អាមេរិក ព្រមានថា បើចិន ហ៊ានផ្តល់អាវុធសាហាវឲ្យរុស្ស៊ី នោះនឹងឆ្លងកាត់បន្ទាត់ក្រហម (មានវីដេអូ)

ប្រេសិតអាមេរិកប្រចាំអង្គការសហប្រជាជាតិលោកស្រី Linda Thomas-Greenfield បានប្រាប់ CNN កាលពីថ្ងៃអាទិត្យទី១៩ខែកុម្ភៈថា ប្រទេសណាដែលផ្តល់ការគាំទ្រជាសព្វាវុធសាហាវៗដល់ទីក្រុងមូស្គូ ក្នុងជម្លោះដែលកំពុងបន្តជាមួយអ៊ុយក្រែន នឹងឆ្លងកាត់បន្ទាត់ក្រហម របស់ទីក្រុងវ៉ាស៊ីនតោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃដដែលនោះ រដ្ឋមន្ត្រីការបរទេសអាមេរិក លោក Antony Blinken ក៏បានព្រមានដោយផ្ទាល់ទៅកាន់អ្នកការទូតកំពូលចិន លោក Wang Yi ប្រឆាំងនឹងការពិចារណាជម្រើសបែបនេះផងដែរ។

លោកស្រី Thomas-Greenfield បានប្រាប់ CNN ថា “យើងត្រូវតែច្បាស់លាស់ថា ប្រសិនបើមានគំនិត និងកិច្ចខិតខំប្រឹងប្រែងណាមួយរបស់ចិន និងអ្នកដទៃ ក្នុងការផ្តល់ការគាំទ្រដ៍សាហាវឲ្យរុស្ស៊ីដើម្បីវាយប្រហារដ៏ឃោរឃៅប្រឆាំងនឹងអ៊ុយក្រែននោះ វាមិនអាចទទួលយកបានទេ។ នោះនឹងក្លាយជាបន្ទាត់ក្រហមហើយ”។

ការអះអាង​របស់​លោកស្រី​បាន​កើត​ឡើង​ខណៈ​លោក Blinken កំពុង​ជួប​លោក Wang Yi នៅ​ខាង​ក្រៅ​សន្និសីទ​សន្តិសុខ​ទីក្រុង Munich ក្នុង​ប្រទេស​អាល្លឺម៉ង់។ នៅទីនោះ អ្នកការទូតអាមេរិកបានប្រាប់សមភាគីចិនថា អាមេរិកមានក្តីព្រួយបារម្ភយ៉ាងខ្លាំងចំពោះចិន ដែលពិចារណាផ្តល់ជំនួយដ៍សាហាវទៅឲ្យរុស្ស៊ី។

រដ្ឋមន្ត្រីការបរទេសអាមេរិកនិយាយថា “អ្វីដែលយើងបានឃើញក្នុងរយៈពេលប៉ុន្មានឆ្នាំកន្លងមកនេះ ជាការពិត ការគាំទ្រផ្នែកនយោបាយ និងវោហាសាស្ត្រ។ ប៉ុន្តែយើងមានក្តីព្រួយបារម្ភយ៉ាងខ្លាំងថា​ ប្រទេសចិននឹងពិចារណាផ្តល់ការគាំទ្រដ៍សាហាវឲ្យរុស្ស៊ី”។ លោកអះអាងថា ការផ្តល់អាវុធសាហាវដល់រុស្ស៊ី នឹងបង្កផលវិបាកធ្ងន់ធ្ងរសម្រាប់ទីក្រុងប៉េកាំងនៅក្នុងទំនាក់ទំនងចិន-អាមេរិក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ អាមេរិក ខ្លាចថា ចិន អាចផ្តល់អាវុធសាហាវៗឲ្យ រុស្ស៊ី