ការបាត់ស្រមោលយន្តហោះចម្បាំងចិននៅ​ជុំវិញ​តៃវ៉ាន់ បង្កជាមន្ទិលខ្លាំង

ស្ថានភាពនៅជុំវិញកោះតៃវ៉ាន់កំពុងស្ថិតក្នុងភាពស្ងប់ស្ងាត់យ៉ាងចម្លែក ដែលមិនធ្លាប់មានពីមុនមក បន្ទាប់ពីសកម្មភាពហោះហើររបស់យន្តហោះចម្បាំងចិនបានផ្អាកស្ទើរ​តែ​ទាំងស្រុងក្នុងរយៈពេល​១០ថ្ងៃចុងក្រោយនេះ។

យោងតាមទិន្នន័យពីទីភ្នាក់ងារសារព័ត៌មាន AFP ចាប់តាំងពីថ្ងៃទី២៨​ខែកុម្ភៈមក គេសង្កេតឃើញមានវត្តមានយន្តហោះចិនត្រឹមតែ​២​គ្រឿងប៉ុណ្ណោះ ដែលហោះក្បែរកោះតៃវ៉ាន់ បើធៀបនឹងឆ្នាំមុនដែលមានរហូតដល់​៨៦​គ្រឿងក្នុងរយៈពេលដូចគ្នា។

ភាពស្ងប់ស្ងាត់ខុសធម្មតានេះ បានបង្កើតជាមន្ទិលសង្ស័យជាច្រើនក្នុងចំណោមអ្នកជំនាញយោធា។ អ្នកវិភាគខ្លះយល់ថា នេះអាចមកពីប្រទេសចិនកំពុងជាប់រវល់នឹងកិច្ចប្រជុំនយោបាយផ្ទៃក្នុង ឬក៏ដោយសារការបោសសម្អាតមន្ត្រីយោធាជាន់ខ្ពស់នាពេលថ្មីៗ។ ប៉ុន្តែអ្វីដែលគួរ​ឲ្យ​ចាប់អារម្មណ៍ជាងនេះទៅទៀតនោះគឺ អ្នកជំនាញខ្លះយល់ថា នេះគឺជាយុទ្ធសាស្ត្របន្ទន់ឥរិយាបថ​របស់ទីក្រុងប៉េកាំង ដើម្បីរៀបចំផ្លូវសម្រាប់ជំនួបដ៏សំខាន់រវាងប្រធានាធិបតីចិន លោក ស៊ី ជីនពីង និងប្រធានាធិបតីអាមេរិក លោក ដូណាល់ ត្រាំ ដែលនឹងត្រូវធ្វើឡើងនៅចុងខែនេះ។

យ៉ាងណា​មិញ មន្ត្រីសន្តិសុខតៃវ៉ាន់បានចេញមុខព្រមានថា ភាពស្ងប់ស្ងាត់នេះអាចជា «ល្បិចបញ្ឆោត» ដើម្បីធ្វើ​ឲ្យសហរដ្ឋអាមេរិកយល់ច្រឡំថា ចិនលែងជាការគំរាមកំហែង ហើយឈានទៅដល់ការកាត់បន្ថយជំនួយយោធាដល់តៃវ៉ាន់។ លើសពីនេះ គេក៏សង្ស័យថា ចិនចង់ប្រើភាពស្ងប់ស្ងាត់នេះ ដើម្បីធ្វើ​ឲ្យ​ប្រជាជនតៃវ៉ាន់បាត់បង់ការគាំទ្រចំពោះគម្រោងបង្កើនកញ្ចប់ថវិកាការពារជាតិចំនួន​៤០​ពាន់លានដុល្លាររបស់ប្រធានាធិបតី Lai Ching-te ផងដែរ។

ទោះបីជាសកម្មភាពតាមអាកាសបានផ្អាកក៏ដោយ ក៏​វត្តមាននាវាចម្បាំងចិននៅតែរក្សាចំនួនថេរដដែល គឺប្រហែល​៦​គ្រឿងក្នុងមួយថ្ងៃ។ មន្ត្រីការពារជាតិតៃវ៉ាន់បានសង្កត់ធ្ងន់ថា ថ្វី​ដ្បិត​​មេឃស្រឡះគ្មានយន្តហោះចម្បាំងចិនក៏ដោយ ប៉ុន្តែ​តៃវ៉ាន់មិនត្រូវធ្វេសប្រហែស ឬទម្លាក់អាវុធជាដាច់ខាត ព្រោះស្ថានការណ៍អាចប្រែប្រួលគ្រប់វិនាទី៕

ប្រែសម្រួល៖ ឈាង