រុស្ស៊ី ប្រាប់ពីប្រទេសដែលត្រូវចរចាជាមួយ ដើម្បីដោះស្រាយវិបត្តិនៅ អ៊ុយក្រែន

តំណាងអចិន្ត្រៃយ៍របស់រុស្ស៊ីប្រចាំនៅអង្គការសហប្រជាជាតិ (UN) លោក Vasily Nebenzya បាននិយាយនៅក្នុងសម័យប្រជុំពិសេសស្តីពីអ៊ុយក្រែនកាលពីពេលថ្មីៗនេះថា កិច្ចចរចាលើការដោះស្រាយវិបត្តិនៅអ៊ុយក្រែនគួរតែធ្វើឡើងជាមួយសហរដ្ឋអាមេរិក មិនមែនជាមួយទីក្រុងកៀវនោះទេ ។

អ្នកការទូតរូបនេះបាននិយាយថា “ដំណើរការស្វែងរកសន្តិភាពដើម្បីដោះស្រាយស្ថានការណ៍ទាំងមូលនេះ ពោរពេញទៅដោយផលវិបាកអវិជ្ជមានបំផុតសម្រាប់មនុស្សជាតិទាំងអស់ ព្រោះថា នៅក្នុងព្រឹត្តិការណ៍នៃការប្រឈមមុខដាក់គ្នាដោយផ្ទាល់រវាងរុស្ស៊ី និងអង្គការណាតូនៅពេលនេះ មិនគួរធ្វើឡើងរវាងរុស្ស៊ី និងអ៊ុយក្រែនទៀតនោះទេ ប៉ុន្តែគឺរវាងរុស្ស៊ី និងសមូហភាពលោកខាងលិច” ។

លោក Nebenzya បានបន្ថែមថា “គ្រប់គ្នាដឹងហើយ អាមេរិកជាអ្នកនៅក្រោយរដ្ឋាភិបាលទីក្រុងកៀវ ប៉ុន្តែទោះជាយ៉ាងណា យើង​ត្រៀម​ខ្លួន​រួចជា​ស្រេច​ក្នុង​ការ​ស្វែង​រក​ដំណោះ​ស្រាយ​ការទូត និងដោះស្រាយ​រយៈពេល​វែង​ចំពោះ​វិបត្តិ​នេះ” ។

បេសកជន​រូប​នេះ​បាន​កត់​សម្គាល់​ថា​ សត្រូវរបស់​យើង​មិន​ទាន់​បាន​ដឹង​ពី​សមត្ថភាព​ថាមពល​នុយក្លេអ៊ែររបស់យើងនោះ​ទេ ទើបពួកគេចង់កម្ចាត់យើង​ ហើយនេះជាមូលហេតុដែលយើងត្រូវដោះស្រាយផ្នែកយោធា ដោយចាប់ផ្តើមប្រតិបត្តិការសឹកកាលពីមួយឆ្នាំមុននេះ” ។

គួរបញ្ជាក់ថា គិតត្រឹមពេលនេះ ប្រតិបត្តិការសឹករបស់រុស្ស៊ីលើអ៊ុយក្រែនបានឈានដល់ខួប ១ ឆ្នាំហើយ បន្ទាប់ពីលោកប្រធានាធិបតី Vladimir Putin ប្រកាសបើកការវាយលុកលើរដ្ឋាភិបាលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ ប្រទេសអឺរ៉ុបមួយថា អ៊ុយក្រែន ក៏មិនចាញ់ ឯរុស្ស៊ី ក៏មិនឈ្នះ