ញត្តិស៊ើបអង្កេតប្រភពដើមកូវីដលើមន្ទីរពិសោធន៍អាមេរិក Fort Detrick ប្រមូលបានហត្ថលេខាជាង ២៥ លាននាក់

ញត្តិតាមអ៊ីនធឺណិតដែលជំរុញឲ្យអង្គការសុខភាពពិភពលោក (WHO) ស៊ើបអង្កេតលើវិទ្យាស្ថានស្រាវជ្រាវវេជ្ជសាស្ត្រជំងឺឆ្លង របស់កងទ័ពអាមេរិកនៅឯមន្ទីរពិសោធន៍ Fort Detrick ប្រមូលបានហត្ថលេខាជាង ២៥ លាននាក់ ក្នុងរយៈពេល ៣ សប្តាហ៍ ។

ញត្តិនេះត្រូវបានចាប់ផ្ដើមដំណើរការនៅថ្ងៃទី ១៧ ខែកក្កដា និងបញ្ចប់នៅម៉ោង ១២ ថ្ងៃត្រង់នៅថ្ងៃទី ៦ ខែសីហា ។

ការដាក់ញត្តិនេះបានចាប់ផ្តើមដោយលិខិតចំហមួយ សរសេរដោយក្រុមអ្នកប្រើប្រាស់អ៊ីនធឺណិតចិនមួយក្រុមដែលបានសុំឲ្យកាសែត Global Times បង្ហោះសាររបស់ពួកគេនៅលើវេទិកាប្រព័ន្ធផ្សព្វផ្សាយសង្គមចិន WeChat និង Weibo ដើម្បីសុំមតិពីសាធារណជនទូទៅ ។

ញត្តិនេះទាមទារឲ្យការស៊ើបអង្កេត ផ្តោតសំខាន់លើប្រភពដើមនៃជំងឺកូវីដ ១៩ និងសុវត្ថិភាពរបស់មន្ទីរពិសោធន៍អាមេរិក Fort Detrick ។

យោងតាមកាសែតចិនបានឲ្យដឹងថា បន្ទាយយោធា Fort Detrick ត្រូវបានគេស្គាល់ថា ផ្ទុកមេរោគឆ្លងដ៏គ្រោះថ្នាក់ ហើយបានឃើញការលេចធ្លាយនៅឆ្នាំ ២០១៩ មុនពេលការផ្ទុះឡើងនៃជំងឺកូវីដ ១៩ ទៅទៀត ។

កាសែត Global Times បាននិយាយថា ញត្តិតាមអ៊ីនធឺណិតនេះ ទទួលបានហត្ថលេខាចំនួនកន្លះលានក្នុងរយៈពេល ២៤ ម៉ោងដំបូង និង ១ លានក្នុងរយៈពេល ៤៨ ម៉ោង ប៉ុន្តែក្រោយមកគេហទំព័រញត្តិ បានទទួលរងការវាយប្រហារតាមអ៊ីនធឺណេតយ៉ាងធ្ងន់ធ្ងរពីអាសយដ្ឋាន IP ជាច្រើននៅសហរដ្ឋអាមេរិក នៅពេលដែលហត្ថលេខាខិតជិតមកដល់សញ្ញា ១០ លាននាក់ ។

គួរបញ្ជាក់ថា សហគមន៍អន្តរជាតិក៏បានយកចិត្តទុកដាក់យ៉ាងខ្លាំងចំពោះញត្តិនេះផងដែរ ខណៈមានការបញ្ចេញមតិពីបរទេសលើញត្តិនេះប្រមាណ ៣.២ លាននាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ ជនជាតិចិនជាង ២០ លាននាក់ចុះហត្ថលេខាលើញត្តិដើម្បីស៊ើបអង្កេតមន្ទីរពិសោធន៍ Fort Detrick