិភាក្សាអំពីការងើបឡើងវិញរបស់ប្រទេសស៊ីរី បន្ទាប់ពីការបញ្ចប់នៃការគ្រប់គ្រងរយៈពេលជាច្រើនទសវត្សរ៍របស់គ្រួសារ Assad ក៏ដូចជាកិច្ចខិតខំប្រឹងប្រែងរបស់សហរដ្ឋអាមេរិក ដើម្បីដកទណ្ឌកម្មដែលនៅសេសសល់ និងធ្វើសមាហរណកម្មទីក្រុង​ដាម៉ាស​ឡើងវិញទៅក្នុងផ្នែកការទូតអន្តរជាតិ៕

ប្រែសម្រួល៖ ឈាង