មកដឹងទំហំទឹកប្រាក់ដែលអាមេរិក និងសម្ព័ន្ធមិត្ត ចំណាយបង្វឹកទាហាន អ៊ុយក្រែន

មន្ត្រីមន្ទីរបញ្ចកោណលោក Joseph Hilbert បានប្រាប់អ្នកយកព័ត៌មានកាលពីខែកញ្ញាថា សហរដ្ឋអាមេរិកបានចំណាយប្រាក់ប្រហែល ១២៦ លានដុល្លារក្នុងការបណ្តុះបណ្តាលទាហានអ៊ុយក្រែនជាង ២៣,០០០ នាក់នៅមូលដ្ឋានយោធា Yavorov ភាគខាងលិចអ៊ុយក្រែន ។

ជំនួយយោធារបស់សហរដ្ឋអាមេរិកដែលផ្ដល់ឲ្យអ៊ុយក្រែន រួមទាំងគម្រោងបណ្តុះបណ្តាលទាហានបានកើនឡើងគួរឲ្យកត់សម្គាល់ ចាប់តាំងពីសង្គ្រាមលុកលុយរបស់រុស្ស៊ី ខណៈនៅឆ្នាំ ២០២២ នេះមន្ទីរបញ្ចកោណបានផ្តល់ជំនួយផ្នែកសន្តិសុខចំនួន ៩៥០ លានដុល្លារដល់ទីក្រុងកៀវ

បច្ចុប្បន្ននេះ សហរដ្ឋអាមេរិកគឺជាអ្នកផ្តល់ជំនួយយោធាដ៏ធំបំផុតដល់ទីក្រុងកៀវ ដោយបានចំណាយរហូតដល់ទៅ ១៦.៨ ពាន់លានដុល្លារ ចាប់តាំងពីខែកុម្ភៈមក ។ បន្ទាប់ពីសហរដ្ឋអាមេរិក គឺចក្រភពអង់គ្លេសដែលមានជំនួយផ្នែកយោធាចំនួន ២.៣ ពាន់លានផោន (២.៦ ពាន់លានដុល្លារ) ក្នុងនោះមានទាំងកម្មវិធីបណ្តុះបណ្តាលទាហានផងដែរ ។

កម្មវិធីបណ្ដុះបណ្ដាលនេះក៏ត្រូវបានគាំទ្រដោយសម្ព័ន្ធមិត្តរបស់ចក្រភពអង់គ្លេសផងដែរ រួមទាំងស៊ុយអែត ហ្វាំងឡង់ និងកាណាដា ដោយបានបង្វឹកបុគ្គលិកយោធាអ៊ុយក្រែនចំនួន ១០,០០០ នាក់ក្នុងរយៈពេល ៤ ខែកន្លងមកនេះ ។

ជាមួយគ្នានេះដែរ កាសែត El Pais បានរាយការណ៍ថា គ្រូយោធាមកពីប្រទេសអេស្ប៉ាញ ក៏នឹងបង្រៀនកងទ័ពអ៊ុយក្រែនជាច្រើនរយនាក់ផងដែរនៅលើទឹកដីអេស្ប៉ាញ ដែលជាផ្នែកមួយនៃបេសកកម្មហ្វឹកហ្វឺនថ្មីរបស់សហភាពអឺរ៉ុប ដែលត្រូវបានគេរំពឹងថានឹងចំណាយប្រាក់ប្រហែល ១០៦ លានអឺរ៉ូ (១០៣ លានដុល្លារ) ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ១៦ ប្រទេសបញ្ជូនគ្រូទៅបង្វឹកទាហាន អ៊ុយក្រែន