ព័ត៌មានអន្ដរជាតិ

មន្រ្តីអាមេរិក៖ អ៊ីរ៉ង់អាចដៅទីតាំងវាយអាមេរិកតាមដែនអាកាសរួចហើយ បើ លោក ត្រាំ ហ៊ានផ្តើមសង្រ្គាមជាថ្មី

បានផុស

២ ខែ មុន

នៅ

ថ្ងៃពុធ ២០ ឧសភា ២០២៦

ដោយ

មេបញ្ជាការយោធាអ៊ីរ៉ង់ប្រហែលជាបានគូសវាសផែនទីគំរូហោះហើររបស់យន្តហោះចម្បាំង និងយន្តហោះទម្លាក់គ្រាប់បែករបស់សហរដ្ឋអាមេរិកលើដែនអាកាសរួចអស់ទៅហើយ ប្រសិនបើប្រធានាធិបតីអាមេរិក លោក ដូណាល់ ត្រាំ សម្រេចចិត្តចាប់ផ្តើមសង្គ្រាមសារជាថ្មីឡើងវិញលើអ៊ីរ៉ង់។ នេះបើយោងតាមមន្ត្រីអាមេរិកម្នាក់ប្រាប់កាសែត The New York Times នៅថ្ងៃទី១៩ ខែឧសភា ឆ្នាំ២០២៦ ។

ស្ថានភាពដែនអាកាសរបស់អ៊ីរ៉ង់ទំនងជាសមាសធាតុសំខាន់មួយ ខណៈ លោក ត្រាំ កំពុងថ្លឹងថ្លែងថាតើត្រូវបន្តការវាយប្រហារលើអ៊ីរ៉ង់ឬអត់។

លោក ត្រាំ និយាយកាលពីថ្ងៃចន្ទថា សហរដ្ឋអាមេរិកនឹងកំណត់ឱ្យបន្តវាយប្រហារអ៊ីរ៉ង់នៅថ្ងៃអង្គារ ប៉ុន្តែការសម្រេចចិត្តមួយនេះផ្អាកទៅវិញសិន ដោយសារតែមានការអំពាវនាវពីប្រទេសក្នុងតំបន់ ដូចជា អារ៉ាប៊ីសាអូឌីត កាតា និងអារ៉ាប់រួម។

យន្តហោះចម្បាំងអាមេរិក។ រូបភាព៖ The Independent

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ និយាយថា៖ « យើងកំពុងត្រៀមខ្លួនវាយប្រហារដ៏ធំមួយនៅថ្ងៃស្អែក [កាលពីថ្ងៃអង្គារ] ហើយខ្ញុំពន្យារពេលមួយរយៈសិន សង្ឃឹមថាប្រហែលជារៀងរហូត ប៉ុន្តែប្រហែលជារយៈខ្លីប៉ុណ្ណោះ ពីព្រោះយើងបានពិភាក្សាគ្នាជាមួយអ៊ីរ៉ង់ យើងនឹងរង់ចាំមើលថាតើនឹងបានលទ្ធផលអ្វីខ្លះ »។

មិនតែប៉ុណ្ណោះ លោក ត្រាំ និងរដ្ឋមន្ត្រីក្រសួងការពារជាតិ លោក Pete Hegseth អះអាងម្តងហើយម្តងទៀតថា យោធាអ៊ីរ៉ង់កំពុងចុះខ្សោយ និងគ្មានការការពារផ្លូវអាកាសទេ ខណៈសហរដ្ឋអាមេរិកអាចធ្វើការហោះហើរក្នុងដែនអាកាសអ៊ីរ៉ង់ ព្រោះប្រទេសនេះមិនមានឥទ្ធិពលខ្លាំងទេ។

ប៉ុន្មានថ្ងៃមុនពេលសហរដ្ឋអាមេរិកនិងអ៊ីរ៉ង់ឈានដល់បទឈប់បាញ់ដ៏ផុយស្រួយមួយ អ៊ីរ៉ង់បានបាញ់ទម្លាក់យន្តហោះចម្បាំង F-១៥E Strike Eagle បង្កឱ្យមានប្រតិបត្តិការសង្គ្រោះដ៏ធំរបស់សហរដ្ឋអាមេរិកសម្រាប់អ្នកបើកយន្តហោះ។ ប្រសិនបើអ៊ីរ៉ង់អាចចាប់អ្នកបើកយន្តហោះអាមេរិកដែលនៅរស់បាន អ៊ីរ៉ង់នឹងដាក់សម្ពាធខ្លាំងបំផុតលើទីក្រុងវ៉ាស៊ីនតោន នេះបើយោងតាមអ្នកជំនាញ។

មន្ត្រីអាមេរិកប្រាប់កាសែត The New York Times ថា ការបាញ់ទម្លាក់យន្តហោះ F-១៥E គឺជាសញ្ញាមួយបង្ហាញថា គំរូហោះហើររបស់សហរដ្ឋអាមេរិកកាន់តែអាចទស្សន៍ទាយលើសមត្ថភាពអ៊ីរ៉ង់។

កាលពីខែមីនា យន្តហោះចម្បាំង F-៣៥ របស់អាមេរិកមួយគ្រឿង ត្រូវបានខូចខាតដោយការបាញ់ប្រហារ និងបាត់បង់ដ្រូនម៉ាក MQ-៩ Reaper យ៉ាងហោចណាស់ ១៦គ្រឿង នៅលើទឹកដីអ៊ីរ៉ង់ផងដែរ៕

សម្រួល៖ ណឺ មិនា