តើគ្រាប់បែកវិទ្យុសកម្មជាអ្វី ហើយសាហាវកម្រិតណា ទើប រុស្ស៊ី ចោទ អ៊ុយក្រែន ថាត្រៀមប្រើ?

រដ្ឋមន្ត្រីការពារជាតិរុស្ស៊ីលោក Sergei Shoigu បានអះអាងកាលពីពេលថ្មីៗនេះថា អ៊ុយក្រែនអាចប្រើប្រាស់ “គ្រាប់បែកវិទ្យុសកម្ម ឬគ្រាប់បែកកខ្វក់” ដើម្បីធ្វើឲ្យប្រទេសរុស្ស៊ីស្ងប់ស្ងាត់ ។

ទោះយ៉ាងណា លោករដ្ឋ​មន្ត្រីមិន​បាន​ផ្តល់​ភស្តុតាង​ណា​មួយចំពោះផែនការប្រើគ្រាប់បែកវិទ្យុសកម្មនេះនោះ​ទេ ហើយ​អ៊ុយក្រែន​ក៏​ដូច​ជា​ប្រទេស​បារាំង ចក្រភព​អង់គ្លេស និង​សហរដ្ឋ​អាមេរិក បាន​ច្រាន​ចោល​ការ​ចោទ​ប្រកាន់​នេះផងដែរ ។

ដូច្នេះតើគ្រាប់បែកវិទ្យុសកម្ម ឬគ្រាប់បែកកខ្វក់ជាអ្វី?

“គ្រាប់បែកវិទ្យុសកម្ម ឬគ្រាប់បែកកខ្វក់” ជាគ្រាប់បែកដែលមានផ្ទុកសារធាតុវិទ្យុសកម្ម ដូចជាសារធាតុអ៊ុយរ៉ានីញ៉ូម រួមជាមួយគ្រឿងផ្ទុះផ្សេងទៀត ហើយវានឹងកំចាយពេញអាកាស នៅពេលដែលវាផ្ទុះ ។

គ្រាប់បែកនេះមិនចាំបាច់មានសារធាតុវិទ្យុសកម្មដែលចម្រាញ់ខ្លាំង ដូចដែលប្រើក្នុងគ្រាប់បែកនុយក្លេអ៊ែរនោះទេ ។ ផ្ទុយទៅវិញ វាអាចប្រើប្រាស់ជំនួសដោយសារធាតុវិទ្យុសកម្មពីមន្ទីរពេទ្យ ស្ថានីយ៍ថាមពលនុយក្លេអ៊ែរ ឬមន្ទីរពិសោធន៍ស្រាវជ្រាវ ។

ដោយសារតែលក្ខណៈពិសេសបែបនេះ ទើបធ្វើឲ្យគ្រាប់បែកនេះមានតម្លៃថោក និងផលិតលឿនជាងការផលិតអាវុធនុយក្លេអ៊ែរ ហើយវាមានរូបរាងសមល្មមដែលអាចដាក់នៅខាងក្រោយរថយន្តបាន ។

តើគ្រាប់បែកវិទ្យុសកម្ម ឬគ្រាប់បែកកខ្វក់សាហាវកម្រិតណា?

អាវុធប្រភេទនេះគឺប្រើដើម្បីបំពុលតំបន់ជុំវិញ ឬសម្រាប់បំបែកការប្រមូលផ្តុំណាមួយ ហើយគ្រាប់បែកបែបនេះនឹងបង្កឲ្យមានការភ័យស្លន់ស្លោក្នុងចំណោមប្រជាជនក្នុងតំបន់នោះ ។

ទន្ទឹមនោះ វិទ្យុសកម្មរបស់គ្រាប់បែកក៏អាចបណ្ដាលឲ្យមានជំងឺធ្ងន់ធ្ងរផងដែរ ដូចជា មហារីក ជាដើម ។ ចំណែកទីតាំងធំៗជុំវិញតំបន់បំផ្ទុះ ក៏នឹងត្រូវជម្លៀសចេញផងដែរ ដើម្បីការពារពីមេរោគ ឬបោះបង់ចោលទាំងស្រុងតែម្ដង ។

ស្របពេលជាមួយគ្នានេះ សហព័ន្ធអ្នកវិទ្យាសាស្ត្រអាមេរិកបានគណនាថា ប្រសិនបើគ្រាប់បែកដែលមានផ្ទុកសារធាតុវិទ្យុសកម្ម cobalt-60 ទម្ងន់ ៩ ក្រាម និង TNT ចំនួន ៥ គីឡូក្រាម នឹងត្រូវផ្ទុះនៅតំបន់ Manhattan ក្នុងទីក្រុងញូវយ៉ក វានឹងធ្វើឲ្យតំបន់ទាំងមូលនៃទីក្រុងមិនអាចរស់នៅបានរាប់ទសវត្សរ៍ឯណោះ ៕

ប្រែសម្រួលដោយ ៖ ជីវ័ន្ត

ប្រភព ៖ BBC

ចុចអាន ៖ មកដឹងទំហំទឹកប្រាក់ដែលអាមេរិក និងសម្ព័ន្ធមិត្ត ចំណាយបង្វឹកទាហាន អ៊ុយក្រែន