ពូទីន អះអាងថា អ៊ុយក្រែន ជាអ្នកនៅពីក្រោយការវាយប្រហារភេរវកម្មលើស្ពាន គ្រីមៀ (មានវីដេអូ)

ទីភ្នាក់ងារស៊ើបការណ៍សម្ងាត់អ៊ុយក្រែន ជាអ្នកនៅពីក្រោយការវាយប្រហារដ៏សាហាវ លើស្ពានគ្រីមៀ។ នេះបើតាមការបញ្ជាក់ពីប្រធានាធិបតីរុស្ស៊ី លោក វ្ល៉ាឌីមៀរ ពូទីន កាលពីថ្ងៃអាទិត្យទី០៩ខែតុលា បន្ទាប់ពីរបាយការណ៍របស់ប្រធានគណៈកម្មាធិការស៊ើបអង្កេតជាតិ លោក Aleksandr Bastrykin។

យោងតាមលោក Bastrykin, ការវាយប្រហារនេះ ត្រូវបានរៀបចំឡើងដោយសេវាសន្តិសុខអ៊ុយក្រែន ដោយមានជំនួយពីជនជាតិរុស្ស៊ី និងជនបរទេសមួយចំនួន។ ប្រធានគណៈកម្មាធិការស៊ើបអង្កេតក៏បាននិយាយដែរថា សេវាសន្តិសុខសហព័ន្ធ (FSB) បានកំណត់អត្តសញ្ញាណជនសង្ស័យនៅក្នុងការបំផ្ទុះនេះ។

លោក Bastrykin បានឲ្យដឹងថា ការវាយប្រហារលើស្ពាននេះ គឺសំដៅទៅលើហេដ្ឋារចនាសម្ព័ន្ធសំខាន់របស់រុស្ស៊ី។ វាជាអំពើភេរវកម្ម។

លោកបន្តថា “ឡានដឹកទំនិញដែលផ្ទុះលើស្ពាន បានមកដល់ប្រទេសរុស្ស៊ី ក្រោយចាកចេញពី ប៊ុលហ្គារី ឆ្លងកាត់ហ្សកហ្ស៊ីនិងអាមេនី។ ដូច​សេចក្តី​រាយការណ៍អ៊ីចឹង ​គ្មានអ្វីត្រូវ​សង្ស័យ​ទេ។ វាត្រូវបានបញ្ជា រៀបចំផែនការ និងអនុវត្តដោយសេវាសន្តិសុខអ៊ុយក្រែន”។

គួរបញ្ជាក់ជាថ្មី​ ក្នុងការ​វាយ​ប្រហារ​ដែល​​កើត​ឡើង​កាល​ពី​ព្រឹក​ថ្ងៃ​សៅរ៍ទី០៨ខែតុលា រថយន្ត​ដឹក​ទំនិញ​មួយគ្រឿង បានផ្ទុះ​លើ​ស្ពានគ្រីមៀ។ ផ្នែកមួយនៃស្ពាននេះ បានបាក់ ហើយធុងសាំងចំនួន៧នៅលើរថភ្លើង ដែលកំពុងឆ្ពោះដំណើរទៅកាន់តំបន់គ្រីមៀ តាមរយៈផ្លូវដែកក្បែរនោះ បានឆាបឆេះ។

​មនុស្សចំនួន៣​នាក់​បាន​ស្លាប់​ក្នុង​ឧបទ្ទវហេតុ​នោះ។ ភ្លាមៗនោះ ការផ្ទុះ បាននាំឲ្យមានការផ្អាកជាបណ្តោះអាសន្ននូវចរាចរណ៍ផ្លូវគោក និងផ្លូវដែក ប៉ុន្តែបានដំណើរការឡើងវិញនៅល្ងាចថ្ងៃសៅរ៍៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ផ្ទុះឆេះស្ពានតភ្ជាប់ រុស្ស៊ី ទៅឧបទ្វីបគ្រីមៀ (មានវីដេអូ)