កងទ័ពការ៉ែន ប្រកាសវាយប្រហារកងកម្លាំង​មីយ៉ាន់ម៉ា​ នៅថ្ងៃបោះឆ្នោត និងគំរាមបិទច្រកព្រំដែន ជាមួយថៃ

មន្ត្រីជាន់នៃកងទ័ពការ៉ែន បានព្រមានថា ពួកគេនឹងបើកការវាយប្រហារលើកងកម្លាំងរដ្ឋាភិបាលក្នុងរដ្ឋការ៉ែន នៅថ្ងៃបោះឆ្នោតថ្ងៃទី២៨ខែធ្នូខាងមុខនេះ ហើយប្រាប់ឲ្យប្រជាជននៅឲ្យឆ្ងាយពីការិយាល័យបោះឆ្នោត។ មិនត្រឹមប៉ុណ្ណឹង កងទ័ពការ៉ែន ថែមទាំងគំរាមបិទច្រកព្រំដែនមីយ៉ាន់ម៉ា-ថៃទៀតផង ធ្វើឲ្យពលរដ្ឋថៃ នៅក្នុងខេត្ត Mae Hong Son កំពុងភ័យខ្លួន ខ្លាចការប្រយុទ្ធរាលដាលចូលដីថៃ។

ក្នុងសេចក្តីប្រកាសចុះថ្ងៃទី២២ខែធ្នូឆ្នាំ២០២៥ មន្ត្រីជាន់ខ្ពស់កងទ័ពការ៉ែន ព្រមានថា សូមសាធារណជននៅឲ្យឆ្ងាយពីការិយាល័យបោះឆ្នោត ដែលរៀបចំឡើងដោយរដ្ឋាភិបាលមីយ៉ាន់ម៉ាក្នុងរដ្ឋនេះ។

មិនត្រឹមប៉ុណ្ណឹង បើតាមការផ្សាយរបស់ Khaosod, កងទ័ពការ៉ែន ក៏នឹងបិទព្រំដែនជាប់ប្រទេសថៃផងដែរ នៅថ្ងៃទី២៨ខែធ្នូ ដែលនេះបង្ហាញថា ថ្ងៃនោះច្បាស់ជានឹងមានការផ្ទុះអាវុធ ហើយអ្វីដែលសំខាន់ ពលរដ្ឋខាងថៃ នៅជាប់ព្រំដែននោះ ក៏កំពុងភ័យខ្លួនដែរ ខ្លាចគ្រាប់ហោះធ្លាយចូលដីថៃ ជាបន្តទៀត។

សូមជម្រាបជាថ្មី ការបោះឆ្នោតនេះ ត្រូវបានអង្គការសហប្រជាជាតិ មើលឃើញថា ធ្វើឡើងក្រោមការភ័យខ្លាច និងគាបសង្កត់ ហើយព្រមានថា ដំណើរការនេះប្រឈមនឹងការធ្វើ​ឲ្យ​អស្ថិរភាពកាន់តែខ្លាំង ជំនួស​ឲ្យ​ការឈានទៅរកលទ្ធិប្រជាធិបតេយ្យ។

លោក Jeremy Laurence អ្នកនាំពាក្យការិយាល័យសិទ្ធិមនុស្សអង្គការសហប្រជាជាតិ (OHCHR) បាន​លើក​ឡើង​ថា ការបោះឆ្នោតត្រូវបាន​រំពឹង​ថា​នឹងចាប់ផ្តើម ក្នុងអ្វីដែលលោកហៅថាជាសកម្មភាពដែលគ្រប់គ្រងដោយយោធា ការគំរាមកំហែង អំពើហិង្សា និងការបង្ក្រាបជាប្រព័ន្ធចំពោះការចូលរួមផ្នែកនយោបាយ។

លោកអះអាងថា គណបក្សនយោបាយសំខាន់ៗត្រូវបានហាមឃាត់មិន​ឲ្យ​ចូលរួម ហើយមនុស្សជាង៣០ ០០០នាក់ ដែលជាគូប្រជែងនយោបាយ រួមទាំងសមាជិកសភាក្រុមអ្នកជាប់ឆ្នោត និងសមាជិករដ្ឋាភិបាលស៊ីវិលដែលត្រូវបានទម្លាក់ បានស្ថិតក្នុងការឃុំខ្លួនចាប់តាំងពីរដ្ឋប្រហារឆ្នាំ២០២១មក៕

អត្ថបទ៖ សុខ សុវណ្ណ