លោក ត្រាំ ជំរុញឱ្យបណ្តាប្រទេសមជ្ឈិមបូព៌ា ចុះ «កិច្ចព្រមព្រៀង Abraham» ព្រមៗគ្នា

រឿងរ៉ាវនយោបាយនៅតំបន់មជ្ឈិមបូព៌ា កំពុងតែមានរបត់ថ្មីយ៉ាងគួរឱ្យចាប់អារម្មណ៍ ដោយ​លោក​ប្រធានាធិបតីអាមេរិក ដូណាល់ ត្រាំ បានប្រកាសថា លោកបាន​ហៅ​ទូរស័ព្ទ​ជជែកជាមួយមេដឹកនាំនៃប្រទេសធំៗជាច្រើនក្នុងតំបន់ រួមមាន អារ៉ាប៊ីសាអូឌីត និងកាតា ជាដើម ដើម្បីជំរុញឱ្យពួកគេចុះហត្ថលេខាលើ «កិច្ចព្រមព្រៀង Abraham» ព្រមៗគ្នា។ នេះ​បើយោង​តាម​ការ​ចុះផ្សាយរបស់​សារព័ត៌មាន NBC នា​ថ្ងៃទី​២៦ ខែ​ឧសភា ឆ្នាំ​២០២៦។

លោក ត្រាំ ជឿជាក់ថា ការរួមគ្នាបែបនេះ នឹងធ្វើឱ្យកិច្ចព្រមព្រៀងសន្តិភាព ដែលអាមេរិកកំពុងចរចាជាមួយអ៊ីរ៉ង់ ក្លាយជាព្រឹត្តិការណ៍ប្រវត្តិសាស្ត្រដ៏អស្ចារ្យបំផុត។

នៅលើបណ្តាញសង្គម Truth Social លោក ត្រាំ បានសង្កត់ធ្ងន់ថា លោកបានស្នើឱ្យប្រទេសទាំងនោះចូលរួមជាដាច់ខាត បន្ទាប់ពីរដ្ឋាភិបាលវ៉ាស៊ីនតោន បានខិតខំប្រឹងប្រែងយ៉ាងខ្លាំង ដើម្បីដោះស្រាយបញ្ហាដ៏ស្មុគស្មាញនេះ។ លោកបានបន្ថែមថា ប្រសិនបើអ៊ីរ៉ង់ព្រមចុះកិច្ចព្រមព្រៀងជាមួយលោក វានឹងក្លាយជាកិត្តិយសដ៏ធំធេង ក្នុងការទទួលយកអ៊ីរ៉ង់ឱ្យចូលជាផ្នែកមួយនៃសម្ព័ន្ធភាពពិភពលោក។

គួររំលឹកថា កិច្ចព្រមព្រៀង Abraham Accords ត្រូវបានបង្កើតឡើងដំបូងក្នុងឆ្នាំ ២០២០ ដើម្បីផ្សះផ្សាទំនាក់ទំនងពាណិជ្ជកម្ម និងការទូតរវាងអ៊ីស្រាអែល និង​បណ្ដា​ប្រទេសអារ៉ាប់។ លោក ត្រាំ ចង់ឱ្យការចុះហត្ថលេខាលើកិច្ចព្រមព្រៀងថ្មីនេះ ចាប់ផ្តើមពីអារ៉ាប៊ីសាអូឌីត និងកាតា ហើយលោកបានព្រមានថា បើប្រទេសណាបដិសេធមិនចូលរួមដោយគ្មានហេតុផលសមស្របទេ នោះហាក់ដូចជា​បង្ហាញពីចេតនាមិនល្អឡើយ។

ទោះ​ជា​បែប​នេះ​ក្ដី​ កិច្ចព្រមព្រៀង Abraham នេះ ក៏កំពុងតែជួបប្រទះនូវភាពស្មុគស្មាញ និងឧបសគ្គជាច្រើនផងដែរ ដោយសារតែយុទ្ធនាការយោធាដ៏ខ្លាំងក្លារបស់អ៊ីស្រាអែលនៅក្នុងតំបន់ហ្គាហ្សា ការមិនព្រមទទួលស្គាល់រដ្ឋឯករាជ្យរបស់ប៉ាឡេស្ទីន ព្រមទាំងជម្លោះពាក្យសម្តី និងការវាយប្រហារគ្នានាពេលថ្មីៗនេះរវាងអ៊ីស្រាអែល និងអ៊ីរ៉ង់ផ្ទាល់តែម្តង៕

ប្រែសម្រួល៖ ឈាង