ការ​រិះគន់​ដូច​ព្យុះ ក្រោយរដ្ឋបាល​ត្រាំ​ស្នើ​លុយ​២០០​ពាន់លានដុល្លារ សម្រាប់សង្រ្គាមនៅអ៊ីរ៉ង់

គម្រោងចំណាយដ៏មហិមាចំនួន​២០០​ពាន់លានដុល្លារ សម្រាប់ប្រើប្រាស់ក្នុងសង្រ្គាមនៅប្រទេសអ៊ីរ៉ង់ កំពុងតែរងនូវការរិះគន់យ៉ាងចាស់ដៃពីសំណាក់សមាជិកសភា និងប្រជាពលរដ្ឋអាមេរិក បើទោះបីជាគម្រោងនេះមិនទាន់ត្រូវបានដាក់បញ្ជូនទៅដល់រដ្ឋសភាក៏ដោយ។ នេះ​បើ​យោង​តាម​ការ​ចុះ​ផ្សាយ​របស់​ទីភ្នាក់ងារ​ព័ត៌មាន Anadolu។

កាលពីថ្ងៃព្រហស្បតិ៍​ទី​១៩​មីនា​ ប្រធានាធិបតី ដូណាល់ ត្រាំ បានបញ្ជាក់ជាផ្លូវការនូវសំណើថវិកានេះ ដោយលោកបានសង្កត់ធ្ងន់ថា ទឹកប្រាក់នេះនឹងត្រូវយកទៅប្រើប្រាស់សម្រាប់តម្រូវការចាំបាច់នានា ដែលលើសពី​បញ្ហានៅអ៊ីរ៉ង់ទៅទៀត។ ទន្ទឹមនោះ លោក Pete Hegseth រដ្ឋមន្ត្រីក្រសួងការពារជាតិ ក៏បានចេញមុខការពារតួលេខដ៏ខ្ពស់នេះដែរ ដោយលោកបានលើកឡើងយ៉ាងត្រង់ៗថា «វាត្រូវតែចំណាយលុយបែបហ្នឹងហើយ បើចង់កម្ចាត់ពួកមនុស្សអាក្រក់» រួមទាំងការបំពេញបន្ថែមនូវគ្រាប់រំសេវក្នុងឃ្លាំងដែល​ជិតអស់​​ពីឃ្លាំង​ផងដែរ។

យ៉ាង​ណា​មិញ សំឡេងជំទាស់បានបន្លឺឡើងយ៉ាងព្រោងព្រាតនៅវិមានសភា។ ខាងបក្សប្រជាធិបតេយ្យបានវាយប្រហារ​ចំៗ​ទៅ​លើសំណើនេះ ដោយសមាជិកព្រឹទ្ធសភា លោក Chris Murphy បានព្រមានថា ក្នុងខណៈដែលតំបន់មជ្ឈិមបូព៌ាកំពុងឆេះដូចភ្លើង តម្លៃទំនិញ និងការរស់នៅក្នុងស្រុកក៏កំពុងតែហក់ឡើងខ្ពស់គួរ​ឲ្យ​បារម្ភដែរ។ ចំណែកអ្នកស្រី Rashida Tlaib តំណាងរាស្ត្រម្នាក់ទៀត ក៏បានរិះគន់រដ្ឋាភិបាលថា ពូកែរកលុយសម្រាប់សង្រ្គាមដែលមិនចេះចប់មិនចេះហើយ ប៉ុន្តែបែរជាកាត់បន្ថយថវិកាផ្នែកសុខាភិបាលរបស់ពលរដ្ឋទៅវិញ។

សូម្បីតែនៅក្នុងជួរខាងបក្សសាធារណរដ្ឋខ្លួនឯង ក៏មិនទាន់មានសាមគ្គីភាពពេញលេញក្នុងការគាំទ្រគម្រោងនេះដែរ។ បើទោះបីជាប្រធានសភា លោក Mike Johnson បង្ហាញសញ្ញាថាត្រូវតែផ្តល់ថវិកា​ឲ្យ​គ្រប់គ្រាន់សម្រាប់វិស័យការពារជាតិ ប៉ុន្តែសមាជិកបក្សខ្លះដូចជាលោក Pete Stauber បាននិយាយថា អ្វីៗគ្រប់យ៉ាងគឺនៅស្រពេចស្រពិលនៅឡើយ។

ស្ថានភាពនេះកាន់តែតានតឹងខ្លាំង ដោយសារតែវាចំពេលដែលអាមេរិកកំពុងឈានចូលដល់ឆ្នាំបោះឆ្នោត​ពាក់​កណ្ដាល​អាណត្តិ ដែលធ្វើ​ឲ្យ​រឿងចំណាយលើវិស័យយោធាក្លាយជាប្រធានបទនយោបាយដ៏ក្ដៅគគុក។ អ្នករិះគន់ជាច្រើនបានលើកឡើងថា មន្ទីរបញ្ចកោណនៅសល់ថវិកាដែលមិនទាន់ប្រើប្រាស់ដល់ទៅ១៥៣​ពាន់លានដុល្លារឯណោះ ហេតុអ្វីបានជាត្រូវសុំថែមទៀត? ខណៈពេលដែល​ក្រុម​សកម្មជ​ន​បានសម្តែងការខឹងសម្បារយ៉ាងខ្លាំង ដែលរដ្ឋាភិបាលមានលុយរាប់ពាន់លានសម្រាប់សង្រ្គាម និងជំនួយបរទេស ប៉ុន្តែបែរជាកាត់បន្ថយកម្មវិធីសង្គមសម្រាប់ពលរដ្ឋអាមេរិកទៅវិញ។

បច្ចុប្បន្ន ការចរចាលើរឿងនេះមិនទាន់បានចាប់ផ្តើមនៅឡើយទេ ប៉ុន្តែពិភពលោកកំពុងតាមដានមើលថា តើកញ្ចប់ថវិកា២០០​ពាន់លានដុល្លារនេះ នឹងត្រូវបានអនុម័ត ឬត្រូវបក្សប្រឆាំងកាត់បន្ថយចំនួនវិញ៕

ប្រែសម្រួល៖ ឈាង