លោក គីម ជុងអ៊ុន គាំទ្រ ចិន លើការបង្រួបបង្រួម តៃវ៉ាន់

យោងតាមកាសែត Rodong Sinmun បានរាយការណ៍ថា មេដឹកនាំកូរ៉េខាងជើងលោក គីម ជុងអ៊ុន បានបង្ហាញការគាំទ្រចំពោះកិច្ចខិតខំប្រឹងប្រែងបង្រួបបង្រួមរបស់ប្រទេសចិនលើតៃវ៉ាន់ ។

នៅក្នុងសារផ្ញើអបអរសាទរទៅកាន់លោកប្រធានាធិបតីចិន ស៊ី ជីនពីង ក្នុងទិវាជាតិរបស់ប្រទេសចិនដែលត្រូវបានប្រារព្ធកាលពីថ្ងៃទី១ ខែតុលា, លោក គីម បាននិយាយថា “ទាំងគណបក្ស និងរដ្ឋាភិបាល ក៏ដូចជាប្រជាជនរបស់យើងនឹងគាំទ្រ និងលើកទឹកចិត្តជានិច្ចដល់បក្ស រដ្ឋាភិបាល និងប្រជាជនចិនក្នុងការតស៊ូដើម្បីការពារអធិបតេយ្យភាព និងបូរណភាពទឹកដីរបស់ប្រទេស ហើយសម្រេចបាននូវការបង្រួបបង្រួមជាតិឡើងវិញ” ។

ទន្ទឹមនោះការផ្ញើសាររបស់លោក គីម ក៏ត្រូវបានគេមើលឃើញផងដែរ ស្របពេលដែលលោក ស៊ី ​រំពឹង​ថា​នឹង​ស្វែងរក​អាណត្តិ​ទី ៣ ​ដែល​មិន​ធ្លាប់​មាន​ពី​មុន​ក្នុង​នាម​ជា​មេ​បក្ស​នៅ​ក្នុង​សមាជ​ជាតិ​របស់​បក្ស​កុម្មុយនិស្ត​ដែលនឹង​បើកដំណើរ​ការនៅ​ថ្ងៃ​ទី ១៦ ខែ​តុលាខាងមុខនេះ ។

លោក គីម បានសង្កត់ធ្ងន់ថា លោកនឹងធ្វើការជាមួយលោក ស៊ី ដើម្បីបង្កើនទំនាក់ទំនងជាប្រពៃណីនៃមិត្តភាពរវាងប្រទេសរបស់លោកជាមួយប្រទេសចិន និងដើម្បីការពារសន្តិភាព និងស្ថិរភាពនៅអាស៊ី ក៏ដូចជាពិភពលោកទាំងមូលផងដែរ ។

ស្របពេលជាមួយគ្នានេះ លោក គីម ត្រូវបានគេជឿថាកំពុងស្វែងរកទំនាក់ទំនងជិតស្និទ្ធជាមួយប្រទេសចិន ដែលជាអ្នកគាំទ្រដ៏រឹងមាំបំផុតរបស់ខ្លួន ខណៈដែលសហរដ្ឋអាមេរិកពង្រឹងកិច្ចសហប្រតិបត្តិការជាមួយប្រទេសជប៉ុន និងកូរ៉េខាងត្បូង តាមរយៈសមយុទ្ធការពាររួមគ្នានាពេលថ្មីៗនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រត់ជាន់គ្នាស្លាប់ជាង ១២៩ នាក់ក្នុងការប្រកួតបាល់ទាត់នៅ ឥណ្ឌូណេស៊ី