អានុទីន បានត្រឹមប្រាប់ទៅមីយ៉ាន់ម៉ាថា លើកក្រោយ កុំឲ្យការប្រយុទ្ធគ្នា ឆ្លងចូលដីថៃទៀត

ក្រោយយន្តហោះចម្បាំងមីយ៉ាន់ម៉ា ទម្លាក់គ្រាប់ខ្ទាតចូលដីថៃ បង្កការភ័យស្លន់ស្លោនិងជម្លៀសពលរដ្ឋជាបន្ទាន់ ពេលនេះនាយករដ្ឋមន្ត្រី អានុទីន ឆានវីរៈគុល បានចេញមុខប្រាប់ទៅភាគីមីយ៉ាន់ម៉ាថា ការប្រយុទ្ធគ្នានៅទីនោះ មិនត្រូវឲ្យរាលដាលឆ្លងចូលក្នុងទឹកដីថៃ ទៀតទេ។

ថ្លែងនៅក្រសួងមហាផ្ទៃ នាថ្ងៃពុធទី២២ខែមេសាឆ្នាំ២០២៦និងផ្សាយដោយ Khaosod, នាយករដ្ឋមន្ត្រីរូបនេះនិយាយថា លោកទទួលយកការបកស្រាយរបស់មីយ៉ាន់ម៉ាថា ការប្រយុទ្ធគ្នាគឺជារឿងក្នុងប្រទេសនោះ ហើយគ្មានចេតនាបំពានចូលដីថៃទេ។

ទោះបីជាយ៉ាងណាក៏ដោយ អានុទីន បានត្រឹមប្រាប់ទៅភាគីមីយ៉ាន់ម៉ាប៉ុណ្ណោះថា លើកក្រោយការប្រយុទ្ធគ្នា មិនត្រូវឲ្យប៉ះពាល់ដល់ទឹកដីរបស់ថៃទេ។

កាលពីដើមសប្តាហ៍នេះ យន្តហោះចម្បាំងរបស់កងទ័ពអាកាសមីយ៉ាន់ម៉ា បានបើកការវាយប្រហារតាមអាកាសយ៉ាង​ខ្លាំងក្លា​ទៅលើមន្ទីរពេទ្យមួយកន្លែងរបស់ក្រុមឧទ្ទាមការ៉ែន (KNU)។

ក្នុងប្រតិបត្តិការនោះ យន្តហោះចម្បាំងប្រភេទ Yak-130 និង MiG-29 បានទម្លាក់គ្រាប់បែកចំនួន​៩គ្រាប់ តម្រង់ទៅលើតំបន់មន្ទីរពេទ្យ និងសហគមន៍ដែលស្ថិតក្នុងក្រុង Bue So រដ្ឋការ៉ែន ដែលមានចម្ងាយត្រឹមតែ ៥០០ម៉ែត្រប៉ុណ្ណោះពីព្រំដែនប្រទេសថៃ។

ក្នុងនោះ មានគ្រាប់បែកមួយគ្រាប់បានធ្លាក់​ទៅ​លើទឹកដីថៃ ត្រង់តំបន់មាត់ទន្លេ Salween ក្បែរភូមិ Mae Sam Laep ខេត្ត Mae Hong Son។ ការផ្ទុះ​នៃគ្រាប់បែក បានបង្កឲ្យ​មានភាពភ័យស្លន់ស្លោដល់ប្រជាពលរដ្ឋថៃដែលរស់នៅក្បែរនោះយ៉ាងខ្លាំង រហូតធ្វើឲ្យ​ពួកគេនាំគ្នារត់ភៀសខ្លួនដើម្បីសុវត្ថិភាព។

ទោះបែបនេះ ថៃ មិនហ៊ានចាត់វិធានការបកទៅវិញឬឆ្លើយតបអ្វីឡើយ ពោលគឺបានត្រឹមប្រកាសពង្រឹងសន្តិសុខផ្ទៃក្នុងនិងបន្តតាមដានមើលសភាពការណ៍នៃសមរភូមិនៅមីយ៉ាន់ម៉ា ប៉ុណ្ណោះ។

នៅថ្ងៃអង្គារ ក្រសួងមហាផ្ទៃថៃ បានចេញបញ្ជាបន្ទាន់ឲ្យខេត្តចំនួន៤ជាប់ព្រំដែនមីយ៉ាន់ម៉ា ដូចជា Mae Hong Son, Chiang Mai, Chiang Rai និង Tak ត្រូវមានការប្រុងប្រយ័ត្នខ្ពស់និងឃ្លាំមើលសភាពការណ៍២៤ម៉ោងលើ២៤ម៉ោង ស្របពេលសមរភូមិប្រយុទ្ធនៅប្រទេសជិតខាង កំពុងក្តៅគគុក។ 

លើសពីនេះ ក្រសួងចេញបញ្ជាឲ្យអង្គភាពពាក់ព័ន្ធទាំងឡាយត្រូវពង្រឹងវិធានការសន្តិសុខ បង្កើនការល្បាត ពិនិត្យច្រកព្រំដែន និងតាមដានបើសិនជាសង្កេតឃើញបុគ្គលសង្ស័យ ជាពិសេសជនបរទេស៕

អត្ថបទ៖ សុខ សុវណ្ណ