មេដឹកនាំ Chechen ថា លោកខាងលិចយក អ៊ុយក្រែន ធ្វើជាកន្លែងលាង​លុយខ្មៅ

មេដឹកនាំសាធារណរដ្ឋ Chechen លោក Ramzan Kadyrov បាននិយាយនៅលើឆានែល Telegram របស់គាត់កាលពីថ្ងៃចន្ទថា ជំនួយរបស់លោកខាងលិចដែលផ្ដល់ឲ្យអ៊ុយក្រែន គឺគ្រាន់តែយកប្រទេសមួយនេះធ្វើជាកន្លែងលាងលុយខ្មៅប៉ុណ្ណោះ ។

លោក Kadyrov បាននិយាយថា “ខ្ញុំឃើញមានអ្នកខ្លះព្រួយបារម្ភអំពីជំនួយបរទេសដែលផ្ដល់ឲ្យអ៊ុយក្រែន ប៉ុន្តែកុំបារម្ភអី នេះគឺជាគម្រោងការលាងលុយខ្មៅប៉ុណ្ណោះ ។ មន្ត្រីលោកខាងលិច និងអ៊ុយក្រែនយកលុយដែលលួចពីមូលនិធិនានាទៅផ្ដល់ឲ្យអ៊ុយក្រែន ប៉ុន្តែទោះជាយ៉ាងណា មិនលើសពី ១៥ ភាគរយទេនៃជំនួយទាំងនោះ បានទៅដល់លេណដ្ឋានអ៊ុយក្រែននោះ” ។

លោក Kadyrov ក៏បានកត់សម្គាល់ផងដែរថា មិនចាំបាច់ព្រួយបារម្ភអំពីអរិភាពដែលកំពុងកើតឡើងនៅលើទឹកដីរុស្ស៊ីនាពេលនេះនោះទេ ព្រោះថា ទាំងនេះគឺជាតំបន់ដែលយើងបានជ្រើសរើសចូលរួមជាមួយរដ្ឋយើង ដើម្បីប្រើសម្រាប់ជាប្រយោជន៍ដល់ការការពារប្រជាជនរបស់យើង ពីសកម្មភាពប្រឆាំងរបស់អ្នកជាតិនិយមអ៊ុយក្រែន និងណាតូ” ។

ជាចុងក្រោយមេដឹកនាំរូបនេះបញ្ជាក់ថា ដូចអ្នកដឹងហើយ កាលពីថ្ងៃទី៦ ខែមករា អាមេរិកបានប្រកាសផ្ដល់កញ្ចប់ជំនួយថ្មីដល់អ៊ុយក្រែន ដែលមានតម្លៃជាង ៣ ពាន់លានដុល្លារ ។ យោងតាមសេតវិមាន ជំនួយនេះគឺដកចេញដោយផ្ទាល់ពីទុនបម្រុងរបស់មន្ទីរបញ្ចកោណ ហើយរួមបញ្ចូលទាំងរថពាសដែក Bradley, ខែលការពារដែនអាកាស ក៏ដូចជាអាវុធ និងគ្រាប់រំសេវផ្សេងទៀតជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ លោក Zelensky ដាក់គោលដៅបញ្ចប់សង្គ្រាមជាមួយ រុស្ស៊ី ឆ្នាំនេះ

ចុចអាន ៖ រុស្ស៊ី ចោទ អ៊ុយក្រែន ថា មិនគោរពបទឈប់បាញ់ ហើយថែមទាំងវាយ​ប្រហារ​រាប់រយលើកលើទីតាំងយោធារបស់ខ្លួន