ប្រធានសភាតំណាងរាស្រ្តអាមេរិក លោក Kevin McCarthy បានចោទប្រកាន់ប្រទេសចិនថា មិនយកចិត្តទុកដាក់ចំពោះអធិបតេយ្យភាពរបស់សហរដ្ឋអាមេរិក តាមរយៈការបញ្ជូនបាឡុងចារកម្មចូលទឹកដីរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក McCarthy បានសរសេរនៅលើ Twitter ថា “ការមិនយកចិត្តទុកដាក់របស់ចិនចំពោះអធិបតេយ្យភាពសហរដ្ឋអាមេរិក គឺជាសកម្មភាពអស្ថិរភាព ដែលត្រូវតែដោះស្រាយ ហើយលោកប្រធានាធិបតី បៃដិន មិនអាចនៅស្ងៀមបានទេ”។

មុននេះ ប្រព័ន្ធផ្សព្វផ្សាយអាមេរិកបានដកស្រង់សម្តី អ្នកនាំពាក្យក្រសួងការពារជាតិអាមេរិក ឧត្តមសេនីយ៍ Pat Ryder ដែលនិយាយថា វត្ថុពីលើអាកាស ដែលសន្មតថាជាបាឡុងចារកម្មរបស់ចិន ត្រូវបានគេប្រទះឃើញផ្លាស់ទីនៅភាគខាងជើងប្រទេស។

ក្នុងសម្តីរបស់គាត់, បាឡុងនេះធ្វើដំណើរក្នុងរយៈកម្ពស់ខ្ពស់ លើចរាចរណ៍ផ្លូវអាកាសពាណិជ្ជកម្ម ហើយមិនបង្ហាញការគំរាមកំហែងផ្នែកយោធា ឬរូបរាងកាយដល់មនុស្សនៅលើដីនោះទេ។

អ្នកនាំពាក្យក៏បាននិយាយផងដែរថា បន្ទាប់ពីបាឡុងត្រូវបានរកឃើញ រដ្ឋាភិបាលសហរដ្ឋអាមេរិក បានធ្វើសកម្មភាពភ្លាមៗដើម្បីការពារប្រឆាំងនឹងការប្រមូលព័ត៌មានរសើប។ ជាងនេះទៅទៀត លោកនិយាយថា ករណីបែបនេះ ត្រូវបានគេសង្កេតឃើញកាលពីប៉ុន្មានឆ្នាំមុន៕

ប្រែសម្រួល៖ Vann Vann

ប្រភព៖ TASS

ចុចអាន៖ អាមេរិក ចោទ ថា បាឡុង ចារកម្ម របស់ចិន បាន ហោះ លើ ទីតាំង យោធា ដ៏រសើប