ប្រទេសអឺរ៉ុបមួយថា អ៊ុយក្រែន ក៏មិនចាញ់ ឯរុស្ស៊ី ក៏មិនឈ្នះ

នាយករដ្ឋមន្រ្តីប្រទេសហុងគ្រីលោក Viktor Orban បានប្រាប់វិទ្យុ Kossuth Radio កាលពីថ្ងៃសោរ៍ថា សង្គ្រាមរវាងរុស្ស៊ី និងអ៊ុយក្រែន គឺមិនអាចមានអ្នកឈ្នះនោះទេ ហើយបទឈប់បាញ់បន្ទាន់ និងកិច្ចចរចារកសន្តិភាពចាំបាច់ត្រូវចាប់ផ្តើមឲ្យបានឆាប់តាមដែលអាចធ្វើទៅបាន ។

លោក Orban បាននិយាយថា “ប្រទេសរុស្ស៊ីមិនអាចឈ្នះសង្គ្រាមបានទេ ពីព្រោះលោកខាងលិចកំពុងតែកែនអាវុធ រួមទាំងថាមពល និងថវិកាយ៉ាងច្រើនលើសលុបសម្រាប់អ៊ុយក្រែន ប៉ុន្តែផ្ទុយមកវិញចំពោះអ្នកដែលគិតថា រុស្ស៊ីអាចចាញ់សង្គ្រាមនោះ ក៏ខុសដែរ គឺច្រឡំធំហើយ” ។

លោក Oban បាននិយាយថា សំណើរមួយដើម្បីបញ្ជូនកម្លាំងរក្សាសន្តិភាពទៅទឹកដីនៃអ៊ុយក្រែនអាចនឹងមានរបៀបវារៈឆាប់ៗនេះ ប៉ុន្តែវាខុសដែរសម្រាប់អឺរ៉ុបដែលមិនបានកំណត់ការជួយអ៊ុយក្រែន ដែលធ្វើឲ្យសង្គ្រាមមួយនេះកាន់តែអូសបន្លាយពេល និងកាន់តែបំផ្លិចបំផ្លាញ ។

ការអះអាងរបស់លោកនាយករដ្ឋមន្ត្រីហុងគ្រីរូបនេះបានកើតឡើងតែប៉ុន្មានសប្ដាហ៍ប៉ុណ្ណោះ បន្ទាប់ពីមានការលើកឡើងដូចគ្នានេះរបស់ប្រធានអគ្គសេនាធិការចម្រុះអាមេរិកលោក Mark Milley ថា ជម្លោះរវាងរុស្ស៊ី និងអ៊ុយក្រែន នឹងមិនមានកងទ័ពខាងណាឈ្នះនោះទេ ។

គួរបញ្ជាក់ថា គិតត្រឹមពេលនេះ ប្រតិបត្តិការសឹករបស់រុស្ស៊ីលើអ៊ុយក្រែនបានឈានដល់ខួប ១ ឆ្នាំហើយ បន្ទាប់ពីលោកប្រធានាធិបតី Vladimir Putin ប្រកាសបើកការវាយលុកលើរដ្ឋាភិបាលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី ប្រាប់ពីប្រទេសដែលត្រូវចរចាជាមួយ ដើម្បីដោះស្រាយវិបត្តិនៅ អ៊ុយក្រែន