ព័ត៌មានអន្ដរជាតិ

ទាំងព្រលឹម កូរ៉េខាងជើងបាញ់មីស៊ីល៣គ្រាប់ ក្រោយ Quad ថ្កោលទោស

បានផុស

៤ សប្តាហ៍ មុន

នៅ

ថ្ងៃពុធ ២៥ ឧសភា ២០២២

ដោយ

មីស៊ីលបាលីស្ទិក៣គ្រាប់ត្រូវបានបាញ់ចេញពីប្រទេសកូរ៉េខាងជើង បន្ទាប់ពីកិច្ចប្រជុំ Quad ដែលមានសហរដ្ឋអាមេរិក ជប៉ុន ឥណ្ឌា និងអូស្ត្រាលី បានថ្កោលទោសកម្មវិធីមីស៊ីលកូរ៉េខាងជើង ព្រមទាំងបានសន្យាធ្វើឲ្យតំបន់ឥណ្ឌូ-ប៉ាស៊ីហ្វិកសេរី និងបើកចំហ រួមបញ្ចូលគ្នាដ៏រឹងមាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គសេនាធិការចម្រុះកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយដែលចេញទាំងព្រឹកព្រលឹមពុធ ទី២៥ ខែឧសភាននេះថា មីស៊ីលទី១ត្រូវបានបាញ់ឆ្ពោះទៅរកដែនទឹកភាគខាងកើតឆ្នេរសមុទ្ររបស់កូរ៉េខាងជើង ប៉ុន្តែមិនបានបញ្ជាក់លំអិតទេ។ ឆ្មាំសមុទ្រជប៉ុនក៏បានបញ្ជាក់ពីការបាញ់ដែរ ប៉ុន្តែមិនទាន់បញ្ជាក់ពីប្រភេទមីស៊ីល។

ទោះបីជាយ៉ាងណា ក្នុងរង្វន់មួយម៉ោង ទីក្រុងសេអ៊ូលបានរាយការណ៍ថា មានការបាញ់មីស៊ីលបន្ថែមទៀត ប៉ុន្តែមិនច្បាស់ពីប្រភេទមីស៊ីលអ្វីទេក្នុងទិសដៅភាគខាងជើង និងខាងកើត។ នេះបើយោងតាមសារព័ត៌មាន Yonhap។

ក្រោយមកយោធាកូរ៉េខាងត្បូងបាននិយាយថា សរុបការបាញ់គឺមីស៊ីល៣គ្រាប់ដែលត្រូវបានបាញ់ចន្លោះម៉ោង៦ទៅ៦:៤២នាទីព្រឹក ចេញពីតំបន់ Sunan ក្នុងទីក្រុងព្យុងយ៉ាង។

ឆ្នាំនេះមានការបាញ់សាកល្បងមីស៊ីលលើកទី១៧ ហើយរបស់រដ្ឋាភិបាលទីក្រុងព្យុងយ៉ាងដែលបានកើតមានឡើងស្របពេលប្រធានាធិបតីសហរដ្ឋអាមេរិក លោក ចូ បៃដិន បានចាកចេញពីប្រទេសជប៉ុនត្រឡប់ទៅទីក្រុងវ៉ាស៊ីនតោនវិញ បន្ទាប់ពីដំណើរទស្សនកិច្ចរយៈពេល៥ថ្ងៃនៅអាស៊ី។

មុនវិលត្រឡប់ទៅវិញ លោក បៃដិន និងសម្ព័ន្ធមិត្ត Quad បានចេញសេចក្តីថ្លែងការណ៍រួមគ្នាមួយអំពីតួនាទីរបស់ពួកគាត់ក្នុងពេលអនាគតសម្រាប់តំបន់ដែលអាមេរិកហៅឈ្មោះថា ឥណ្ឌូ-ប៉ាស៊ីហ្វិក។

សេចក្តីថ្លែងការណ៍រួមដែលចុះហត្ថលេខាដោយលោក ចូ បៃដិន, នាយករដ្ឋមន្ត្រីជប៉ុនលោក Fumio Kishida, នាយករដ្ឋមន្ត្រីឥណ្ឌា លោក Narendra Modi, និងនាយករដ្ឋមន្ត្រីជាប់ឆ្នោតថ្មីរបស់អូស្ត្រាលី លោក Anthony Albanese បាននិយាយថា ៖«យើងខ្ញុំធ្វើការបញ្ជាក់ជាថ្មីអំពីការប្តេជ្ញាចិត្តរបស់ពួកយើងចំពោះការរំសាយអាវុធនុយក្លេអ៊ែររបស់ឧបទ្វីបកូរ៉េ ស្របតាមដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ»។

សេចក្តីថ្លែងការណ៍របស់ Quad បន្តថា ៖«យើងខ្ញុំក៏ថ្កោលទោសផងដែរនូវការអភិវឌ្ឍអាវុធមីស៊ីលបាលីស្ទិកដ៏អស្ថិរភាព និងការបាញ់សាករបស់កូរ៉េខាងជើង ក្នុងនោះមានការបាញ់សាកល្បងមីស៊ីលបាលីស្ទិកអន្តរទ្វីប រំលោភបំពានលើដំណោះស្រាយក្រុមប្រឹក្សាសន្តិសុខអង្គការសហប្រជាជាតិ (UNSCRs) និងអំពាវនាវដល់សហគមន៍អន្តរជាតិអនុវត្តពេញលេញចំពោះដំណោះស្រាយទាំងនេះ។ យើងខ្ញុំជំរុញឲ្យកូរ៉េខាងជើងគោរពតាមកាតព្វកិច្ចទាំងអស់របស់ខ្លួនស្ថិតក្រោម UNSCRs ជៀសវាងការញុះញង់ និងចូលរួមក្នុងកិច្ចសន្ទនាដ៏សំខាន់»៕

ប្រែសម្រួល៖ វីរបុត្រ
ប្រភព៖ AFP

Related Topics:កូរ៉េខាងជើង