រុស្ស៊ី ប្រកាស​ថា វាយបែក​ទីក្រុង​យុទ្ធសាស្ត្រមួយទៀត​ហើយ​របស់​អ៊ុយក្រែន

សង្គ្រាមនៅអ៊ុយក្រែនកំពុងឡើងកម្តៅខ្លាំង បន្ទាប់ពីរុស្ស៊ី បានវាយលុក និងគ្រប់គ្រងបានទាំងស្រុង​នូវ​ទីក្រុង Kostyantynivka ដែលជាបន្ទាយការពារដ៏សំខាន់នៅភាគខាងកើតប្រទេស​អ៊ុយក្រែន។ នេះ​បើយោងតាម​ការចុះផ្សាយរបស់​សារព័ត៌មាន TRT World នា​ថ្ងៃទី​៤ ខែ​កក្កដា ឆ្នាំ​២០២៦។

លោក Dmitry Peskov អ្នកនាំពាក្យវិមានក្រឹមឡាំង បានប្រកាសថា ទីក្រុងនេះស្ថិតក្រោមការគ្រប់គ្រងរបស់រុស្ស៊ី ១០០ភាគរយហើយ ដែលធ្វើឱ្យលោកប្រធានាធិបតី វ្ល៉ាឌីមៀរ ពូទីន សប្បាយចិត្ត​ខ្លាំង ដល់ថ្នាក់គ្រងឯកសណ្ឋានយោធាចេញមុខថ្លែង​តាមទូរទស្សន៍ ដើម្បី​អរគុណដល់កងទ័ព និងសង្កត់ធ្ងន់ថា ជ័យជម្នះនេះមានសារៈសំខាន់ខ្លាំងណាស់ សម្រាប់យុទ្ធសាស្ត្រសង្គ្រាម។

ថ្វីដ្បិត​គ្រប់គ្រងបានមែន សភាពការណ៍ក្នុងទីក្រុង មិនទាន់ស្ងប់ស្ងាត់ទាំងស្រុងឡើយ ដោយមេបញ្ជាការរុស្ស៊ីម្នាក់គឺលោក Anton Grunis បានប្រាប់ថា ទាហានរបស់លោក កំពុងបន្តដើររុករកតាមគំនរបាក់បែក និងបន្ទប់ក្រោមដី ដើម្បីដេញចាប់ទាហានអ៊ុយក្រែន ដែលនៅសេសសល់។ គួរដឹងថា សមរភូមិដណ្តើមទីក្រុងដែលមានប្រជាជនជិត ៨ម៉ឺននាក់មួយនេះ បានអូសបន្លាយតាំងពីចុងឆ្នាំ២០២៥ មកម្ល៉េះ ហើយវាគឺជាចំណុចវាយលុកដ៏ធំបំផុតរបស់រុស្ស៊ី នៅលើខ្សែត្រៀមជួរមុខ ដែលមានប្រវែងវែង​រហូតដល់ទៅជាង ១ ០០០គីឡូម៉ែត្រ។

មូលហេតុដែលរុស្ស៊ីចង់បានទីក្រុង Kostyantynivka នេះខ្លាំង ព្រោះវាជាទ្វារបើកផ្លូវចុងក្រោយបង្អស់ មុននឹងឈានទៅវាយយកទីក្រុងធំៗពីរទៀតគឺ Kramatorsk និង Sloviansk ដែលជាគោលដៅធំបំផុតរបស់វិមានក្រឹមឡាំងនៅក្នុងតំបន់ Donbas។ ជាមួយគ្នានេះដែរ លោក Peskov អ្នក​នាំពាក្យ​វិមាន​ក្រឹមឡាំង បានអះអាងថា ពេលនេះភាគីរុស្ស៊ី បានគ្រប់គ្រងតំបន់ Luhansk ទាំងមូល ដែលជាចំណែកពាក់កណ្តាលនៃតំបន់ Donbas រួចរាល់ទៅហើយ។

អ្វីដែលគួរឱ្យបារម្ភសម្រាប់ភាគីអ៊ុយក្រែនបន្ថែមទៀតនោះ គឺកងទ័ពរុស្ស៊ីក៏កំពុងតែវាយសម្រុកទៅមុខយ៉ាងលឿននៅលើសមរភូមិផ្សេងទៀតដែរ។ ប្រមុខសេនាធិការចម្រុះរុស្ស៊ី លោក Valery Gerasimov បានទម្លាយថា ពេលនេះកងទ័ពរបស់លោក បានរំកិលខ្លួនទៅជិតមែនទែន ដោយនៅសល់តែ ៩គីឡូម៉ែត្រប៉ុណ្ណោះនឹងទៅដល់ទីក្រុងធំ Zaporizhzhia នៅភាគខាងត្បូង ខណៈមេបញ្ជាការម្នាក់ទៀត បានរាយការណ៍ថា ពួកគេនៅសល់តែ ១០គីឡូម៉ែត្រទៀតប៉ុណ្ណោះ ក៏នឹងទៅដល់ទីក្រុង Sumy នៅភាគខាងជើងដូចគ្នា ដែលធ្វើឱ្យស្ថានភាពជុំទិសរបស់អ៊ុយក្រែនកាន់តែដុនដាបខ្លាំង៕

ប្រែសម្រួល៖ ឈាង