ណេតាន់យ៉ាហ៊ូ ខកខានឡើងតុលាការ រឿងក្តីពុករលួយនៅនាទីចុងក្រោយ ដោយសារបញ្ហាសន្តិសុខ

នៅ​ថ្ងៃ​ចន្ទ ទី​២៧ ខែមេសា ឆ្នាំ​២០២៦ នេះ​ មានការភ្ញាក់ផ្អើលមួយបានកើតឡើងក្នុងរង្វង់យុត្តិធម៌នៃប្រទេសអ៊ីស្រាអែល នៅពេលដែលការឡើងផ្តល់សក្ខីកម្មរបស់លោក​នាយករដ្ឋមន្ត្រី​ បេនចាមីន ណេតាន់យ៉ាហ៊ូ ត្រូវបានលុបចោលភ្លាមៗ ត្រឹមតែមួយម៉ោងប៉ុណ្ណោះមុន​ការ​ចាប់ផ្តើម។

តាមសេចក្តីរាយការណ៍ពីកាសែត​​ក្នុងស្រុក Yedioth Ahronoth ការសម្រេចចិត្តផ្អាកនេះ គឺធ្វើឡើងតាមសំណើរបស់មេធាវីការពារក្តីរបស់លោក ដោយលើកឡើងពី «ហេតុផលសន្តិសុខ» ជាសំខាន់ តែមិនបានបញ្ជាក់លម្អិតថាជាបញ្ហាអ្វីឲ្យ​ច្បាស់លាស់នោះទេ។

គួររំលឹកផងដែរថា កិច្ចដំណើរការនីតិវិធីតុលាការនៅថ្ងៃចន្ទនេះ ត្រូវបានរៀបចំឡើងបន្ទាប់ពីបានអូសបន្លាយពេលយ៉ាងយូរ ដោយសារតែឥទ្ធិពលនៃសង្គ្រាមរវាងអ៊ីស្រាអែល និងអ៊ីរ៉ង់នាពេលកន្លងមក។ លោក ណេតាន់យ៉ាហ៊ូ កំពុងតែប្រឈមមុខនឹងការចោទប្រកាន់ធ្ងន់ៗចំនួន ៣ករណី រួមមានបទសូកប៉ាន់ បទឆបោក និងការរំលោភលើទំនុកចិត្ត ដែលសំណុំរឿងទាំងនេះត្រូវបានរដ្ឋអាជ្ញាចោទប្រកាន់តាំងពីខែវិច្ឆិកា ឆ្នាំ២០១៩ មកម៉្លេះ។ ក្នុងចំណោមនោះ មានសំណុំរឿងដ៏លេចធ្លោមួយគឺការចោទប្រកាន់ថា លោកបានប្រើអំណាចជួយដល់ក្រុមហ៊ុនទូរគមនាគមន៍ធំមួយ ដើម្បីជាការដោះដូរនឹងការចុះផ្សាយព័ត៌មានក្នុងន័យវិជ្ជមានសម្រាប់រូបលោក។

ក្រៅពីបញ្ហាក្តីក្តាំពុករលួយនៅក្នុងប្រទេសខ្លួនឯង លោកនាយករដ្ឋមន្ត្រីរូបនេះ ក៏កំពុងស្ថិតនៅក្រោមសម្ពាធអន្តរជាតិយ៉ាងខ្លាំងផងដែរ។ កាលពីខែវិច្ឆិកា ឆ្នាំ២០២៤ កន្លងទៅ តុលាការព្រហ្មទណ្ឌអន្តរជាតិ (ICC) បានចេញដីកាចាប់ខ្លួនលោក ក្រោមការចោទប្រកាន់ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ដែលពាក់ព័ន្ធនឹងសកម្មភាពយោធានៅក្នុងតំបន់ហ្គាហ្សាស្ទ្រីប។

ការខកខានមិនបានឡើងតតាំងនៅតុលាការលើកនេះ បានធ្វើឲ្យមហាជន និងអ្នកតាមដាននយោបាយមានការងឿងឆ្ងល់កាន់តែខ្លាំង ចំពោះជោគវាសនានៃប្រព័ន្ធយុត្តិធម៌ និងអនាគតនយោបាយរបស់មេដឹកនាំរូបនេះ។ ខណៈដែលស្ថានការណ៍សន្តិសុខក្នុងតំបន់នៅតែមានភាពមិនប្រាកដប្រជា ការពន្យារពេលតុលាការម្តងហើយម្តងទៀតបែបនេះ កាន់តែធ្វើឲ្យរឿងក្តីដែលអូសបន្លាយអស់ជាច្រើនឆ្នាំមកនេះ កាន់តែមានភាពស្មុគស្មាញ និងពិបាកនឹងរកទីបញ្ចប់ឃើញ៕

ប្រែសម្រួល៖ ឈាង