សហរដ្ឋអាមេរិក កំពុងតាមដានបាឡុងស៊ើបការណ៍សង្ស័យជារបស់ចិន ដែលគេមើលឃើញពីលើដែនអាកាសអាមេរិក អស់រយៈពេលពីរបីថ្ងៃមកហើយ ប៉ុន្តែមន្ទីរបញ្ចកោណបានសម្រេចចិត្តមិនបាញ់វាចោលឡើយ ដោយសារតែហានិភ័យនៃគ្រោះថ្នាក់ដល់មនុស្សនៅលើដី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីការពារជាតិជាន់ខ្ពស់ម្នាក់បានប្រាប់អ្នកយកព័ត៌មានក្នុងមន្ទីរបញ្ចកោណនៅថ្ងៃសុក្រទី០៣ខែកុម្ភៈថា សហរដ្ឋអាមេរិកមានទំនុកចិត្តខ្ពស់ថា វាជាបាឡុងរយៈកម្ពស់ខ្ពស់របស់ចិន ហើយថា វាកំពុងហោះហើរលើទីតាំងដ៏រសើបដើម្បីប្រមូលព័ត៌មាន។

កន្លែងមួយដែលបាឡុងនេះត្រូវបានគេប្រទះឃើញគឺ រដ្ឋ Montana ដែលជាទីតាំងផ្ទុកស៊ីឡូមីស៊ីលនុយក្លេអ៊ែរចំនួនបីរបស់ប្រទេស នៅមូលដ្ឋានទ័ពអាកាស Malmstrom។

ឧត្តមសេនីយ៍ឯក Patrick Ryder លេខាធិការសារព័ត៌មានរបស់មន្ទីរបញ្ចកោណ បានផ្តល់សេចក្តីថ្លែងការណ៍ខ្លីមួយអំពីបញ្ហានេះ ដោយនិយាយថា រដ្ឋាភិបាលនៅតែបន្តតាមដានបាឡុងនេះ។ លោកលើកឡើង​ថា បាឡុង​ធ្វើ​ដំណើរ​នៅ​រយៈ​កម្ពស់​ខ្ពស់​ជាង​ចរាចរណ៍​ផ្លូវ​អាកាស​ពាណិជ្ជកម្ម ហើយ​មិន​បង្ហាញ​ពី​ការ​គំរាម​កំហែង​ផ្នែក​យោធា ឬ​រូបវន្ត​ដល់​មនុស្ស​នៅ​លើ​ដី​នោះ​ទេ។

លោកបន្ថែមថា សកម្មភាពឃ្លាំមើលស្រដៀងគ្នានេះ ត្រូវបានគេឃើញក្នុងរយៈពេលប៉ុន្មានឆ្នាំចុងក្រោយ។ សហរដ្ឋអាមេរិកបានចាត់វិធានការដើម្បីធានាថា បាឡុងមិនប្រមូលព័ត៌មានរសើបឡើយ។

ស្របពេលជាមួយគ្នានោះដែរ មន្ត្រីការពារជាតិបាននិយាយថា សហរដ្ឋអាមេរិកបានទាក់ទងទៅមន្ត្រីចិនតាមរយៈបណ្តាញជាច្រើន និងបានលើកឡើងពីភាពធ្ងន់ធ្ងរនៃបញ្ហានេះ។

គួរបញ្ជាក់ថា សេចក្តីប្រកាសរបស់មន្ទីរបញ្ចកោណ កើតឡើងត្រឹមតែប៉ុន្មានថ្ងៃប៉ុណ្ណោះ មុនរដ្ឋមន្ត្រីការបរទេសអាមេរិក លោក Antony Blinken ត្រូវបានគេរំពឹងថា នឹងធ្វើដំណើរទៅកាន់ប្រទេសចិន៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ ណាតូព្រមាន! ជ័យជម្នះរបស់លោកពូទីន នៅអ៊ុយក្រែន នឹងផ្តល់សញ្ញាដល់ ចិន ថា គោលដៅអាចសម្រេចបានដោយប្រើ កម្លាំងសាហាវ