ព័ត៌មានអន្ដរជាតិ

ក្រុមប្រឹក្សាសន្តិសុខថៃបញ្ជូនសារទៅម៉ាឡេស៊ី ឲ្យប្រាប់ក្រុមរណសិរ្យបដិវត្តន៍ជាតិ (BRN) រឿងបំផ្ទុះគ្រាប់បែក

បានផុស

៦ ខែ មុន

នៅ

ថ្ងៃចន្ទ ១២ មករា ២០២៦

ដោយ

ក្រុមប្រឹក្សាសន្តិសុខជាតិរបស់ប្រទេសថៃ បានបញ្ជូនសារទៅកាន់ម៉ាឡេស៊ីឲ្យប្រាប់ក្រុមទាមទារបំបែករដ្ឋនៅភាគខាងត្បូងប្រទេសថៃ ដោយអះអាងថា រដ្ឋាភិបាលថៃចង់បានសន្តិភាពតាមរយៈការចរចា បន្ទាប់ពីការបំផ្ទុះគ្រាប់បែកចំនួន១១កន្លែង នៅខេត្តចំនួន៣នៅភាគខាងត្បូងប្រទេសថៃកាលថ្ងៃទី១១ខែមករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានថៃ Thai Enquirer ផ្សព្វផ្សាយលិខិតរបស់ក្រុមប្រឹក្សាសន្តិសុខជាតិថៃ (NSC) ដោយក្រុមប្រឹក្សានេះ បានប្រាប់ទៅក្រុមចលនារណសិរ្យបដិវត្តន៍ជាតិដែលគេស្គាល់ថា«Barisan Revolusi Nasional (BRN)» ដែលត្រូវគេជឿថា បានធ្វើសកម្មភាពបំផ្ទុះគ្រាប់បែកនៅភាគខាងត្បូងប្រទេសថៃ ក្នុងខេត្តណារ៉ាធីវ៉ាត់ ខេត្តផាត់តានី និងខេត្តយ៉ាឡា។

តាមការចេញផ្សាយនោះ ក្រុមប្រឹក្សាសន្តិសុខជាតិថៃ បានផ្ញើសារទៅកាន់ក្រុមរណសិរ្យ BRN តាមរយៈអ្នកសម្របសម្រួលម៉ាឡេស៊ី ដោយបញ្ជាក់ពីការប្តេជ្ញាចិត្តរបស់ចំពោះដំណោះស្រាយសន្តិភាពតាមរយៈការចរចា ដោយក្រុមប្រឹក្សាសន្តិសុខថៃនោះ បានអះអាងថា ការបញ្ជូនសារទៅនោះជាផ្នែកនៃដំណើរការសន្តិភាព ដោយមានគោលបំណងស្ថាបនាសន្តិភាពជានិរន្តរ និង ផ្តោតលើមនុស្ស។

ក្រុមប្រឹក្សាសន្តិសុខជាតិថៃដែលដឹកនាំដោយ នាយករដ្ឋមន្ត្រីថៃ លោក អានុទីន ឆានវីរៈគុល បានលើកឡើងនៅក្នុងលិខិតដែលផ្សព្វផ្សាយដោយសារព័ត៌មានថៃនោះថា រដ្ឋាភិបាលថៃមិនទទួលយកនូវអំពើហិង្សា បន្ទាប់ពីការរៀបចំការវាយប្រហារដោយគ្រាប់បែកនៅតាមស្ថានីយប្រេងសាំងចំនួន១១កន្លែងស្ថិតនៅខេត្តតាមតំបន់ព្រំដែនភាគខាងត្បូងប្រទេសកាលថ្ងៃទី១១ខែមករា។

ក្រុមប្រឹក្សាសន្តិសុខជាតិ (NSC) បានថ្កោលទោសការវាយប្រហារទាំងនេះ ដោយនិយាយថា ពួកគេបានធ្វើឱ្យប៉ះពាល់ដល់សុវត្ថិភាពសាធារណៈ រំខានដល់ជីវិតប្រចាំថ្ងៃ និងធ្វើឱ្យប៉ះពាល់ដល់ការរួមរស់ដោយសន្តិភាពនៅក្នុងតំបន់។ សេចក្តីថ្លែងការណ៍នោះបានសង្កត់ធ្ងន់ថា អំពើហិង្សាបែបនេះមិនអាចប្រើដើម្បីធ្វើឱ្យការទាមទារ ឬទាមទារការតំណាងសហគមន៍ក្នុងតំបន់ស្របច្បាប់បានទេ។

ក្នុងការវាយប្រហារនោះ មានមនុស្សយ៉ាងហោចណាស់៤នាក់រងរបួស ហើយខេត្តណារ៉ាធីវ៉ាត់ បានប្រកាសដាក់ចេញបម្រាមគោចរក្នុងរាត្រីថ្ងៃទី១១ និងបានទម្លាក់ចោលបម្រាមគោចរនោះវិញនៅថ្ងៃបន្ទាប់ដោយអះអាងថា ស្ថានភាពបានវិលទៅរកស្ថិរភាពវិញ។

ទោះបីមានការចោទប្រកាន់យ៉ាងនេះក៏ដោយ រហូតមកដល់ពេលនេះនៅមិនទាន់មានឃើញការឆ្លើយតបពីក្រុមចលនាBRN នៅឡើយទេ៕

រ៉ាន់ រើយ