អាមេរិក ខ្លាចថា ចិន អាចផ្តល់អាវុធសាហាវៗឲ្យ រុស្ស៊ី

រដ្ឋមន្ត្រីការបរទេសអាមេរិក លោក Antony Blinken បានប្រាប់ NBC នៅក្នុងបទសម្ភាសមួយថា សហរដ្ឋអាមេរិកមានការភ័យខ្លាចថា ប្រទេសចិន កំពុងពិចារណាផ្តល់អាវុធសាហាវៗឲ្យប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចសន្ទនាជាមួយលោក Wang Yi ដែលជាទីប្រឹក្សារដ្ឋចិន និងជានាយកការិយាល័យកិច្ចការបរទេសមជ្ឈិម, លោក Blinken បានលើកឡើងអំពីក្តីព្រួយបារម្ភរបស់សហរដ្ឋអាមេរិក ចំពោះការគាំទ្ររបស់ចិនដល់ប្រទេសរុស្ស៊ី។

រដ្ឋមន្ត្រីការបរទេសអាមេរិកនិយាយថា “អ្វីដែលយើងបានឃើញក្នុងរយៈពេលប៉ុន្មានឆ្នាំកន្លងមកនេះ ជាការពិត ការគាំទ្រផ្នែកនយោបាយ និងវោហាសាស្ត្រ។ ប៉ុន្តែយើងមានក្តីព្រួយបារម្ភយ៉ាងខ្លាំងថា​ ប្រទេសចិននឹងពិចារណាផ្តល់ការគាំទ្រដ៍សាហាវដល់រុស្ស៊ី”។

លោកបន្តថា ការផ្តល់អាវុធសាហាវដល់រុស្ស៊ី នឹងបង្កផលវិបាកធ្ងន់ធ្ងរសម្រាប់ទីក្រុងប៉េកាំងនៅក្នុងទំនាក់ទំនងចិន-អាមេរិក។ លោក​ក៏​​រំឭក​ដែរ​ថា នេះ​ជា​អ្វី​ដែល​លោក​ប្រធានាធិបតី ចូ បៃដិន បាន​ចែករំលែក​ជាមួយប្រធានាធិបតីចិនលោក ស៊ី ជីនពីង ក្នុង​ឱកាស​ជា​ច្រើនលើកច្រើនសា។

គួរបញ្ជាក់ជាថ្មី កាលពីចុងខែមករា លោក John Kirby អ្នកសម្របសម្រួលសម្រាប់ទំនាក់ទំនងជាយុទ្ធសាស្ត្រនៅក្រុមប្រឹក្សាសន្តិសុខជាតិអាមេរិក បាននិយាយថា សហរដ្ឋអាមេរិកបានជំរុញប្រទេសចិនកុំឲ្យគាំទ្រប្រតិបត្តិការយោធាពិសេសរបស់រុស្ស៊ីនៅអ៊ុយក្រែន។ យោងតាមលោក Kirby, ទីក្រុងវ៉ាស៊ីនតោន មានបំណងចាត់វិធានការប្រឆាំងនឹងក្រុមហ៊ុនទាំងទាំងឡាយណា ដែលរំលោភលើយុទ្ធនាការដាក់ទណ្ឌកម្មរបស់សហរដ្ឋអាមេរិក ប្រឆាំងនឹងទីក្រុងមូស្គូ៕

ប្រែសម្រួល៖ Vann Vann

ប្រភព៖ TASS

ចុចអាន៖ ចិន ត្រៀមបង្ហាញផែនការ ដោះស្រាយជម្លោះ រុស្ស៊ី-អ៊ុយក្រែន