ព័ត៌មានអន្ដរជាតិ

រុស្ស៊ី រំឭកអំពីអាវុធនុយក្លេអ៊ែរ ជាថ្មីទៀត ខណៈការចរចាសន្តិភាពនៅប្រទាញប្រទង់

បានផុស

២ ខែ មុន

នៅ

ថ្ងៃចន្ទ ១៨ ឧសភា ២០២៦

ដោយ

អ្នកនាំពាក្យវិមានក្រឹមឡាំង លោក Dmitry Peskov លើកឡើងកាលពីថ្ងៃអាទិត្យថា អាវុធនុយក្លេអ៊ែរគឺជាមូលដ្ឋានគ្រឹះនៃសន្តិសុខជាតិរបស់រុស្ស៊ី។ នេះបើយោងតាមប្រព័ន្ធផ្សព្វផ្សាយរុស្ស៊ី Vesti និងចុះផ្សាយបន្តដោយភ្នាក់ងារសារព័ត៌មាន Anadolu នៅថ្ងៃទី១៧ ខែឧសភា ឆ្នាំ២០២៦ ។

លោក Peskov និយាយថា ឃ្លាំងអាវុធនុយក្លេអ៊ែររបស់រុស្ស៊ីបានការពារប្រទេសពីការគំរាមកំហែងនានា។

លោក អះអាងថា៖ « មហាអំណាចនុយក្លេអ៊ែរមិនអាចត្រូវបានគំរាមកំហែងទេ។ ប្រទេសរបស់យើងក៏មិនអាចត្រូវបានគំរាមកំហែងដែរ។ ទាំងនេះជាអ្វីដែលផ្តល់ឱ្យយើងនូវឱកាសដែលមានទំនុកចិត្តយ៉ាងប្រាកដប្រជា ហើយវាគឺជាមូលដ្ឋាននៃការទប់ស្កាត់នុយក្លេអ៊ែរ»។

អ្នកនាំពាក្យវិមានក្រឹមឡាំង លោក Dmitry Peskov ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយលើកឡើងពីការធ្វើអត្ថាធិប្បាយលើទំនាក់ទំនងជាមួយអឺរ៉ុប លោក Peskov និយាយថា ការពិភាក្សាកាន់តែខ្លាំងនៅក្នុងសហភាពអឺរ៉ុបពីការចរចាដែលអាចធ្វើទៅបានជាមួយរុស្ស៊ី គឺជា «ការផ្លាស់ប្តូរដ៏សំខាន់» ហើយវាស្ថិតក្នុងផលប្រយោជន៍របស់ទីក្រុងមូស្គូ។

លោក លើកឡើងថា៖ « ការពិភាក្សាយ៉ាងសកម្មលើប្រធានបទនេះ (ការសន្ទនាជាមួយរុស្ស៊ី) ជាការផ្លាស់ប្តូរឆ្ពោះទៅរកគំនិតល្អមួយជាមួយរុស្ស៊ី។ វាជារឿងល្អ! រុស្ស៊ីមិនទទួលខុសត្រូវ ចំពោះការបែកបាក់ក្នុងការសន្ទនាជាមួយអឺរ៉ុបទេ ហើយក៏ចាប់អារម្មណ៍ក្នុងការកសាងទំនាក់ទំនងឡើងវិញ»។

រៀបរាប់ដល់អ្នកចរចាអឺរ៉ុបជាមួយរុស្ស៊ី លោក Peskov សំដៅលើប្រធានគោលនយោបាយការបរទេសសហភាពអឺរ៉ុប គឺ លោកស្រី Kaja Kallas ដោយនិយាយថា៖ « វាស្ថិតលើផលប្រយោជន៍របស់នាង ក្នុងការមិនធ្វើជាអ្នកចរចាជាមួយរុស្ស៊ី»។

គួរបញ្ជាក់ថា កាលពីដើមសប្តាហ៍នេះ ប្រធានាធិបតីរុស្ស៊ី លោក វ្ល៉ាឌីមៀរ ពូទីន អះអាងថា រុស្ស៊ីបានអភិវឌ្ឍសមត្ថភាពនុយក្លេអ៊ែរដែលគ្មានសមភាគីណាមួយនៅលើពិភពលោកអាចយកឈ្នះ ខណៈទីក្រុងមូស្គូបន្តធ្វើទំនើបកម្មកងកម្លាំងទប់ស្កាត់នុយក្លេអ៊ែរ៕

សម្រួល៖ ណឺ មិនា