រដ្ឋមន្ត្រីការបរទេសអ៊ីរ៉ង់ ប្រកែក​ថា មិន​បាន​ចរចាជាមួយអាមេរិកទេ ក្រោយ​សង្គ្រាម​ផ្ទុះ​ឡើង

រដ្ឋមន្ត្រីការបរទេសអ៊ីរ៉ង់ លោក Abbas Araqchi បានចេញមុខមកបដិសេធយ៉ាងដាច់អហង្ការ ចំពោះរបាយការណ៍ដែលថា ប្រព័ន្ធទំនាក់ទំនងផ្ទាល់ជាមួយបេសកជនពិសេសអាមេរិក លោក Steve Witkoff ត្រូវបានតភ្ជាប់ឡើងវិញ។

ការចេញមុខមកបកស្រាយនេះ ធ្វើឡើងបន្ទាប់ពីសារព័ត៌មាន Axios និង The Drop Site News បានចុះផ្សាយថា ភាគីទាំងពីរបានផ្ញើសារទាក់ទងគ្នាទៅវិញទៅមក ក្នុងបំណងស្វែងរកដំណោះស្រាយសន្តិភាព។

យោង​តាម​ការ​ចុះ​ផ្សាយ​របស់​រ៉យទ័រ នា​ថ្ងៃទី​១៧​ខែ​មីនា​ឆ្នាំ​២០២៦ លោក Araqchi បានបង្ហោះសារនៅលើបណ្តាញសង្គម X ដោយបញ្ជាក់ថា ការទាក់ទងចុងក្រោយរវាងលោក និងលោក Witkoff គឺបានកើតឡើងតាំងពីមុនពេលអាមេរិក និងអ៊ីស្រាអែល បើកយុទ្ធនាការយោធាប្រឆាំងនឹងអ៊ីរ៉ង់ កាលពីថ្ងៃទី២៨​ខែកុម្ភៈមកម្ល៉េះ។ លោកបានសង្កត់ធ្ងន់ថា «រាល់ការអះអាងដែលផ្ទុយពីនេះ គឺធ្វើឡើងក្នុងគោលបំណងតែមួយគត់ គឺដើម្បីបោកបញ្ឆោតអ្នកជួញដូរប្រេង និងសាធារណជនតែប៉ុណ្ណោះ»។ លោកក៏បានចោទប្រកាន់សហរដ្ឋអាមេរិកចំៗថា ជាអ្នក «សម្លាប់ផ្លូវការទូត» តាមរយៈការបើកការវាយប្រហារយោធានេះ។

ស្ថានការណ៍សង្គ្រាមដ៏រ៉ាំរ៉ៃនេះ បានបណ្តាលឲ្យ​​មានការបាត់បង់ជីវិតយ៉ាងច្រើនសន្ធឹកសន្ធាប់ រួមទាំងការស្លាប់របស់មេដឹកនាំកំពូលអ៊ីរ៉ង់ លោក Ayatollah Ali Khamenei ផងដែរ ដែលវាបានដុតបញ្ឆេះឲ្យអ៊ីរ៉ង់វាយបកវិញយ៉ាងខ្លាំងក្លាទៅលើអ៊ីស្រាអែល និងបណ្តាប្រទេសក្នុងតំបន់ឈូងសមុទ្រដែលផ្តល់មូលដ្ឋានទ័ពឲ្យ​អាមេរិក។

ទោះបីជាមន្ត្រីអាមេរិកបានអះអាងថា លោក Araqchi ជាអ្នកផ្ដើមទាក់ទងទៅមុនក៏ដោយ ក៏​រដ្ឋមន្ត្រីការបរទេសរូបនេះនៅតែរក្សាជំហរថា គ្មានការចរចាណាមួយអាចកើតឡើងបានឡើយ ក្នុងកាលៈទេសៈដែលសង្គ្រាមកំពុងឆាបឆេះបែបនេះ។ ការកើនឡើងនៃជម្លោះនេះ មិនត្រឹមតែបង្កឲ្យមានអសន្តិសុខក្នុងតំបន់ប៉ុណ្ណោះទេ ប៉ុន្តែថែមទាំងបានធ្វើឲ្យតម្លៃប្រេងពិភពលោកហក់ឡើងខ្ពស់ និងបង្កឲ្យមានអស្ថិរភាពទីផ្សារយ៉ាងខ្លាំងផងដែរ៕

ប្រែសម្រួល៖​ ឈាង