មីស៊ីលកូរ៉េ​ខាង​ជើងបាញ់ព្រឹកមិញ អាចហោះដល់ សហរដ្ឋអាមេរិក

ប្រទេសកូរ៉េខាងត្បូងបាននិយាយថា​ ព្រឹកមិញនេះ កូរ៉េ​ខាង​ជើង​បាន​បាញ់​សាកល្បង​​មីស៊ីល​អន្តរទ្វីប (ICBM) មួយគ្រាប់ ដោយមីស៊ីលរយៈចម្ងាយឆ្ងាយរបស់ទីក្រុងព្យុងយ៉ាងនេះ ត្រូវបានរចនាឡើងដើម្បីបាញ់ដល់ដីគោករបស់សហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែក ឆ្មាំសមុទ្ររបស់ប្រទេសជប៉ុន បាននិយាយថា មីស៊ីលនេះបានធ្លាក់ក្នុងសមុទ្រនៅចម្ងាយប្រហែល២១០គីឡូម៉ែត្រ ភាគខាងលិចកោះហុកកៃដូ។

យោងតាមយោធាកូរ៉េខាងត្បូង, មីស៊ីលបាញ់ព្រឹកមិញនេះ បានឈានដល់រយៈកម្ពស់ ៦១០០ គីឡូម៉ែត្រនៅលើគន្លងដ៏ខ្ពស់មួយ ហើយធ្វើដំណើរបានចម្ងាយ ១០០០គីឡូម៉ែត្រ។

​គន្លង​ដ៏​ខ្ពស់នេះ​មានន័យថា មី​ស៊ី​ល​ហោះ​បាន​ខ្ពស់​ទៅកាន់​ទីអវកាស ហើយរដ្ឋមន្ត្រីការពារជាតិជប៉ុន លោក Yasukazu Hamada បានអះអាងថា មីស៊ីលនេះអាចហោះទៅដល់សហរដ្ឋអាមេរិក និងអាចហោះបានចម្ងាយរហូតដល់ ១៥ ០០០ គីឡូម៉ែត្រឯណោះ។

កាល​ពី​ថ្ងៃ​ព្រហស្បតិ៍ រដ្ឋមន្ត្រី​ក្រសួង​ការបរទេស​កូរ៉េខាងជើងលោកស្រី Choe Son Hui បាន​ព្រមាន​ពី​ការ​ឆ្លើយ​តប​ខ្លាំងក្លាជាងមុន ចំពោះ​ផែនការ​របស់​អាមេរិក​ក្នុង​ការ​ពង្រឹង​វត្តមាន​យោធា​របស់​ខ្លួន​នៅក្នុង​តំបន់។

ការបាញ់បង្ហោះមីស៊ីល បានធ្វើឡើងបន្ទាប់ពីកិច្ចប្រជុំកាលពីថ្ងៃអាទិត្យ រវាងប្រធានាធិបតីសហរដ្ឋអាមេរិកលោក Joe Biden, មេដឹកនាំកូរ៉េខាងត្បូងលោក Yoon Suk-yeol និងនាយករដ្ឋមន្ត្រីជប៉ុនលោក Fumio Kishida នៅក្រៅកិច្ចប្រជុំកំពូលអ៊ាសានក្នុងប្រទេសកម្ពុជា៕

ប្រែសម្រួល៖ Vann Vann

ប្រភព៖ BBC

ចុចអាន៖ កូរ៉េខាងជើង បាញ់មីស៊ីលមួយគ្រាប់ទៀត ក្រោយទើបតែគំរាមឆ្លើយតបផ្នែក​យោធាទៅ អាមេរិក