លោកត្រាំ ថា អ៊ីរ៉ង់ព្រមប្រគល់​អ៊ុយរ៉ាញ៉ូម​ ឲ្យអាមេរិក ដើម្បីដូរ​យក​សន្តិភាព

លោកប្រធានាធិបតី ដូណាល់ ត្រាំ បានប្រកាសដោយភាពជឿជាក់ថា កិច្ចព្រមព្រៀងសន្តិភាពរវាងអាមេរិក និងអ៊ីរ៉ង់ កាន់តែខិតជិតមកដល់មែនទែនហើយ ដោយ​នៅក្នុងជំនួបជាមួយអ្នកសារព័ត៌មាននៅខាងក្រៅសេតវិមាន លោក​បានបង្ហើប​ឲ្យ​ដឹងថា ភាគីអ៊ីរ៉ង់បានយល់ព្រមប្រគល់សារធាតុអ៊ុយរ៉ាញ៉ូមដែលបានចម្រាញ់រួច ឬលោកហៅសាមញ្ញថាជា «ធូលីនុយក្លេអ៊ែរ» មកឲ្យអាមេរិកវិញ។ នេះ​បើ​យោងតាម​ការ​ផ្សាយ​របស់ Washington Post នា​ថ្ងៃទី​១៦​ខែមេសា​ឆ្នាំ​២០២៦។

លោកត្រាំ ជឿជាក់​ថា ភាគរយដែលប្រទេសទាំងពីរនឹងត្រូវរ៉ូវគ្នានោះគឺ​ខ្ពស់ណាស់។ ទោះបីជាលោកប្រធានាធិបតីបង្ហាញភាពសុទិដ្ឋិនិយមបែបនេះក្ដី ប៉ុន្តែលោកមិនទាន់បានបង្ហាញភស្តុតាងលម្អិត ឬបញ្ជាក់ពីលក្ខខណ្ឌច្បាស់លាស់នៅឡើយទេ ហើយខាងភាគីអ៊ី​រ៉ង់ទៀត​សោត​ក៏មិនទាន់មានការឆ្លើយតបជាផ្លូវការជុំវិញការព្រមបោះបង់សារធាតុនុយក្លេអ៊ែរនេះដែរ។ អ្វីដែលលោកត្រាំ នៅតែប្រកាន់ជំហរដាច់ខាតនោះគឺថា រាល់កិច្ចព្រមព្រៀងទាំងអស់ត្រូវតែធានាឲ្យ​បានថា អ៊ីរ៉ង់នឹងមិនអាចមានឱកាសបង្កើតអាវុធនុយក្លេអ៊ែរបានជារៀងរហូត។ លោកថែមទាំងបានបញ្ជាក់ទៀតថា បើការចុះហត្ថលេខាត្រូវធ្វើឡើងនៅប្រទេសប៉ាគីស្ថាន លោកនឹងត្រៀមខ្លួនធ្វើដំណើរទៅទីនោះដោយផ្ទាល់តែម្ដង។

កន្លង​មក គេឃើញថានៅតែមានភាពចម្រូងចម្រាសលើរយៈពេលនៃការផ្អាកកម្មវិធីនុយក្លេអ៊ែរ។ ខាងអាមេរិកចង់ឲ្យ​អ៊ីរ៉ង់ឈប់ចម្រាញ់អ៊ុយរ៉ាញ៉ូមរហូតដល់​២០ឆ្នាំ ប៉ុន្តែអ៊ីរ៉ង់សុំត្រឹមតែ៥​ឆ្នាំប៉ុណ្ណោះ ដែលចំណុចនេះអាមេរិកមិនទាន់យល់ព្រមនៅឡើយ។ យ៉ាង​ណាមិញ អ៊ីរ៉ង់នៅតែអះអាងថា កម្មវិធីរបស់ខ្លួនគឺធ្វើឡើងដើម្បីសន្តិភាព និងថាមពលស៊ីវិលប៉ុណ្ណោះ។ បច្ចុប្បន្ន គេប៉ាន់ស្មានថាអ៊ីរ៉ង់មានសារធាតុអ៊ុយរ៉ាញ៉ូមកម្រិតខ្ពស់ប្រហែល​៤០០​គីឡូក្រាម ដែលជាកម្រិតដែលអាចយកទៅធ្វើជាអាវុធបានយ៉ាងងាយ៕

ប្រែសម្រួល៖​ ឈាង