មន្ត្រីអ៊ីរ៉ង់ អះអាងថា មេដឹកនាំ​អ៊ីរ៉ង់ Mojtaba Khamenei មិនរងរបួសធ្ងន់ធ្ងរ ដូច​​ពាក្យ​ចចាមអារ៉ាមទេ​​

ទីភ្នាក់ងារសារព័ត៌មាន ISNA របស់អ៊ីរ៉ង់ បានរាយការណ៍​នៅ​​ថ្ងៃច័ន្ទទី១៨ ខែឧសភា ដោយដកស្រង់សម្តីមន្ត្រីក្រសួងសុខាភិបាលម្នាក់ ដែល​អះអាង​ថា «គ្មានអ្វីធ្ងន់ធ្ងរបានកើតឡើង» ចំពោះមេដឹកនាំកំពូលរបស់អ៊ីរ៉ង់ លោក Mojtaba Khamenei នោះទេ នៅពេលដែលលោកត្រូវបានបញ្ជូនទៅកាន់មន្ទីរពេទ្យ បន្ទាប់ពីការផ្ទុះសង្គ្រាមជាមួយសហរដ្ឋអាមេរិក និងអ៊ីស្រាអែល កាលពីថ្ងៃទី ២៨ ខែកុម្ភៈ ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Hossein Kermanpour ប្រធានមជ្ឈមណ្ឌលទំនាក់ទំនងសាធារណៈ និងព័ត៌មាននៃក្រសួងសុខាភិបាល​អ៊ីរ៉ង់​ បានអះអាងថា៖ «របួសទាំងនោះមិនមែនជាប្រភេទរបួសដែលធ្វើឲ្យខូចទម្រង់មុខរបស់មេដឹកនាំកំពូល ឬធ្វើឲ្យលោកធ្លាក់ខ្លួនពិការ ឬមួយក៏ឈានដល់ការកាត់អវយវៈនោះទេ។ ជាក់ស្ដែង របួសទាំងនោះត្រូវបានដេរជាច្រើនថ្នេរ ហើយមួយក្នុងចំណោមកន្លែងដែលគ្រូពេទ្យសម្រេចចិត្តដេរភ្លាមៗគឺជើងរបស់គាត់»។

លោក Mojtaba Khamenei បានក្លាយជាមេដឹកនាំកំពូលរបស់អ៊ីរ៉ង់ បន្ទាប់ពីឪពុករបស់លោក គឺអតីតមេដឹកនាំកំពូល Ali Khamenei ត្រូវបានសម្លាប់នៅក្នុងការវាយប្រហារមួយនៅទីក្រុងតេហេរ៉ង់ កាលពីថ្ងៃដំបូងនៃ​​ការ​ផ្ទុះ​អាវុធ​បង្ក​ឡើង​ដោយសហរដ្ឋអាមេរិក និង អ៊ីស្រាអែល​។

យ៉ាងណាមិញ លោកមិនបានបង្ហាញខ្លួនជាសាធារណៈទេ ចាប់តាំងពីការចាប់ផ្តើមនៃសង្គ្រាម កាលពីថ្ងៃទី ២៨ ខែកុម្ភៈ បន្ទាប់ពីអាមេរិក និងអ៊ីស្រាអែល បានបើកការវាយប្រហារទ្រង់ទ្រាយធំប្រឆាំងនឹងប្រទេសអ៊ីរ៉ង់។

ជម្លោះនេះ បានរីករាលដាលយ៉ាងឆាប់រហ័សទៅជាសង្គ្រាមក្នុងតំបន់ដ៏គ្រោះថ្នាក់បំផុតមួយក្នុងរយៈពេលរាប់ទសវត្សរ៍មកនេះ ដែលបានរំខានដល់ការដឹកជញ្ជូនតាមច្រកសមុទ្រ Hormuz បង្កផលប៉ះពាល់ដល់ទីផ្សារថាមពលសកល និងនាំឲ្យមានការវាយប្រហារដោយកាំជ្រួច និងដ្រូននៅទូទាំងមជ្ឈិមបូព៌ា៕

អត្ថបទ៖ សាង ស្រីល័ក្ខ

អ៊ីរ៉ង់ តែងតាំង លោក Ghalibaf​ ឲ្យមើលខុសត្រូវ លើ​ទំនាក់ទំនងជាមួយ ចិន