អាមេរិក បង្ហាញឧទ្ធម្ភាគចក្រគ្មានមនុស្សលើកដំបូង ត្រៀមប្រើក្នុងសង្គ្រាម (មានវីដេអូ)

ឧទ្ធម្ភាគចក្រ Black Hawk ស្វ័យប្រវត្តិមួយគ្រឿង បានហោះឡើងលើផ្ទៃមេឃសហរដ្ឋអាមេរិក ដោយគ្មានអ្នកបើកជាលើកដំបូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយមានការសហការគ្នារវាងក្រុមហ៊ុន Lockheed Martin Sikorsky និងទីភ្នាក់ងារគម្រោងស្រាវជ្រាវអាវុធការពារ (DARPA), ឧទ្ធម្ភាគចក្រនេះ បានហោះចេញពីបន្ទាយ Fort Campbell ក្នុងរដ្ឋ Kentucky កាលពីថ្ងៃទី៥ខែកុម្ភៈ។

ដោយគ្មាននរណាម្នាក់នៅលើយន្តហោះ, UH-60A Black Hawk បានបញ្ចប់ការហោះហើររយៈពេល៣០នាទី លើមូលដ្ឋានរបស់កងទ័ពសហរដ្ឋអាមេរិក ខណៈការហោះហើរលើកទីពីរបានធ្វើឡើងនៅថ្ងៃទី៧ខែកុម្ភៈ។

ឧទ្ធម្ភាគចក្រនេះភ្ជាប់ជាមួយជម្រើស ដែលអាចប្តូរពីម៉ូដមានអ្នកបើកបរ ទៅម៉ូដស្វ័យប្រវត្តិ ដែលអនុញ្ញាតឲ្យកុំព្យូទ័រនៅលើយន្តហោះ អាចគ្រប់គ្រងយានបានដោយខ្លួនឯង។

ក្នុងអំឡុងពេលហោះហើរ ប្រព័ន្ធស្វ័យភាពការងារក្នុងកាប៊ីនរបស់អាកាសយានិក (ALIAS) ត្រូវបានបង្ហាញជាមួយនឹងឧបសគ្គជាច្រើនដើម្បីជម្នះ។

វាធ្វើប្រតិបត្តិការ មុនពេលចុះចតយ៉ាងល្អឥតខ្ចោះនៅលើផ្លូវរត់ក្នុងបន្ទាយ Fort Campbell ដោយគ្មានអន្តរាគមន៍ពីមនុស្ស។

ឧទ្ធម្ភាគចក្រស្វ័យប្រវត្តិនេះ អាចត្រូវបានប្រើដើម្បីបញ្ជូនគ្រឿងផ្គត់ផ្គង់ទៅកាន់តំបន់សង្រ្គាមដ៏គ្រោះថ្នាក់ ឬសង្គ្រោះទាហានដោយមិនមានគ្រោះថ្នាក់ដល់អ្នកបើកយន្តហោះ។

នៅពេលវាបិទដោយខ្លួនឯង ហើយស្លាបឈប់វិល, អ្នកបើកយន្តហោះ២នាក់បានចូលទៅក្នុង ដោយប្តូរវាត្រឡប់ទៅម៉ូដគ្រប់គ្រងដោយមនុស្សវិញ ហើយហោះត្រឡប់ទៅមូលដ្ឋាន។

ចង់ដឹងថាឧទ្ធម្ភាគចក្រនេះអស្ចារ្យប៉ុនណា តោះទៅទស្សនាទាំងអស់គ្នា!

ប្រែសម្រួល៖ Vann Vann

ប្រភព៖ Daily Mail

ចុចអាន៖ ធ្លាក់ឧទ្ធម្ភាគចក្រទើបទិញរបស់ទ័ពអាកាស ហ្វីលីពីន ស្លាប់មនុស្សទាំងអស់