តើ​​ដ្រូន​សមុទ្រ​របស់​អាមេរិក ប្រើ​ជួយ​ក្រុមបើក​​ឧទ្ធម្ភាគចក្រដែល​អ៊ីរ៉ង់បាញ់​ធ្លាក់ មានសមត្ថភាព​យ៉ាងណា?​

ដ្រូន​​សមុទ្រ​​ ​​(Sea Drone) ​របស់​សហរដ្ឋអាមេរិក​ប្រើ​ដើម្បីជួយសង្គ្រោះ​យោធា​បើក​​ ឧទ្ធម្ភាគចក្រ Apache របស់​កងទ័ពជើង​គោកសហរដ្ឋអាមេរិក​គឺ​ Corsair Autonomous Surface Vessel (ASV) ដែល​បាញ់​​​ធ្លាក់​ដោយ​​យោធា​​របស់​អ៊ីរ៉ង់​។

ដ្រូន​​សមុទ្ររបស់​អាមេរិក​នេះ​ ​មានសមត្ថភាពផ្ទុកទម្ងន់​រហូតដល់ ៤៥៤គីឡូក្រាម អាច​​បើក​បរ​​លើសពី ១ ៨៥២​គីឡូម៉ែត្រ​​លើចម្ងាយ​ក្នុង​ល្បឿនអតិបរមា ៦២គីឡូ​ម៉ែត្រ​ក្នុង​មួយ​ម៉ោង​។

ក្រុមហ៊ុនផលិត​ដ្រូន​ប្រភេទ​នេះ​ គឺក្រុមហ៊ុនការពារជាតិ Saronic Technologies មានមូលដ្ឋាននៅរដ្ឋតិច​សាស់ ត្រូវ​បាន​ផ្តល់​កិច្ចសន្យា​ផលិតកម្ម​ចំនួន ៣៩២លាន​ដុល្លារ​ដោយកងទ័ពជើងទឹកសហរដ្ឋអាមេរិក​ក្នុងខែធ្នូ ឆ្នាំ២០២៥ ដើម្បីផលិតនាវាស្វ័យប្រវត្តិ​​ទាំងនេះ។

យោង​តាម​ភ្នាក់​ងារ​សារព័ត៌មាន​ AFP ឱ្យ​ដឹង​ថា ដ្រូន​នេះ​មាន​ លក្ខណៈបច្ចេក​ទេស និងសមត្ថភាព​ដូ​ចជា​៖

ឈ្មោះ​របស់​វាគឺ​៖ Corsair Autonomous Surface Vessel (ASV)

ក្រុមហ៊ុនផលិត៖ Saronic Technologies មានមូលដ្ឋាន​នៅទីក្រុង Austin រដ្ឋ Texas

ទំហំ៖ ការរចនា​បែបទូកល្បឿន​លឿនប្រវែង ៧.៣ម៉ែត្រ។

សមត្ថភាពផ្ទុក៖ រហូតដល់ ៤៥៣.៥ គីឡូក្រាម អាច​ផ្ទុក​ក្រុមអ្នក​បើក​យន្តហោះពីរនាក់យ៉ាងងាយស្រួល។

ចម្ងាយប្រតិបត្តិការ៖ លើសពី ១ ៨៥២​គីឡូម៉ែត្រ​ ក្នុង​ល្បឿនកំពូល ៣៥ knots (ល្បឿនអតិបរមា ៦២គីឡូ​ម៉ែត្រ​ក្នុង​មួយ​ម៉ោង)

ចំណុច​ពិសេស​របស់​វា គឺ​ការរួមបញ្ចូល AI៖ ដំណើរការដោយ​បញ្ញាសិប្បនិម្មិត​សម្រាប់ការដើរលេង​ដោយស្វ័យប្រវត្តិ និងការសន្សំសំចៃ​ថាមពល។

គួរ​បញ្ជាក់​ថា ការជួយ​សង្គ្រោះនេះបាន​កើតឡើង​ នៅក្នុងឈូងសមុទ្រអូម៉ង់ ជិតច្រក​សមុទ្រហ័រមូស បន្ទាប់​ពីឧទ្ធម្ភាគចក្រវាយប្រហារ AH-64 Apache ធ្លាក់​។

ដ្រូន​សមុទ្រ​(ASV) ដំណើរការដោយ​ក្រុមការងារ​លេខ៥៩ របស់កងទ័ព​ជើង​ទឹកសហរដ្ឋអាមេរិក បាន​ទាញអ្នកបើក​យន្តហោះ ចេញ​ពីទឹក​ដោយ​ជោគជ័យក្នុងរយៈពេលពីរ​ម៉ោង។ ​

ហេតុការណ៍​នេះ គឺជាលើកទីមួយ​ដែលនាវា​យោធា​គ្មាន​មនុស្សបើក​មួយគ្រឿង​ត្រូវបានប្រើប្រាស់​ ដើម្បីជួយ​សង្គ្រោះ​បុគ្គលិកនៅលើសមុទ្រ​៕

សម្រួល៖ ណឺ មិនា