អង់គ្លេស ប្រកាសផ្តល់​ធាតុ​អ៊ុយរ៉ាញ៉ូម​ តម្លៃ២៨០ លានដុល្លារដល់​អ៊ុយក្រែន​ ជួយសង្គ្រោះវិស័យថាមពល

រដ្ឋាភិបាល​អង់គ្លេស បានព្រមព្រៀងផ្តល់សារធាតុអ៊ុយរ៉ាញ៉ូម​ដែ​លចម្រាញ់​រួច​​មានតម្លៃ ២៨០ លានដុល្លារ ដើម្បីគាំទ្រដល់ដំណើរការរោងចក្រថាមពលនុយក្លេអ៊ែរក្នុងប្រទេសអ៊ុយក្រែន សម្រាប់រយៈពេល ២ ឆ្នាំខាងមុខ។ នេះបើយោងតាមសេចក្តីថ្លែងការណ៍ផ្លូវការ ពីការិយាល័យនាយករដ្ឋមន្ត្រីអង់គ្លេស ដែលត្រូវបានស្រង់ផ្សាយដោយទីភ្នាក់ងារសារព័ត៌មាន​រុស្ស៊ី​​ TASS កាលពីថ្ងៃទី១៥ ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍ផ្លូវការ បានគូសបញ្ជាក់ថា ជំនួយផ្នែកថាមពលនេះនឹងជួយធានាដល់ប្រភពប្រេងឥន្ធនៈសម្រាប់រោងចក្រនុយក្លេអ៊ែររបស់អ៊ុយក្រែន ក្នុងបរិបទដែលសង្គ្រាមជាមួយរុស្ស៊ីនៅតែបន្តអូសបន្លាយ។ ការគាំទ្រនេះនឹងត្រូវធ្វើឡើងតាមរយៈការធានាហិរញ្ញវត្ថុចំនួន ២៨០ លានដុល្លារ ពីស្ថាប័នធានារ៉ាប់រងឥណទាននាំចេញរបស់អង់គ្លេស ដែលអនុញ្ញាតឲ្យក្រុមហ៊ុនអង់គ្លេស Urenco អាចផ្គត់ផ្គង់អ៊ុយរ៉ាញ៉ូមចម្រាញ់រួច​ ទៅឲ្យក្រុមហ៊ុនថាមពលរដ្ឋ Energoatom របស់អ៊ុយក្រែន។

យោងតាមការបញ្ជាក់ពីការិយាល័យនាយករដ្ឋមន្ត្រីអង់គ្លេស កិច្ចព្រមព្រៀងនេះត្រូវបានសម្រេចឡើង នៅក្នុងកិច្ចប្រជុំផ្ទាល់រវាងលោកនាយករដ្ឋមន្ត្រី Keir Starmer និងប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នៅក្នុងទីក្រុងឡុងដ៍ កាលពីដើមខែមិថុនា កន្លងទៅនេះ។

សេចក្តីថ្លែងការណ៍ដដែលនោះបានកត់សម្គាល់ថា កិច្ចព្រមព្រៀងថ្មីនេះ ក៏ជាជំហានបន្តនៃកិច្ចសន្យាវែងឆ្ងាយដែលក្រុមហ៊ុន Urenco និងក្រុមហ៊ុន Energoatom របស់អ៊ុយក្រែន បានចុះហត្ថលេខារួមគ្នាតាំងពីឆ្នាំ ២០២៣ មកម៉្លេះ ដែលចែងថា អង់គ្លេសនឹងត្រូវផ្គត់ផ្គង់អ៊ុយរ៉ាញ៉ូមចម្រាញ់ឲ្យអ៊ុយក្រែនរហូតដល់ឆ្នាំ ២០៣៥។

ក្រៅពីសារៈសំខាន់ផ្នែកសេដ្ឋកិច្ច និងស្ថិរភាពថាមពល កិច្ចព្រមព្រៀងថ្មីនេះក៏បានឆ្លុះបញ្ចាំងពីការខិតខំប្រឹងប្រែងរបស់ប្លុកលោកខាងលិច ក្នុងការកាត់បន្ថយការពឹងផ្អែករបស់អ៊ុយក្រែនលើខ្សែសង្វាក់ផ្គត់ផ្គង់នុយក្លេអ៊ែរពីរុស្ស៊ី។ កាលពីមុន បណ្តាប្រទេសនៅតំបន់អឺរ៉ុបខាងកើតភាគច្រើន តែងតែប្រើប្រាស់ឥន្ធនៈនុយក្លេអ៊ែរដែលផ្គត់ផ្គង់ដោយរុស្ស៊ី ប៉ុន្តែនិន្នាការនៃការបង្វែរមករកប្រភពផ្គត់ផ្គង់ចម្រុះបានកើនឡើងយ៉ាងខ្លាំង ចាប់តាំងពីជម្លោះបានផ្ទុះឡើង។

ជំហានថ្មីរបស់ទីក្រុងឡុងដ៍នៅពេលនេះ ក៏បានបង្ហាញយ៉ាងច្បាស់ថា ចក្រភពអង់គ្លេសកំពុងបន្តពង្រីកទំហំជំនួយរបស់ខ្លួនសម្រាប់អ៊ុយក្រែន មិនត្រឹមតែក្នុងវិស័យយោធាប៉ុណ្ណោះទេ ប៉ុន្តែថែមទាំងលូកដៃជួយក្នុងវិស័យយុទ្ធសាស្ត្រសំខាន់ៗ ដូចជាសន្តិសុខថាមពល និងហេដ្ឋារចនាសម្ព័ន្ធចាំបាច់របស់ប្រទេសផងដែរ៕

អត្ថបទ ៖ សាង ស្រីល័ក្ខ