អាមេរិក អឺរ៉ុប និងអូស្ត្រាលី រួមគ្នាថ្កោលទោសផែនការ​​​​សម្លាប់​របស់​យោធាអ៊ីរ៉ង់

សហរដ្ឋអាមេរិក អូស្ត្រាលី បណ្តាសម្ព័ន្ធមិត្តអឺរ៉ុប និងបណ្តាប្រទេសផ្សេងទៀត កាលពីថ្ងៃទី១០ ខែមិថុនា បានរួមគ្នាចេញសេចក្តីថ្លែងការណ៍រួមមួយថ្កោលទោសចំពោះល្បិចកលរបស់ក្រុមគាំទ្រដោយអ៊ីរ៉ង់ ក្នុងការប៉ុនប៉ងសម្លាប់ក្រុមអ្នករិះគន់រដ្ឋាភិបាលអ៊ីរ៉ង់ ក្រុមអ្នកសារព័ត៌មាន និងសហគមន៍ជ្វីហ្វ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារសារព័ត៌មាន Reuters, សេចក្តីថ្លែងការណ៍ដែលចេញផ្សាយដោយក្រសួងការបរទេសសហរដ្ឋអាមេរិក បានគូសបញ្ជាក់ថា «យើងឈររួមគ្នាជាធ្លុងមួយក្នុងការប្តេជ្ញាចិត្តដើម្បីការពារប្រទេស និងប្រជាពលរដ្ឋរបស់យើង ប្រឆាំងនឹងការគំរាមកំហែងទាំងនេះ។ សាធារណរដ្ឋអ៊ីស្លាមអ៊ីរ៉ង់ ត្រូវតែបញ្ឈប់សកម្មភាពទាំងនេះជាបន្ទាន់»។

ក្រុមប្រទេសទាំងនោះ បានលើកឡើងចំៗអំពី «ល្បិចកលសម្លាប់មនុស្ស» និងសកម្មភាពផ្សេងៗទៀតដែលធ្វើឡើងដោយអង្គភាពចារកម្មនៃកងឆ្មាំបដិវត្តន៍អ៊ីស្លាម (IRGC-IO) កងកម្លាំងគូដស៍ (Quds Force) និងក្រសួងចារកម្ម និងសន្តិសុខរបស់អ៊ីរ៉ង់។

ពួកគេ ក៏បានថ្កោលទោសផងដែរ`ចំពោះរលកនៃការវាយប្រហារនាពេលថ្មីៗនេះនៅទូទាំងតំបន់អឺរ៉ុប ដែលត្រូវបានអះអាងទទួលខុសត្រូវដោយក្រុមគាំទ្រអ៊ីរ៉ង់ឈ្មោះ Harakat Ashab al-Yamin al-Islamiya (HAYI)។

បណ្តាប្រទេសទាំងនោះបានសរសេររំលេចថា «ការប៉ុនប៉ងសម្លាប់ ចាប់ជំរិត យាយី គំរាមកំហែង ឬការវាយប្រហារតាមរូបភាពផ្សេងទៀតលើបុគ្គលនានានៅលើទឹកដីរបស់យើង គឺកំពុងបំផ្លាញអធិបតេយ្យភាពជាតិ និងបទដ្ឋានអន្តរជាតិ។ សកម្មភាពទាំងនេះត្រូវតែបញ្ឈប់ជាបន្ទាន់»។

យ៉ាងណាមិញ ការចេញសេចក្តីថ្លែងការណ៍រួមគ្នាពីសំណាក់អាមេរិក អឺរ៉ុប និងអូស្ត្រាលីនៅពេលនេះ គឺជាការបង្ហាញធ្លុងមួយផ្នែកសន្តិសុខដ៏រឹងមាំ ដើម្បីព្រមានចំៗទៅកាន់រដ្ឋាភិបាលអ៊ីរ៉ង់ថា រាល់សកម្មភាពរំលោភអធិបតេយ្យភាពលើទឹកដីលោកខាងលិច នឹងត្រូវជួបប្រទះទណ្ឌកម្មសេដ្ឋកិច្ច និងវិធានការច្បាប់រួមគ្នា កាន់តែធ្ងន់ធ្ងរ៕

អត្ថបទ ៖ សាង ស្រីល័ក្ខ