មេដឹកនាំកំពូលអ៊ីរ៉ង់ ភៀសខ្លួនទៅកាន់លេណដ្ឋានក្រោមដី ក្រោយការព្រមានពីអាមេរិក

មេដឹកនាំកំពូលរបស់អ៊ីរ៉ង់ Ayatollah Ali Khamenei ត្រូវបានគេ​រាយការណ៍ថា បានផ្លាស់ទៅរស់នៅក្នុងជម្រកក្រោមដីដ៏រឹងមាំមួយក្នុងទីក្រុងតេហេរ៉ង់ បន្ទាប់ពីមន្ត្រីសន្តិសុខជាន់ខ្ពស់​បានព្រមានអំពីហានិភ័យខ្ពស់នៃការវាយប្រហារយោធាពីសំណាក់សហរដ្ឋអាមេរិក។

យោងតាមរបាយការណ៍ពីប្រព័ន្ធផ្សព្វផ្សាយ Iran International កាលពីថ្ងៃសៅរ៍​ទី​២៤​មករា មេដឹកនាំវ័យ​៨៦​ឆ្នាំរូបនេះ បានផ្លាស់ទៅកាន់បរិវេណដែលមានការការពារយ៉ាងតឹងរ៉ឹង និងមានបណ្តាញផ្លូវរូងក្រោមដីខ្វាត់ខ្វែង។ ក្នុងអំឡុងពេលដែលលោកមិនបង្ហាញខ្លួនជាសាធារណៈនេះ កូនប្រុសទីបីរបស់លោកគឺលោក Masoud Khamenei បានចូលទៅ​គ្រប់គ្រងការងារប្រចាំថ្ងៃរបស់ការិយាល័យមេដឹកនាំកំពូល និងដើរតួជាអ្នកសម្របសម្រួលចម្បងរវាងមេដឹកនាំកំពូល និងស្ថាប័នប្រតិបត្តិរបស់រដ្ឋាភិបាលអ៊ីរ៉ង់។

ការភៀសខ្លួននេះ បានកើតឡើងបន្ទាប់ពីការបង្កើនកម្លាំងជើងទឹកយ៉ាងខ្លាំងរបស់សហរដ្ឋអាមេរិកនៅក្នុងតំបន់។ កាលពីថ្ងៃសុក្រ ប្រធានាធិបតី ដូណាល់ ត្រាំ បានប្រកាសថា «កងនាវាដ៏ធំសម្បើម» ដែលរួមមាននាវាផ្ទុកយន្តហោះ USS Abraham Lincoln និងនាវាបំផ្លាញបំពាក់មីស៊ីលនាំផ្លូវជាច្រើនគ្រឿងទៀត កំពុងធ្វើដំណើរទៅកាន់ដែនទឹកក្បែរប្រទេសអ៊ីរ៉ង់។ ទោះបីជាប្រធានាធិបតី ត្រាំ បានថ្លែងថា លោក «សង្ឃឹមថានឹងមិនចាំបាច់ប្រើប្រាស់កងនាវាទាំងនោះ» ក៏ដោយ ក៏លោកបានចាត់ទុកការដាក់ពង្រាយនេះថាជាការព្រមានចំពោះរបបដឹកនាំអ៊ីរ៉ង់ សម្រាប់​ការបង្រ្កាបយ៉ាងសាហាវលើក្រុមអ្នកតវ៉ាក្នុងស្រុក។ ជាការឆ្លើយតប មេបញ្ជាការយោធាអ៊ីរ៉ង់បានព្រមានថា «ម្រាមដៃរបស់ពួកគេកំពុងស្ថិតនៅលើកៃកាំភ្លើង» ហើយគណៈកម្មការសន្តិសុខជាតិក៏បានប្រកាសថា ការវាយប្រហារណាមួយលើមេដឹកនាំកំពូល នឹងជំរុញ​ឲ្យមានការប្រកាសសង្គ្រាមសាសនា (jihad) ជាផ្លូវការ។

ភាពតានតឹងកាន់តែពុះកញ្ជ្រោលឡើងដោយសារតែភាពចលាចលទូទាំងប្រទេស​អ៊ីរ៉ង់ ដែលបានចាប់ផ្តើមតាំងពីចុងខែធ្នូឆ្នាំ២០២៥។ ក្រុមសិទ្ធិមនុស្ស រួមទាំងអង្គការ HRANA បានរាយការណ៍ថា មនុស្សយ៉ាងហោចណាស់ ៥១៣៧នាក់ត្រូវបានសម្លាប់នៅក្នុងការបង្រ្កាបដោយហិង្សារបស់រដ្ឋលើការតវ៉ា ទោះបីជាការប៉ាន់ស្មានខ្លះបង្ហាញថា ចំនួនអ្នកស្លាប់អាចខ្ពស់ជាងនេះក៏ដោយ។ កាលពីថ្ងៃសុក្រ ក្រសួងរតនាគារអាមេរិកបានដាក់ទណ្ឌកម្មថ្មីលើមន្ត្រីសន្តិសុខអ៊ីរ៉ង់ និងបណ្តាញធនាគារងងឹត ដើម្បីជាការសងសឹកចំពោះការបង្រ្កាបនេះ។ ប្រធានាធិបតីអ៊ីរ៉ង់ លោក Masoud Pezeshkian បានព្រមានថា ការវាយប្រហារណាមួយរបស់អាមេរិក នឹងត្រូវចាត់ទុកថាជា «សង្គ្រាមពេញទំហឹង» ខណៈដែលអ៊ីរ៉ង់នៅតែបន្តផ្តាច់ប្រព័ន្ធអ៊ីនធឺណិតស្ទើរតែទាំងស្រុងដើម្បីទប់ស្កាត់ការតវ៉ា៕

ប្រែសម្រួល៖ ឈាង