អាមេរិក ផ្តល់ជំនួយយោធាប្រចាំឆ្នាំជា មីស៊ីលល្បឿនលឿនជាងសំឡេងដល់ តៃវ៉ាន់ ដើម្បីទប់ទល់ ចិន

សមាជិកសភាសាធារណៈរដ្ឋរបស់សហរដ្ឋអាមេរិកកាលពីថ្ងៃព្រហស្បតិ៍ បានណែនាំសេចក្ដីព្រាងច្បាប់ដើម្បីស្វែងរកការផ្តល់ប្រាក់ចំនួន ២ ពាន់លានដុល្លារក្នុងមួយឆ្នាំ និងជំនួយផ្សេងទៀតដូចជា មីស៊ីល្បឿនលឿនជាងសំឡេងដើម្បីពង្រឹងការការពាររបស់តៃវ៉ាន់ ខណៈដែលប្រទេសនេះប្រឈមនឹងសម្ពាធកើនឡើងពីប្រទេសចិន ។

ច្បាប់ដែលត្រូវបានពិនិត្យដោយសារព័ត៌មាន Reuters នឹងអនុញ្ញាតឲ្យផ្តល់ប្រាក់រហូតដល់ ២ ពាន់លានដុល្លារក្នុងមួយឆ្នាំនៅក្នុងការផ្តល់ហិរញ្ញប្បទានយោធាបរទេស ជំនួយឥតសំណងរបស់សហរដ្ឋអាមេរិក និងប្រាក់កម្ចីដែលអាចឲ្យប្រទេសនានាអាចទិញអាវុធ និងឧបករណ៍ការពារដែលផលិតនៅសហរដ្ឋអាមេរិក រហូតដល់ឆ្នាំ ២០៣២ សម្រាប់កោះដែលគ្រប់គ្រងដោយខ្លួនឯងមួយនេះ ។

ខណៈពេលដែលសេចក្ដីព្រាងច្បាប់នេះ ត្រូវបានឧបត្ថម្ភដោយតែគណបក្សសាធារណរដ្ឋ ដែលជាគណបក្សភាគតិចនៅក្នុងព្រឹទ្ធសភាក៏ដោយ ប៉ុន្តែវាក៏បន្ថែមសម្ពាធពីសភាលើប្រធានាធិបតីប្រជាធិបតេយ្យលោក ចូ បៃដិន សម្រាប់សកម្មភាពដ៏អង់អាចក្នុងការពង្រឹងទំនាក់ទំនងជាមួយកោះតៃវ៉ាន់ ដែលឯកោខាងការទូតមួយនេះ ។

ទន្ទឹមនោះ វា​មិន​ច្បាស់​ភ្លាមៗ​ថា​តើ ​អ្នក​ប្រជាធិបតេយ្យ​មាន​ទស្សនៈ​យ៉ាង​ណា​ចំពោះ​សេចក្តី​ព្រាង​ច្បាប់​នេះ ខណៈការ​គាំទ្រ​តៃវ៉ាន់​ជា​បញ្ហា​កម្រ​មួយ ​​នៅ​ក្នុង​ព្រឹទ្ធសភា​ដែល​មាន​ការ​បែងចែក​យ៉ាង​ខ្លាំង ។

អ្វីដែលសំខាន់នោះ សេចក្ដីព្រាងច្បាស់នេះ ក៏នឹងធ្វើឲ្យប្រសើរឡើងនូវការផ្លាស់ប្តូរយោធាជាមួយតៃវ៉ាន់ និងពង្រីកការអប់រំផ្នែកយោធាប្រកបដោយវិជ្ជាជីវៈ ក៏ដូចជាឱកាសបណ្តុះបណ្តាលបច្ចេកទេសនៅសហរដ្ឋអាមេរិកសម្រាប់បុគ្គលិកយោធាតៃវ៉ាន់ផងដែរ ។

កន្លងមក សហរដ្ឋអាមេរិកបានជំរុញឲ្យកោះតៃវ៉ាន់បន្តកំណែទម្រង់ការពារជាតិ ដើម្បីផ្តោតលើសមត្ថភាពធ្វើឲ្យកងកម្លាំងយោធារបស់ខ្លួនកាន់តែចល័ត និងពិបាកក្នុងការវាយប្រហារ ក៏ដូចជាធានាថា ខ្លួនរក្សាបាននូវកម្លាំងបម្រុងដ៏រឹងមាំ ។

ស្របពេលជាមួយគ្នានេះ វាក៏កើតឡើង ខណៈដែលប្រទេសចិនបានបង្កើនសម្ពាធផ្នែកយោធានាពេលថ្មីៗនេះ រួមទាំងបេសកកម្មម្តងហើយម្តងទៀតដោយយន្តហោះចម្បាំង នៅជិតកោះតៃវ៉ាន់ប្រជាធិបតេយ្យ ដែលទីក្រុងប៉េកាំងអះអាងថា ជាទឹកដីរបស់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ​៖ Yahoo

ចុចអាន ៖ អាមេរិក ​កំពុងភ័យ​ថា ចិន ​អាច​មាន​ក្បាល​គ្រាប់​នុយក្លេអ៊ែរ​ ៣ មុំចំនួន ១ ពាន់គ្រាប់​នៅ​ឆ្នាំ ២០៣០