ព័ត៌មានអន្ដរជាតិ

ណាតូ នឹងធ្វើឲ្យទ័ព អ៊ុយក្រែន កាន់តែខ្លាំងជាងមុន ក្រោយចប់ជម្លោះជាមួយ រុស្ស៊ី

បានផុស

២ years មុន

នៅ

ថ្ងៃអង្គារ ១៤ កុម្ភៈ ២០២៣

ដោយ

អគ្គលេខាធិការអង្គការណាតូលោក Jens Stoltenberg បាននិយាយកាលពីថ្ងៃចន្ទក្នុងសន្និសីទសារព័ត៌មាននៅទីក្រុងព្រុចសែលថា ណាតូចាំបាច់ត្រូវតែធ្វើឲ្យកងកម្លាំងប្រដាប់អាវុធអ៊ុយក្រែនកាន់តែរឹងមាំ និងខ្លាំងជាងមុន បន្ទាប់ពីជម្លោះបច្ចុប្បន្នជាមួយរុស្ស៊ីបានបញ្ចប់ ហើយផ្លាស់ប្តូរទីក្រុងកៀវទាំងស្រុងទៅជាស្តង់ដាររបស់អង្គការណាតូ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា នៅពេលជម្លោះនេះបញ្ចប់តាមមធ្យោបាយណាក៏ដោយ យើងគួរតែធានាដល់ អ៊ុយក្រែនអាចរារាំង និងការពារខ្លួនឯងបាន ដោយមិនចាំបាច់ពឹងប្រទេសដទៃនោះទេ ។

លោក Stoltenberg បញ្ជាក់ថា “អ្វីដែលយើងត្រូវការនៅពេលនេះ គឺយើងអាចពង្រឹង និងគាំទ្រលើការបង្ហាត់បង្រៀនកងទ័ពអ៊ុយក្រែន ហើយណាតូក៏សម្លឹងមើលទៅលើការផ្លាស់ប្តូររយៈពេលវែងនៃកងកម្លាំងប្រដាប់អាវុធអ៊ុយក្រែនចេញពីគោលលទ្ធិក្នុងសម័យសូវៀត ទៅជាសមត្ថភាពទំនើបតាមស្ដង់ដាររបស់ណាតូ ជាពិសេសទ័ពអ៊ុយក្រែនអាចធ្វើអន្តរកម្មជាមួយសម្ព័ន្ធមិត្តណាតូបាន” ។

លោកបានបន្តទៀតថា “អ្វីទាំងអស់នេះ គឺជាការធ្វើឲ្យអ៊ុយក្រែនមានកងកម្លាំងប្រដាប់អាវុធកាន់តែរឹងមាំ និងខ្លាំងជាងមុន បន្ទាប់ពីមានការរៀបចំសន្តិភាពមួយចំនួន ដែលអាចនឹងត្រូវបានព្រមព្រៀងគ្នាដើម្បីការពារការវាយប្រហារដ៏ធំមួយទៀតពីសំណាក់កងកម្លាំងរុស្ស៊ី ។

ជាចុងក្រោយលោក Stoltenberg បានប្រាប់ថា គោលដៅនៃប្រតិបត្តិការសឹករបស់រុស្ស៊ីក្នុងប្រទេសអ៊ុយក្រែន គឺដើម្បីកម្ចាត់ និងគ្រប់គ្រងប្រទេសអ៊ុយក្រែន ខណៈថ្នាក់ដឹកនាំរុស្ស៊ីបានបញ្ជាក់ជាច្រើនដងហើយថា រាល់គោលដៅនៃប្រតិបត្តិការនេះនឹងត្រូវសម្រេចបាន ៕