មនុស្សស្លាប់ជិត ១ ០០០នាក់ ដោយសារគ្រោះធម្មជាតិដ៏សាហាវនៅ ឥណ្ឌូណេស៊ី

ស្ថានភាពដ៏ធ្ងន់ធ្ងរនៃគ្រោះធម្មជាតិនៅប្រទេសឥណ្ឌូណេស៊ី បានបង្កទុក្ខលំបាកខ្លាំងណាស់ដល់ប្រជាជននៅលើកោះស៊ូម៉ាត្រា ដោយគិតត្រឹមព្រឹកថ្ងៃអាទិត្យទី៧ខែធ្នូឆ្នាំ២០២៥ តួលេខមនុស្សស្លាប់បានកើនដល់ជិត១ ០០០នាក់ហើយ ខណៈអ្នកខ្លះត្រូវអត់ឃ្លាននិងវេទនា។

តាមការផ្សាយរបស់ The Star, ភ្នាក់ងារគ្រប់គ្រងគ្រោះមហន្តរាយឥណ្ឌូណេស៊ីបានបញ្ជាក់ពីការស្លាប់មនុស្ស៩០៨នាក់ និង៤១០នាក់ទៀត បាត់ខ្លួន។

ខេត្តដែលរងគ្រោះខ្លាំងជាងគេគឺ Aceh និង North Sumatra ដោយនៅទីនោះ ទឹកជំនន់បានវាយប្រហារកម្ទេចផ្ទះសម្បែង កាត់ផ្តាច់ផ្លូវថ្នល់ ស្ពាននិងចរន្តអគ្គិសនី។

សូមជម្រាបថា ឥណ្ឌូណេស៊ី រងការវាយប្រហារដោយគ្រោះមហន្តរាយធម្មជាតិដ៏ធ្ងន់ធ្ងរ ជាពិសេសនៅកោះ ស៊ូម៉ាត្រា ដែលបណ្តាលមកពីឥទ្ធិពលនៃព្យុះស៊ីក្លូន Senyar និងភ្លៀងធ្លាក់ខ្លាំងមិនធ្លាប់មានចាប់តាំងពីចុងខែវិច្ឆិកា ដល់ដើមខែធ្នូ។

មិនមែនតែឥណ្ឌូណេស៊ីទេ ប៉ុន្មានសប្តាហ៍ចុងក្រោយនេះ ប្រទេសស្រីលង្កា ម៉ាឡេស៊ី ថៃ និងវៀតណាម ក៏ជួបគ្រោះមហន្តរាយធម្មជាតិដែរ ដោយបើសរុបចូលគ្នាទៅ មានមនុស្សស្លាប់ជាង ១ ៧៩០នាក់៕

អត្ថបទ៖ សុខ សុវណ្ណ