ព័ត៌មានអន្ដរជាតិ

ប្រមុខណាតូ អះអាងថា អាមេរិកមិនដកខ្លួនពីសម្ព័ន្ធមិត្ត ដោយការកាត់បន្ថយកងកម្លាំងទេ

បានផុស

២២ វិនាទី មុន

នៅ

ថ្ងៃព្រហស្បតិ៍ ១៨ មិថុនា ២០២៦

ដោយ

ប្រធានអង្គការណាតូ លោក Mark Rutte លើកឡើងនៅថ្ងៃពុធ ថា សហរដ្ឋអាមេរិកមិនបានដកថយពីអឺរ៉ុបដោយប្រកាសកាត់បន្ថយកងកម្លាំងដែលខ្លួនផ្តល់ជូនសម្ព័ន្ធមិត្តនោះទេ។ នេះបើយោងតាមភ្នាក់ងារសារព័ត៌មាន AFP ចេញផ្សាយថ្ងៃទី១៧ ខែមិថុនា ឆ្នាំ២០២៦ ។

នៅមុនកិច្ចប្រជុំរដ្ឋមន្ត្រីការពារជាតិអង្គការណាតូ លោក Rutte ថ្លែងបែបនេះថា៖ « ក្នុងករណីខ្លះ រឿងនេះត្រូវបានគេចាត់ទុកជាបញ្ហាមួយ ខណៈសហរដ្ឋអាមេរិកកំពុងដកខ្លួនចេញពីសម្ព័ន្ធមិត្តរបស់ខ្លួន ប៉ុន្តែនោះមិនមែនជាការពិតទេ»។

លោក Rutte និង លោក ត្រាំ ។រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងវ៉ាស៊ីនតោន បានប្រាប់សម្ព័ន្ធមិត្តថា ខ្លួនកំពុងកាត់បន្ថយជំនួយដល់អង្គការណាតូ ខណៈអាមេរិករំពឹងថា ប្រទេសនៅអឺរ៉ុបនឹងទទួលខុសត្រូវជាចម្បង ចំពោះវិស័យការពារជាតិរបស់ពួកគេដោយខ្លួនឯង។

លោក Rutte និយាយថា៖ « សហរដ្ឋអាមេរិកបានកែសម្រួលការសន្យារបស់ខ្លួន ចំពោះគំរូកម្លាំងរបស់អង្គការណាតូ។ រឿងនេះមិនមែននិយាយអំពីកន្លែងដែលកងកម្លាំង និងទ្រព្យសម្បត្តិស្ថិតនៅបច្ចុប្បន្ននោះទេ ប៉ុន្តែពីអ្នកដែលថា នឹងធ្វើអ្វី ប្រសិនបើផែនការការពារជាតិរបស់យើងត្រូវបានធ្វើឱ្យមានភាពសកម្ម [កម្លាំងឆ្លើយតបរហ័ស]»។

ប្រព័ន្ធផ្សព្វផ្សាយសហរដ្ឋអាមេរិក និងអាល្លឺម៉ង់បានរាយការណ៍ថា ការកាត់បន្ថយនេះរួមមានយន្តហោះចម្បាំង F-16 និង F-15 ចំនួន ១៥០ គ្រឿងរបស់អាមេរិក ដែលកំណត់សម្រាប់អង្គការណាតូ បូករួមទាំងយន្តហោះចាក់ប្រេង យន្តហោះឈ្លបយកការណ៍ យន្តហោះទម្លាក់គ្រាប់បែក និងដ្រូន។

របាយការណ៍ទាំងនោះនិយាយថា នាវាមុជទឹកមួយគ្រឿងដែលអាចបាញ់មីស៊ីលកម្សាន្តក៏កំពុងត្រូវបានដកចេញផងដែរ រួមជាមួយនឹងក្រុមនាវាផ្ទុកយន្តហោះមួយក្នុងចំណោមក្រុមនាវាផ្ទុកយន្តហោះពីរក្រុម។

ចលនារបស់សហរដ្ឋអាមេរិកបង្កឱ្យមានការភ័យខ្លាចថា វាអាចនឹងធ្វើឱ្យអឺរ៉ុបងាយរងគ្រោះចំពោះមុខរុស្ស៊ី ខណៈមានសំណួរជាច្រើនជុំវិញការប្តេជ្ញាចិត្តរបស់ប្រធានាធិបតីអាមេរិក ដូណាល់ ត្រាំ ចំពោះសម្ព័ន្ធមិត្ត។

លោក Rutte និយាយថា៖ « តាមប្រវត្តិសាស្ត្រ គឺអឺរ៉ុបពឹងផ្អែកលើសហរដ្ឋអាមេរិកខ្លាំងពេក។ ឥឡូវនេះ សហរដ្ឋអាមេរិកបានកែសម្រួលការចូលរួមចំណែកដែលបានសន្យារ ហើយសម្ព័ន្ធមិត្តផ្សេងៗបានបោះជំហានទៅមុខ ដើម្បីចូលរួមចំណែកបន្ថែមទៀត»។

ប្រធានអង្គការណាតូរូបនេះនិយាយថា៖ « សហរដ្ឋអាមេរិកបានបញ្ជាក់យ៉ាងច្បាស់ថា ការរារាំងនុយក្លេអ៊ែររបស់សហរដ្ឋអាមេរិកគឺរឹងមាំ»។

គួរបញ្ជាក់ថា ភាពតានតឹងរវាងសហរដ្ឋអាមេរិកនិងអឺរ៉ុប កើតឡើងអំឡុងពេលជម្លោះជាមួយអ៊ីរ៉ង់ ព្រោះ លោក ត្រាំ បានស្នើឱ្យសម្ព័ន្ធមិត្តជួយខ្លួនប្រើកម្លាំងលើសង្រ្គាមជាមួយអ៊ីស្រាអែល តែសម្ព័ន្ធមិត្តបដិសេធ៕

សម្រួល៖ ណឺ មិនា