អាមេរិកព្រមានអ៊ុយក្រែន ក្រោយការវាយប្រហារប៉ះពាល់ផលប្រយោជន៍សេដ្ឋកិច្ចខ្លួន

លោកស្រី Olha Stefanishyna ឯកអគ្គរដ្ឋទូតអ៊ុយក្រែនប្រចាំសហរដ្ឋអាមេរិក បានបញ្ជាក់កាលពីថ្ងៃអង្គារ​ទី​២៤​ខែ​កុម្ភៈ​ថា ក្រសួងការបរទេសអាមេរិកបានផ្ញើសារការទូតផ្លូវការមួយ បន្ទាប់ពីការវាយប្រហាររបស់អ៊ុយក្រែនលើកំពង់ផែ Novorossiysk របស់រុស្ស៊ី បានប៉ះពាល់ដល់ផលប្រយោជន៍អាមេរិកក្នុងប្រទេសកាហ្សាក់ស្ថាន។

យោង​តាម​រ៉យទ័រ លោកស្រីបានលើកឡើងថា ការព្រមាននេះផ្តោតលើការបញ្ឈប់សកម្មភាពដែលប៉ះពាល់ដល់ផលប្រយោជន៍សេដ្ឋកិច្ចអាមេរិក ជាជាងការបង្គាប់​ឲ្យ​បញ្ឈប់ការវាយប្រហារលើហេដ្ឋារចនាសម្ព័ន្ធយោធា ឬថាមពលរបស់រុស្ស៊ី។

ទោះបីជាកិច្ចចរចាសន្តិភាពនៅទីក្រុងហ្សឺណែវមិនទទួលបានលទ្ធផល ហើយសហរដ្ឋអាមេរិកបានកាត់បន្ថយជំនួយយោធាក៏ដោយ ក៏លោកស្រី Stefanishyna បញ្ជាក់ថា អ៊ុយក្រែនមិនមានអារម្មណ៍ថាត្រូវបានបោះបង់ចោលដោយរដ្ឋបាលលោក ដូណាល់ ត្រាំ នោះឡើយ។ លោកស្រីបានថ្លែងអំណរគុណចំពោះការប្តេជ្ញាចិត្តផ្ទាល់ខ្លួនរបស់លោកត្រាំ ក្នុងការបញ្ចប់សង្គ្រាម ហើយលោកស្រីនឹងចូលរួមក្នុងសេចក្តីថ្លែងការណ៍គោលនយោបាយជាតិ​នៅសភាអាមេរិក ដើម្បីស្តាប់ពីផែនការបញ្ចប់ជម្លោះ។

ទន្ទឹមនឹងនេះ លោកស្រីបានជំរុញ​ឲ្យ​សភាអាមេរិកអនុម័តច្បាប់ដាក់ទណ្ឌកម្ម​ឲ្យ​បានទូលំទូលាយប្រឆាំងនឹងក្រុមហ៊ុនប្រេងធំៗរបស់រុស្ស៊ី។ លោកស្រីបានសង្កត់ធ្ងន់ថា អ៊ុយក្រែនកំពុងធ្វើការយ៉ាងជិតស្និទ្ធជាមួយសមាជិកសភាលើច្បាប់នេះ ហើយរំពឹងថានឹងមានការគាំទ្រពីគណបក្សធំៗ​ទាំងពីរ។ លោកស្រីបានបន្ថែមថា កិច្ចសហប្រតិបត្តិការជាមួយទីក្រុងវ៉ាស៊ីនតោននៅតែបន្ត ដើម្បីស្វែងរកវិធីថ្មីៗក្នុងការកាត់ផ្តាច់ចំណូលរបស់រុស្ស៊ីដែលប្រើប្រាស់សម្រាប់ផ្តល់មូលនិធិដល់សង្គ្រាម៕

ប្រែសម្រួល៖ ឈាង