ឥណ្ឌា ផ្ទុះវីរុសកាចសាហាវមួយទៀត សម្លាប់ក្មេងអាយុ ១២ ឆ្នាំ ឯច្រើននាក់ផ្សេងកំពុងស្ថិតក្រោមការត្រួតពិនិត្យ

រដ្ឋមន្រ្តីក្រសួងសុខាភិបាលឥណ្ឌាលោកស្រី Veena George បានបញ្ជាក់ថា ក្មេងប្រុសអាយុ ១២ ឆ្នាំម្នាក់បានស្លាប់ដោយសារវីរុស Nipah នៅរដ្ឋ Kerala ប្រទេសឥណ្ឌាកាលពីថ្ងៃអាទិត្យ ។

​ទន្ទឹមនោះ យោងតាមមន្រ្តីរដ្ឋបានឲ្យដឹងថា មនុស្ស ២០ នាក់ផ្សេងទៀតដែលអាចមានទំនាក់ទំនងជាមួយអ្នកស្លាប់គឺស្ថិតនៅក្រោមការសង្កេត ខណៈស្រុក Kozhikode ស្រុក Malappuram និងស្រុក Kannur នៅក្នុងរដ្ឋត្រូវបានដាក់ឲ្យមានការប្រុងប្រយ័ត្នខ្ពស់ ។

លោកស្រីរដ្ឋមន្ត្រីបាននិយាយថា “អ្នកស្លាប់ត្រូវបានបញ្ជូនទៅមន្ទីរពេទ្យ ដោយមានអាការគ្រុនក្តៅខ្លាំងកាលពី ៤ ថ្ងៃមុន បន្ទាប់ពីស្ថានភាពរបស់គាត់កាន់តែអាក្រក់ទៅៗ ។ ក្រោយមកយើងបានបញ្ជូនសំណាករបស់គាត់ទៅធ្វើតេស្ត ហើយយើងបានកំណត់អត្តសញ្ញាណទំនាក់ទំនងមនុស្សចំនួន ១៨៨ នាក់មកទល់ពេលនេះ ។ ក្រុមឃ្លាំមើលបានសម្គាល់ពួកគេ ២០ នាក់ថាជាទំនាក់ទំនងដែលមានហានិភ័យខ្ពស់ ខណៈ ២ នាក់មានរោគសញ្ញា ហើយអ្នកទាំងពីរគឺជាបុគ្គលិកសុខាភិបាល” ។

លោកស្រីបាននិយាយថា ទំនាក់ទំនងដែលមានហានិភ័យខ្ពស់ទាំង ២០ នឹងត្រូវផ្លាស់ទៅមហាវិទ្យាល័យវេជ្ជសាស្ត្រ Kozhikode ខណៈដែលអ្នកផ្សេងទៀតត្រូវបានស្នើសុំឲ្យធ្វើចត្តាឡីស័ក ។

យោងតាមការស្ទង់មតិដោយក្រុមប្រឹក្សាស្រាវជ្រាវវេជ្ជសាស្ត្រ និងសារព័ត៌មានជាតិឥណ្ឌាបានឲ្យដឹងថា វីរុស Nipah (NiV) ដែលឆ្លងខ្លាំងបង្កឲ្យរលាកខួរក្បាល ឬជំងឺផ្លូវដង្ហើមចំពោះមនុស្សដែលឆ្លងនៅឥណ្ឌា ខណៈវីរុស Nipah គឺរីករាលដាលដោយទឹកមាត់របស់សត្វប្រចៀវ ។

គួរបញ្ជាក់ថា ការផ្ទុះឡើងដំបូងនៃវីរុស Nipah ត្រូវបានចុះបញ្ជីរកឃើញនៅកសិដ្ឋានចិញ្ចឹមសត្វមួយកន្លែងនៅប្រទេសម៉ាឡេស៊ី កាលពីចុងទសវត្សរ៍ឆ្នាំ ១៩៩០ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ករណីឆ្លងកូវីដនៅ ឥណ្ឌា កំពុងហក់ឡើងវិញ ក្រោយប្រជាជនប្រមូលផ្ដុំគ្នាប្រារព្ធពិធីបុណ្យច្រូតកាត់