រុស្ស៊ី កំពុងផលិតអាវុធខ្លាំងៗបន្ថែមទៀត ដើម្បីទប់ទល់សត្រូវដែលចាក់ឫសគល់​នៅទូទាំងពិភពលោក

អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បានសរសេរនៅលើឆានែល Telegram របស់លោកកាលពីថ្ងៃអាទិត្យថា រុស្ស៊ីកំពុងជំរុញការផលិតសព្វាវុធដ៏មានឥទ្ធិពលបំផុតបន្ថែមទៀត រួមទាំងផ្អែកលើគោលការណ៍រូបវន្តថ្មី សម្រាប់ទប់ទល់នឹងប្រទេសលោកខាងលិចដែលគាំទ្ររដ្ឋាភិបាលទីក្រុងកៀវ ។

លោក Medvedev បាននិយាយថា “សត្រូវរបស់យើងកំពុងត្រូវបានចាក់ឫសនៅអឺរ៉ុប អាមេរិកខាងជើង ជប៉ុន អូស្ត្រាលី នូវែលសេឡង់ និងកន្លែងមួយចំនួនទៀតដែលបង្ហាញពីភក្ដីភាពចំពោះពួកណាស៊ីនាពេលបច្ចុប្បន្ននេះ” ។

អតីតប្រធានាធិបតីរុស្ស៊ីរូបនេះបញ្ជាក់ទៀតថា “នោះហើយជាមូលហេតុដែលយើងកំពុងជំរុញការផលិតសព្វាវុធ ដែលជាមធ្យោបាយបំផ្លិចបំផ្លាញដ៏មានឥទ្ធិពលបំផុតទៅលើសត្រូវរបស់យើងដែលកំពុងចាក់ឫសគល់នៅទូទាំងពិភពលោក” ។

គួរបញ្ជាក់ថា កាលពីថ្ងៃទី២៤ ខែកុម្ភៈ លោក វ្ល៉ាឌីមៀរ ពូទីន បានចាប់ផ្តើមប្រតិបត្តិការយោធាពិសេសមួយនៅអ៊ុយក្រែន ដើម្បីឆ្លើយតបនឹងសំណើសុំជំនួយពីប្រមុខនៃសាធារណរដ្ឋ Donbass ។

បន្ទាប់មក លោកខាងលិច​បានដាក់​ទណ្ឌកម្ម​យ៉ាង​ខ្លាំងក្លា​ប្រឆាំង​រុស្ស៊ី និង​បង្កើន​ការផ្គត់ផ្គង់​សព្វាវុធ​ដល់​រដ្ឋាភិបាលទីក្រុងកៀវ ដែល​មានតម្លៃ​រាប់សិប​ពាន់​លាន​ដុល្លារ​ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ រុស្ស៊ី ថា លោកខាងលិច គួរបន្ទោសខ្លួនឯងចំពោះការស្លាប់មនុស្សនៅ អ៊ុយក្រែន