ផ្ទុះឆេះស្ពានតភ្ជាប់ រុស្ស៊ី ទៅឧបទ្វីបគ្រីមៀ (មានវីដេអូ)

ទីភ្នាក់ងារសារព័ត៌មានរដ្ឋ RIA Novosti របស់រុស្ស៊ីបាននិយាយថា ចរាចរណ៍ត្រូវបានផ្អាកនៅលើស្ពានក្នុងទីក្រុង Kerch ដែលតភ្ជាប់ឧបទ្វីបគ្រីមៀទៅកាន់រុស្ស៊ីដីគោក បន្ទាប់ពីផ្ទុះឆេះធុងសាំង បណ្ដាលឲ្យខូចផ្លូវសម្រាប់ផ្គត់ផ្គង់ដល់ទាហានរុស្ស៊ីដែលកំពុងប្រយុទ្ធនៅអ៊ុយក្រែន ។

ទីភ្នាក់ងារនេះបាននិយាយនៅថ្ងៃសៅរ៍នេះ ដោយដកស្រង់សម្តីមន្ត្រីក្នុងតំបន់ថា “ធុងសាំងបានផ្ទុះឆេះនៅផ្នែកមួយនៃស្ពានភ្ជាប់ទៅតំបន់គ្រីមៀ ប៉ុន្តែមូលហេតុនៃការផ្ទុះឆេះនេះមិនទាន់ត្រូវបានគេដឹងនៅឡើយទេ ។

ដោយឡែកប្រព័ន្ធផ្សព្វផ្សាយរបស់ប្រទេសអ៊ុយក្រែនវិញបានរាយការណ៍ផងដែរថា ការផ្ទុះឆេះនៅលើស្ពានដែលប្រធានាធិបតីរុស្ស៊ី លោក វ្ល៉ាឌីមៀ ពូទីន បានដាក់បង្ហាញក្នុងឆ្នាំ ២០១៨ បន្ទាប់ពីទីក្រុងមូស្គូបានបញ្ចូលតំបន់គ្រីមៀពីអ៊ុយក្រែនក្នុងឆ្នាំ ២០១៤ បានកើតឡើងនៅម៉ោងប្រហែល ៦ ព្រឹក (ម៉ោងនៅរុស្ស៊ី) ។

ការផ្ទុះឆេះនេះបានកើតឡើងប៉ុន្មានម៉ោងប៉ុណ្ណោះ បន្ទាប់ពីការផ្ទុះជាបន្តបន្ទាប់កក្រើកទីក្រុង Kharkiv ភាគខាងកើតនៃប្រទេសអ៊ុយក្រែនកាលពីព្រឹកថ្ងៃសៅរ៍ ខណៈអភិបាលក្រុងលោក Ihor Terekhov បាននិយាយនៅលើបណ្ដាញ Telegram ថា ការផ្ទុះទាំងព្រឹកព្រលឹមនេះគឺជាលទ្ធផលនៃការវាយប្រហារដោយកាំជ្រួចមីស៊ីលរបស់រុស្ស៊ី ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ លោក Zelensky ៖ សង្គ្រាមគួរប្រយុទ្ធតែនៅ អ៊ុយក្រែន បានហើយ កុំឲ្យរាល​ដាលទៅប្រទេសផ្សេង