ពូទីន៖ សហរដ្ឋអាមេរិក​ ជា​ប្រទេស​តែ​មួយ​គត់​លើលោក ​ដែល​​ប្រើ​អាវុធ​នុយក្លេអ៊ែរ​​ ពីរ​ដង

ក្នុងអំឡុងសុន្ទរកថារយៈពេល ៣៧ នាទី ស្ដីអំពីការប្រកាសកាត់បញ្ចូលជាផ្លូវការនៃតំបន់ចំនួន ៤ របស់អ៊ុយក្រែន លោក វ្ល៉ាឌីមៀរ ពូទីន បានលើកឡើងអំពីការបែកបាក់នៃសហភាពសូវៀត គោលនយោបាយអាណានិគមនិយមលោកខាងលិច អាវុធនុយក្លេអ៊ែរ និងទស្សនៈរបស់លោកចំពោះសីលធម៌របស់បស្ចិមប្រទេស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះ ប្រធានាធិបតីរុស្ស៊ីរូបនេះ បានរំលឹកថា សហរដ្ឋអាមេរិក គឺជាប្រទេសដំបូងគេ ដែលប្រើប្រាស់អាវុធនុយក្លេអ៊ែរ ដោយបានទម្លាក់គ្រាប់បែកចំនួនពីរគ្រាប់ ទៅលើទីក្រុង ហ៊ីរ៉ូស៊ីម៉ា និងណាហ្គាសាគី របស់ប្រទេសជប៉ុន ។

លោក ពូទីន បាននិយាយនៅវិមានក្រឹមឡាំងថា “សហរដ្ឋអាមេរិក គឺជាប្រទេសតែមួយគត់នៅលើពិភពលោក ដែលប្រើអាវុធនុយក្លេអ៊ែរចំនួនពីរដង ដោយបានបំផ្លាញទីក្រុងរបស់ជប៉ុន ។ សហរដ្ឋអាមេរិកក៏បាន បន្សល់ទុកដានដ៏គួរឲ្យភ័យខ្លាចនៅក្នុងប្រវត្តិសាស្រ្តរបស់កូរ៉េ និងវៀតណាម ហើយសព្វថ្ងៃនេះកំពុងព្យាយាមកាន់កាប់ប្រទេសអាល្លឺម៉ង់ និងកូរ៉េខាងត្បូង ក្រោមសេចក្តីថ្លែងការណ៍សមភាពទៀតផង” ។

គួរបញ្ជាក់ថា តំបន់ចំនួន ៤ ដែលលោក ពូទីន និងមេដឹកនាំនៃតំបន់ទាំងនោះបានចុះហត្ថលេខាលើសន្ធិសញ្ញាដើម្បីដាក់បញ្ចូលនោះរួមមានតំបន់ Luhansk, Donetsk, Kherson និង Zaporizhia ដែលនេះជាទង្វើមួយត្រូវបានអ៊ុយក្រែន និងមហាអំណាចលោកខាងលិច បរិហារថា “ខុសច្បាប់” ៕

ប្រែសម្រួល៖ Vann Vann

ប្រភព៖ News.Am, Aljazeera

ចុចអាន៖ រុស្ស៊ី វេតូ សេចក្តីសម្រេច របស់ UN ស្តីពី ការកាត់យកទឹកដីនៅ អ៊ុយក្រែន