ពូទីន ប្រកាសសងសឹកអ៊ុយក្រែន ក្រោយដ្រូន វាយប្រហារអន្តេវាសិកដ្ឋាន ស្លាប់និងរបួសមនុស្ស ច្រើននាក់

ប្រមុខរដ្ឋាភិបាលទីក្រុងមូស្គូ វ្ល៉ាឌីមៀរ ពូទីន បានប្រកាសក្តែងៗថា លោកនឹងសងសឹកអ៊ុយក្រែនវិញ ចំពោះការវាយប្រហារលើអន្តេវាសិកដ្ឋាន ក្នុងទីក្រុង Starobelsk នៃតំបន់ Luhansk។

តាមការផ្សាយរបស់ RT, ការវាយប្រហារ ដោយដ្រូនអ៊ុយក្រែន កាលពីរាត្រីថ្ងៃសុក្រ ទី២២ ខែឧសភា ឆ្នាំ២០២៦ បានកម្ទេចអគារ បណ្តាលឲ្យមនុស្ស ៦នាក់ស្លាប់ និង ៣៩នាក់រងរបួស ខណៈ ១៥នាក់ កំពុងបាត់ខ្លួន រកមិនទាន់ឃើញនៅឡើយទេ។ 

ជុំវិញរឿងនេះ លោកពូទីន បានចេញបញ្ជាឲ្យ កងទ័ពរុស្ស៊ី រៀបចំផែនការ និងត្រៀមបើកការសងសឹកវិញ ឲ្យសមនឹងអ្វីដែលអ៊ុយក្រែន បានធ្វើ។

មេដឹកនាំរុស្ស៊ី និយាយថា៖ «គ្មានមូលដ្ឋានយោធា មូលដ្ឋានភ្នាក់ងារចារកម្ម ឬសេវាកម្មពាក់ព័ន្ធណាមួយ ស្ថិតនៅក្បែរទីតាំងនោះឡើយ។ ដូច្នេះ មិនបាច់មកអះអាងទេថា គ្រាប់ទាំងនោះ ហោះមកបុកចំអគារ ដោយសារតែប្រព័ន្ធការពារអាកាស ឬប្រព័ន្ធសង្គ្រាមអេឡិចត្រូនិករបស់យើង»។

ស្របពេលជាមួយគ្នានោះដែរ លោកចាត់ទុក ការវាយប្រហារនេះថា ជាអំពើភេរវកម្ម ដោយរបបណាស៊ីសម័យទំនើប។ លោកអះអាងថា ក្រសួងការបរទេសរុស្ស៊ី ត្រូវបានណែនាំ ឲ្យជម្រាបជូនដល់បណ្តាអង្គការអន្តរជាតិ និងសហគមន៍អន្តរជាតិ រួចហើយ អំពីបទឧក្រិដ្ឋនេះ។

ទោះមានការប្រកាសសងសឹកពីសំណាក់លោក ពូទីន ក៏ពិតមែន ប៉ុន្តែការវាយប្រហារ ដោយដ្រូនរបស់អ៊ុយក្រែន ក៏ត្រូវបានគេមើលឃើញថា គឺជាការសងសឹកដូចគ្នា ចំពោះរុស្ស៊ី ដែលបាញ់មីស៊ីល កម្ទេចផ្ទះល្វែងជាច្រើន ក្នុងទីក្រុងកៀវ សម្លាប់មនុស្ស ២៤នាក់ កាលពីសប្តាហ៍មុន៕

អត្ថបទ៖ សុខ សុវណ្ណ