អាមេរិក៖ ឥណ្ឌាយល់​ព្រម​ទិញប្រេងពីវ៉េណេស៊ុយអេឡាវិញ ដើម្បីបន្ថយចំណូលរបស់រុស្ស៊ី

ប្រធានាធិបតី​អាមេរិក លោក ដូណាល់ ត្រាំ បានប្រកាស​ថា កិច្ចព្រមព្រៀងបឋមមួយត្រូវបានសម្រេច ដើម្បី​ឲ្យ​ប្រទេសឥណ្ឌាចាប់ផ្តើមទិញប្រេងឆៅពីវ៉េណេស៊ុយអេឡា ជំនួស​ឲ្យ​ការនាំចូលពីប្រទេសអ៊ីរ៉ង់ និងរុស្ស៊ី។

យោង​តាម​ការ​ចុះ​ផ្សាយ​របស់​​រ៉យទ័រ​ កាល​ពីថ្ងៃទី​១​ខែ​កុម្ភៈ​ឆ្នាំ​២០២៦ ថ្លែងទៅកាន់ក្រុមអ្នកយកព័ត៌មាននៅលើយន្តហោះ Air Force One លោក​ត្រាំ បានចាត់ទុកការរៀបចំនេះថាជា «គោលការណ៍នៃកិច្ចព្រមព្រៀង» ដែលនឹងបង្វែរប្រភពថាមពលរបស់ឥណ្ឌាចេញពីទីក្រុងតេហេរ៉ង់ និង​ក្រុង​មូស្គូ។ ការវិវត្ត​នេះបានកើតឡើងបន្ទាប់ពីមានការផ្លាស់ប្តូរភូមិសាស្ត្រនយោបាយដ៏សំខាន់មួយ កាលពីថ្ងៃទី៣មករា​២០២៦ ដែល​កងកម្លាំង​អាមេរិកបានចាប់ខ្លួនមេដឹកនាំវ៉េណេស៊ុយអេឡា លោក Nicolás Maduro ដោយ​នាំ​ឲ្យ​មានការបង្កើតរដ្ឋាភិបាលបណ្តោះអាសន្នក្រោមការត្រួតពិនិត្យផ្ទាល់របស់ទីក្រុងវ៉ាស៊ីនតោន។

ការផ្លាស់ប្តូរយុទ្ធសាស្ត្រនេះ គឺជាផ្នែកមួយនៃកិច្ចខិតខំប្រឹងប្រែងរបស់រដ្ឋបាលលោក​ត្រាំ ក្នុងការកាត់ផ្តាច់ចំណូលពីប្រេងដែលកំពុងផ្តល់ហិរញ្ញប្បទានដល់ប្រតិបត្តិការយោធារបស់រុស្ស៊ីក្នុងប្រទេសអ៊ុយក្រែន។ ខណៈពេលដែលទីក្រុងវ៉ាស៊ីនតោនបានដាក់ពន្ធ ២៥% កាលពីខែមីនា​ឆ្នាំ​២០២៥ លើប្រទេសដែលនាំចូលប្រេងពីវ៉េណេស៊ុយអេឡា បច្ចុប្បន្នរដ្ឋបាលនេះបានបង្ហាញសញ្ញានៃការត្រៀមខ្លួនក្នុងការដកទណ្ឌកម្មទាំងនេះសម្រាប់ទីក្រុងដេលីវិញ។ ការបន្ធូរបន្ថយនេះ គឺអាស្រ័យលើការដែលឥណ្ឌាត្រូវកាត់បន្ថយការពឹងផ្អែកលើប្រេងឆៅរបស់រុស្ស៊ី ដែលកាលពីពេលថ្មីៗនេះមានចំនួនដល់ទៅជាង ១,២​លានបារ៉ែលក្នុងមួយថ្ងៃ។ រដ្ឋលេខាធិការក្រសួងរតនាគារ​អាមេរិក លោក Scott Bessent បានបញ្ជាក់ថា ការបន្ធូរបន្ថយពន្ធនេះឆ្លុះបញ្ចាំងពីកិច្ចខិតខំប្រឹងប្រែងបន្តបន្ទាប់របស់ឥណ្ឌាក្នុងការធ្វើពិពិធកម្មប្រភពថាមពលរបស់ខ្លួន។

លោក​ត្រាំ ក៏បានផ្ញើសារអញ្ជើញទៅកាន់ទីក្រុងប៉េកាំងផងដែរ ដោយបញ្ជាក់ថា ប្រទេសចិនត្រូវបានស្វាគមន៍ ក្នុងការចរចាលើកិច្ចព្រមព្រៀងស្រដៀងគ្នានេះសម្រាប់ប្រេងវ៉េណេស៊ុយអេឡា ក្រោមការត្រួតពិនិត្យរបស់​អាមេរិក។ ការផ្តល់ជូននេះ បង្ហាញពីការប៉ុនប៉ងកាន់តែទូលំទូលាយក្នុងការរៀបចំចរន្តថាមពលសកលឡើងវិញ តាមរយៈបណ្តាញដែលគ្រប់គ្រងដោយ​អាមេរិកនៅក្នុងទីក្រុងការ៉ាកាស។ ទោះបីជារដ្ឋបាលឥណ្ឌាមិនទាន់ចេញសេចក្តីថ្លែងការណ៍ផ្លូវការក៏ដោយ នាយករដ្ឋមន្ត្រី Narendra Modi ត្រូវបានរាយការណ៍ថាបានពិភាក្សាជាមួយមេដឹកនាំបណ្តោះអាសន្នរបស់វ៉េណេស៊ុយអេឡា លោកស្រី Delcy Rodríguez កាលពីថ្ងៃសុក្រសប្ដាហ៍​មុន​ ដើម្បីពង្រីកកិច្ចសហប្រតិបត្តិការទ្វេភាគីក្នុងវិស័យថាមពល និងពាណិជ្ជកម្ម៕

ប្រែសម្រួល៖ ឈាង